“ဒီတစ်ပတ် ရွှေဈေး အတက်အကျ”( မေ ၅ ရက် မှ ၁၁ ရက်အထိ)
“ကမ္ဘာ့ရွှေဆက်ကျပြီး မြန်မာ့ရွှေပြန်တက်”
အရင် အပတ်က ဈေးတွေကျခဲ့တဲ့ မြန်မာ့ရွှေစျေးဟာ ဒီတစ်ပတ်မှာတော့ အပြောင်းအလဲတွေရှိနေခဲ့ပြီး ကမ္ဘာ့ရွှေစျေး ဆက်တိုက်ကျနေပေမယ့် မြန်မာ့ရွှေစျေးကတော့ ပြန်တက်ခဲ့ပါတယ်။
မြန်မာ့ရွှေ အမျိုးအစားတွေဖြစ်တဲ့ ၁၅ ပဲရည် အခေါက်ရွှေ တစ်ကျပ်သားကို ၄၄ သိန်း ၅ သောင်းကျပ်ကနေ ၁ သိန်း ၂ သောင်း ၅ ထောင် အထိ တက်ခဲ့သလို ၁၆ ပဲရည် အခေါက်ရွှေ တစ်ကျပ်သားကို ၄၇ သိန်း ၄ သောင်း ကနေ ၁ သိန်း ၂ သောင်းထိ တက်ခဲ့ပါတယ်။
စစ်ကောင်စီ လက်အောက်ခံ ရန်ကုန်ရွှေလုပ်ငန်းရှင်ကြီးများအသင်း (YEGA) ရဲ့ လူမှုကွန်ရက် မှာတော့ အကယ်ဒမီ မီးလင်းရွှေ (၁၆ ပဲရည်) အခေါက်ရွှေ တစ်ကျပ်သား ကို ၃၉ သိန်း ၉ သောင်း ၉ ထောင့်၂ ရာ လို့ ဖော်ပြထားပါတယ်။
မြေပြင်ဈေးကွက် ရဲ့ မေလ ဒုတိယပတ် ရွှေဈေးကွက် အပိတ်ဈေးနှုန်းတွေကတော့ ၁၆ ပဲရည် အခေါက်ရွှေ တစ်ကျပ်သား ၄၈ သိန်း ၆ သောင်း ကျပ် ၊ ၁၅ ပဲရည် အခေါက်ရွှေ တစ်ကျပ်သား ၄၅ သိန်း ၇ သောင်း ၅ ထောင် ကျပ် နဲ့ ကမ္ဘာ့ရွှေ တစ်အောင်စ ကတော့ အမေရိကန် ၂၃၆၀ ဒဿမ ၄ ဒေါ်လာ ဈေးရှိခဲ့ပါတယ်။