တရုတ်နိုင်ငံ ကြက်ခြေနီအသင်းရဲ့ ယာဉ်တန်းကို စစ်ကောင်စီက သေနတ်နဲ့ ရှေ့ကပစ်တာဖြစ်တယ်လို့ TNLA ပြောရေးဆိုခွင့်ရှိသူပြော
ငလျင်ဘေးကူညီဖို့ လာတဲ့ တရုတ်နိုင်ငံ ကြက်ခြေနီအသင်းရဲ့ ယာဉ်တန်းကို စစ်ကောင်စီက ဖြတ်သန်းသွားလာခွင့်မပေးဘဲ တားမြစ်ခဲ့ရာမှာ မိုးပေါ်ကို သေနတ်ထောင်ပြီး ပစ်ဖောက်ခဲ့တာလို့ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒီကနေ့ မနက်ပိုင်းမှာ ပြောဆိုခဲ့ပေမဲ့ မိုးပေါ်ကိုသေနတ်ထောင်ပြီး ပစ်ခတ်ခဲ့တာမဟုတ်ဘဲ ရှေ့တည့်တည့်ကနေ ပစ်တာဖြစ်ကြောင်း တအာင်းတပ်မတော် TNLA ပြောရေးဆိုခွင့်ရှိသူ လွေးယေဦးက CJ Platform ကို ပြောပါတယ်။
စစ်ကောင်စီတပ်က ပစ်ခတ်တားဆီးခဲ့တာဟာ သံရုံးနဲ့ စစ်သံရုံးတွေကို အကြောင်းမကြားဘဲ လာရောက်ခဲ့တာကြောင့် မိုးပေါ်ထောင် ပစ်ခတ်ခဲ့တာဖြစ်တယ်လို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒီကနေ့ ဧပြီ ၂ရက်နေ့ နေ့လယ်ပိုင်းမှာ ပြောဆိုထားပါတယ်။
စစ်ကောင်စီပြောရေးဆိုခွင့်ရှိသူရဲ့ ပြောဆိုတာနဲ့ပတ်သတ်ပြီး ဟုတ်မဟုတ်ကို CJ Platform က TNLA ပြန်ကြားရေးတာဝန်ခံ လွေးယေဦးကို မေးမြန်းရာမှာတော့ အခုလိုပြောပါတယ်။
“ ဒီသတင်းမကြားဘူးဆိုတာက မှားပါတယ်။ ဖြစ်စဉ်အမှန်က အဲဒီလိုတော့မဟုတ်ဘူးပေါ့နော် သူတို့ပစ်တဲ့အချိန်တုန်းက ရှေ့တည့်တည့်ကနေ ပစ်ပါတယ်။ “ လို့ လွေးယေဦးကပြောပြပါတယ်။
စစ်ကောင်စီက ပစ်ခတ်ဟန့်တားခဲ့တဲ့ တရုတ်နိုင်ငံကြက်ခြေနီအသင်းက ယာဉ်တန်း (၉) စီးဟာ ဒီကနေ့ ဖြတ်သန်းခွင့်ပေးဖို့ စစ်ကောင်စီကိုတောင်းခံခဲ့ပေမဲ့ စစ်ကောင်စီက ဖြတ်သန်းခွင့်မပေးလို့ အခြားလမ်းတစ်ခုကနေ ကူညီဆောင်ရွက်ပေးနိုင်ဖို့ နောင်ချိုမြို့ကနေ ထွက်ခွာသွားပြီဖြစ်တယ်လို့ သိရပါတယ်။
“ မနက်ကလည်း သူတို့ဘက်က သွားပြီးမှ သတင်းပို့တာတွေရှိပါတယ်။ သို့ပေမဲ့လည်း စစ်ကောင်စီက ပေးမဖြတ်တာမျိုးတွေ လုပ်ပါတယ် “ လို့ PSLF/TNLA ပြောရေးဆိုခွင့်ရှိသူ လွေးယေဦးက CJ Platform ကိုပြောပါတယ်။
မန္တလေးမြို့က ငလျင်ဘေးသင့် ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီအသင်းက ယာဉ်တန်း(၉)စီးဟာ နောင်ချိုမြိုနယ် အုမ္မတီးကျေးရွာမှာ မနေ့က စစ်ကောင်စီတပ်ရဲ့ အသင့်စောင့်ဆိုင်းပစ်ခတ်ခြင်းကို ခံခဲ့ရလို့ နောင်ချို့မြို့ကို ပြန်လှည့်ခဲ့ရတာပဲ ဖြစ်ပါတယ်။
စစ်ကောင်စီရဲ့ ပစ်ခတ်ခြင်းခံခဲ့ရတဲ့ တရုတ်နိုင်ငံကြက်ခြေနီအသင်းယာဉ်တန်း(၉)စီးကို မနေ့က တအာင်းတပ်မတော် TNLA က ကာကွယ် စောင့်ရှောက်ထားခဲ့ပြီး လိုရာခရီးကိုတော့ ဒီကနေ့မှာ အခြားလမ်းကနေ ဆက်လက်ပို့ဆောင်ခဲ့ပါတယ်။
ဓာတ်ပုံ – TNLA