ငလျင်ကူညီဖို့လာတဲ့ တရုတ်နိုင်ငံ ကြက်ခြေနီအသင်းကို ပစ်ခတ်ရတာဟာ သံရုံးနဲ့ စစ်သံရုံးတွေကို အကြောင်းမကြားဘဲ လာရောက်လို့ ပစ်တာဖြစ်တယ်လို့ စစ်ကောင်စီဆို
တရုတ်နိုင်ငံကြက်ခြေနီအသင်းက ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း(၉)စီးကို မနေ့ ဧပြီ ၁ ရက်နေ့ ညနေမှာ စစ်ကောင်စီတပ်က ပစ်ခတ်တားဆီးခဲ့တာဟာ သံရုံးနဲ့ စစ်သံရုံးတွေကို အကြောင်းမကြားဘဲ လာရောက်ခဲ့တာကြောင့် ပစ်ခတ်ခဲ့တာဖြစ်တယ်လို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒီကနေ့ ဧပြီ ၂ရက်နေ့ နေ့လယ်ပိုင်းမှာ သူတို့ရဲ့ ဝါဒဖြန့်မီဒီယာတွေကနေတဆင့် ပြောကြားလိုက်ပါတယ်။
မန္တလေးမြို့က ငလျင်ဘေးသင့် ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီအသင်းက ယာဉ်တန်း(၉)စီးဟာ နောင်ချိုမြိုနယ် အုမ္မတီးကျေးရွာမှာ စစ်ကောင်စီတပ်ရဲ့ အသင့်စောင့်ဆိုင်းပစ်ခတ်ခြင်းကို ခံခဲ့ရတာဖြစ်ပါတယ်။
အဲဒီကယ်ဆယ်ရေးယာဉ်တန်းကို တအာင်းတပ်မတော် TNLA က ကာကွယ်စောင့်ရှောက်ထားပြီး လိုရာခရီးကို ဆက်လက်ပို့ဆောင်သွားမယ်လို့လည်း ထုတ်ပြန်ထားပါတယ်။
“ကျွန်တော်တို့နိုင်ငံမှာ နိုင်ငံတကာအကူအညီများ လက်ခံပြီးတော့ မြေငလျင်ဒဏ်နဲ့ပတ်သတ်ပြီး ကူညီကယ်ဆယ်ရေးလုပ်ငန်းတွေ ထောက်ပံ့ရေးပစ္စည်း လက်ခံတဲ့ လုပ်ငန်းတွေ ဆောင်ရွက်လျက်ရှိပါတယ်။ အဲနေရာမှာ ကျွန်တော်တို့ သက်ဆိုင်ရာ သံရုံး စစ်သံရုံးတွေကနေတဆင့် ဆက်သွယ်ပြီးမှ ဆောင်ရွက်တာမျိုးဖြစ်ပါတယ်။ အားလုံးကလည်း ဒီလိုဘဲ ဆက်သွယ် ဆောင်ရွက်နေကြတာ ဖြစ်ပါတယ်။ ခုဖြစ်ခဲ့တဲ့အဖွဲ့တွေလည်း မြန်မာနိုင်ငံကိုရော သက်ဆိုင်ရာ သံရုံးစစ်သံရုံးကိုရော အကြောင်းကြားထားခြင်းမရှိဘူး ဆိုတာကိုတော့ ပထမဦးစွာ ကျွန်တော်တို့သိရပါတယ်။ ဖြစ်စဥ်အနေနဲ့ကတော့ ဖြစ်စဉ်နေရာကတော့ နောင်ချိုမြို့နယ်၊ အုမ္မတီးကျေးရွာအနီးမှာ ဖြစ်ခဲ့တာဖြစ်တယ်”လို့ စစ်ကောင်စီပြောခွင့် ဗိုလ်ချုပ်ဇော်မင်းထွန်းက ပြောပါတယ်။
စစ်ကောင်စီကနေတဆင့် လာရောက်တဲ့ အခြားနိုင်ငံတကာ ကူညီရေးအဖွဲ့တွေကို လက်ခံကြိုဆိုထားပြီး ကယ်ဆယ်ရေး လုပ်ငန်းတွေလည်း ဆောင်ရွက်နေပြီဖြစ်တယ်လို့ ဇော်မင်းထွန်းက ဆက်ပြောပါတယ်။
ဒါ့အပြင် တရုတ်ကြက်ခြေနီအသင်း အသုံးပြုလာတဲ့ မော်တော်ယာဉ်တွေဟာ မြန်မာနိုင်ငံအတွင်းက မော်တော်ယာဉ်တွေပဲ ဖြစ်တာကြောင့် တရုတ်ကြက်ခြေနီအသင်းအဖြစ် ယုံကြည်ဖို့ ခက်ခဲတယ်လို့ ဇော်မင်းထွန်းက ဆိုပါတယ်။
အင်အားပြင်းငလျင်ဒဏ်ကြောင့် ပြည်သူတွေ ကြုံတွေ့နေရမှုကို သတင်းရယူဖော်ပြဖို့အတွက် တောင်းဆိုကြတဲ့ နိုင်ငံတကာ သတင်းမီဒီယာတွေကိုလည်း စစ်ကောင်စီက နိုင်ငံတွင်း ဝင်ရောက်မှုကို ပိတ်ပင်ထားချိန် မီဒီယာတွေမှာ သတင်းဖော်ပြမှုတွေကိုလည်း မယုံကြည်ဖို့ ဇော်မင်းထွန်းက ပြောပါတယ်။
အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနက ကူညီကယ်ဆယ်ရေးလုပ်ငန်းတွေ အတွက် ငလျင်ဒဏ်သင့်တဲ့ ဒေသတွေနဲ့ ဆက်စပ်ဒေသတွေမှာ ခုခံကာကွယ်ခြင်းကလွဲပြီး စစ်အားလုံး သီတင်း ၂ ပတ်ကြာ ရပ်ဆဲမယ်လို့ ပြီးခဲ့တဲ့ မတ်လ ၃၀ ရက်နေ့က သတင်းထုတ်ပြန်ထားပါတယ်။
ညီနောင်မဟာမိတ်သုံးဖွဲ့ကလည်း ငလျင်ဘေးကူညီကယ်ဆယ်ရေးအတွက် တစ်လတာ အပစ်ခတ်ရပ်စဲမယ်လို့ ကြေညာထားပါတယ်။
ဓာတ်ပုံ – TNLA
ပုံစာ – စစ်ကောင်စီက ပစ်ခတ်တားဆီးခဲ့တဲ့ တရုတ်နိုင်ငံကြက်ခြေနီအသင်းက ထောက်ပံ့ရေးမော်တော်ယာဉ်များကို မြင်ရပုံ