၁၀၂၇ စစ်ဆင်ရေးကို ထောက်ခံကြောင်း ဒေသကာကွယ်ရေးတပ်ဖွဲ့များနှင့် လက်နက်ကိုင်အဖွဲ့များဆို
အောင်ပွဲအလီလီခံနေသော ညီနောင်သုံးဖွဲ့၏ ရှမ်းပြည်နယ်(မြောက်ပိုင်း)တွင် စစ်ကောင်စီတပ်များကို တိုက်ခိုက်မှုများကို ထောက်ခံကြိုဆိုကြောင်း ဒေသအသီးသီးက ကာကွယ်ရေးတပ်ဖွဲ့များ၊ လက်နက်ကိုင်အဖွဲ့အချို့နှင့် လူငယ်တော်လှန်ရေးအဖွဲ့အစည်းအသီးသီးက ကြေညာချက် ထုတ်ပြန်ထားကြသည်။
ချင်းအမျိုးသားတပ်ဦး(CNF)၊ ယောကာကွယ်ရေးတပ်(YDF)၊ GZ Special Task Force-Wetlet၊ ပြည်သူ့လွတ်လပ်ရေးအဖွဲ့/ပြည်သူ့လွတ်လပ်ရေးတပ်တော်၊ ပြည်သူ့စစ်မဟာဗျူဟာ အကြံပေးဗျူရို၏ မိုးကြိုးပြောက်ကျားတပ်ဖွဲ့၊ လူ့ဘောင်သစ်ဒီမိုကရက်တစ်ပါတီတို့က ထောက်ခံကြောင်း ထုတ်ပြန်ခဲ့ကြသည်။
ထို့ပြင် လူငယ်တော်လှန်ရေးအဖွဲ့အစည်းများဖြစ်သော ရက္ခိုင်ပြည်ကျောင်းသားသမဂ္ဂ၊ ဧရာဝတီလူငယ်များသမဂ္ဂ၊ ပြည်သူ့ဝန်ထမ်းများသမဂ္ဂ၊ ပခုက္ကူလူထုတိုက်ပွဲသပိတ်ကော်မတီ၊ မကွေးလူထုတိုက်ပွဲကော်မတီ၊ မြိုင်မြို့နယ် အခြေခံပညာအထွေထွေသပိတ်ကော်မတီ၊ ယောလူထုတိုက်ပွဲကော်မတီ၊ ရေစကြိုမြို့နယ် လူထုသပိတ်တိုက်ပွဲ ဦးဆောင်ကော်မတီတို့က ထောက်ခံကြိုဆိုကြောင်း ထုတ်ပြန်ထားကြသည်။
လတ်တလော ရှမ်းမြောက်ဒေသအတွင်း ကိုးကန့်တပ် MNDAA ၊ တအောင်းတပ် TNLA ၊ ရခိုင်တပ် AA တို့၏ ပူးပေါင်းအဖွဲ့သည် ချင်းရွှေဟော်၊ ဖောင်းဆိုင်၊ ကြူကုတ်(ပန်ဆိုင်း)မြို့တို့ကိုထိန်းချုပ်နိုင်ခဲ့ပြီး စစ်ကောင်စီ၏ စခန်းကြီး၊ စခန်းငယ် စုစုပေါင်း ၉၀ ခန့်ကို သိမ်းပိုက်နိုင်ခဲ့ကြောင်း ညီနောင်သုံးဖွဲ့၏ ထုတ်ပြန်ချက်များအရ သိရသည်။
ထို့ပြင် ထိုမြို့သိမ်း၊ စခန်းသိမ်းတိုက်ပွဲများမှ လက်နက်ခဲယမ်းအမြောက်အမြားကို သိမ်းဆည်းရမိခဲ့ကြောင်း သိရသည်။