ထောင်များတွင် ဧည့်တွေ့ခွင့်ပြုသော်လည်း ကန့်သတ်ချက်များနေ၍ မိသားစုဝင်များ အခက်တွေ့
မြန်မာနိုင်ငံတဝန်းရှိ ထောင်များတွင် ယနေ့(အောက်တိုဘာ ၂၄ ရက်)နေ့မှစ၍ ထောင်ဝင်စာဧည့်တွေ့ခွင့်ပြုပြီဖြစ်သော်လည်း ကန့်သတ်ချက်များရှိနေသောကြောင့် မိသားစုဝင်များ အခက်တွေ့နေရကြောင်း ၎င်းတို့ထံမှ သိရသည်။
အကျဉ်းဦးစီးဌာနမှ ဧည့်တွေ့မည့် မိသားစုများအနေဖြင့် မှတ်ပုံတင်မူရင်း၊ အိမ်ထောင်စုဇယားမူရင်း၊ ရက်သတ္တပတ်အတွင်းပြုလုပ်ထားသည့် ရပ်ကွက်တွင်နေထိုင်ကြောင်း ထောက်ခံစာမူရင်း၊ တစ်ပတ်အတွင်းပြုလုပ်ထားသည့် ပြစ်မှုကင်းရှင်းကြောင်း ရဲစခန်းထောက်ခံစာမူရင်း၊ ကိုဗစ်-၁၉ရောဂါကာကွယ်ရေး ၂ ကြိမ်ထိုးနှံပြီးစီးကြောင်း ထောက်ခံစာနှင့် နိုင်ငံတွင်း ကိုဗစ်ကပ်ရောဂါ ကူးစက်နှုန်း (၂) ရာခိုင်နှုန်း အထက်ဖြစ်နေပါက ၄၈ နာရီအတွင်း စစ်ဆေးထားသည့် ကိုဗစ်ရောဂါကင်းရှင်းကြောင်း ဆေးစစ်မှတ်တမ်းတို့ လိုအပ်ကြောင်း ကန့်သတ်ထားသည်။
” ဧည့်တွေ့ခွင့်ရတော့ ကောင်းတော့ကောင်းပေမယ့် အဆင်မပြေပါဘူး။ ထောက်ခံစာတွေပေါ့။ ၄၈ နာရီအတွင်းလုပ်ထားတဲ့ ကိုဗစ်ထောက်ခံစာတဲ့။ အဲဒီထောက်ခံစာက တစ်ခါလုပ်ရင် နှစ်သောင်းခွဲကုန်တယ်။ ပြီးတော့ ရပ်ကွက်ထောက်ခံစာ၊ ရဲထောက်ခံစာတွေလည်း သွားလုပ်ရင် လက်ဖက်ရည်ဖိုးဆိုပြီး ပေးရသေးတယ်။ တစ်လတစ်လ ထောင်ဝင်စာတောင် မနည်းပို့နေရတာလေ။ ဒီလိုတွေဆိုတော့ ဘယ်အဆင်ပြေမလဲ ” ဟု နိုင်ငံရေးအကျဉ်းသားတစ်ဦး၏ မိသားစုဝင်တစ်ဦးက ပြောသည်။
စစ်တပ်မှ အာဏာသိမ်းပြီးနောက်ပိုင်း နိုင်ငံတဝှမ်းတွင် ဥပဒေမဲ့ ဖမ်းဆီးထောင်ချခံရသူ အများအပြားရှိလာပြီး ယခုနှစ် အောက်တိုဘာ ၂၀ ရက်နေ့ စာရင်းများအရ ၁၉,၆၀၃ ဦးမှာ ဖမ်းဆီးထိန်းသိမ်းခံထားရကာ ၇,၈၀၆ ဦးမှာ ထောင်ဒဏ်ချမှတ်ခြင်းခံထားရသည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP) မှ ထုတ်ပြန်ချက်အရ သိရသည်။