ဇူကာဘတ်နဲ့ Meta အမှုဆောင်အရာရှိတွေ ဒေါ်လာ ၈ ဘီလီယံတန် တရားစွဲဆိုမှုနဲ့ ရင်ဆိုင်နေရ
Meta ရဲ့ CEO ဖြစ်သူ မာ့ခ် ဇူကာဘတ်ကို အစုရှယ်ယာရှင်တွေက သူနဲ့ အခြား အမှုဆောင်အရာရှိတွေကို Facebook ရဲ့ လုံခြုံရေးဥပဒေ ချိုးဖောက်ပြီး လုပ်ကိုင်ခွင့်ပေးခဲ့တယ်လို့ စွပ်စွဲကာ တရားစွဲဆိုထားပါတယ်။ အဲဒီ တရားစွဲဆိုမှုဟာ ဒီအပတ်အတွင်း သက်သေထွက်ဆိုသွားဖို့ ရှိနေတယ်လို့ နိုင်ငံတကာသတင်းဌာနတွေမှာ ဖော်ပြထားပါတယ်။
ဒီတရားစွဲဆိုမှုဟာ Facebook သုံးစွဲသူ သန်းပေါင်းများစွာရဲ့ ဒေတာတွေကို နိုင်ငံရေးရည်ရွယ်ချက်အတွက် မလျော်မကန် ရယူသုံးစွဲခဲ့တဲ့ ၂၀၁၈ ခုနှစ် Cambridge Analytica အရှုပ်တော်ပုံကနေ စတင်ခဲ့တာ ဖြစ်ပါတယ်။ အစုရှယ်ယာရှင်တွေက ဇူကာဘတ်နဲ့ အခြား ထိပ်တန်းအရာရှိ ၃ ယောက်က သုံးစွဲသူတွေရဲ့ ကိုယ်ရေးကိုယ်တာအချက်အလက်တွေကို ကာကွယ်ဖို့ ပြည်ထောင်စုကုန်သွယ်ရေးကော်မရှင် (FTC) နဲ့ ပြုလုပ်ထားတဲ့ ၂၀၁၂ ခုနှစ် သဘောတူညီချက်ကို လိုက်နာဖို့ ပျက်ကွက်ခဲ့တယ်လို့ စွပ်စွဲထားပါတယ်။
တရားခံအဖြစ် စွဲဆိုခံရတဲ့ Meta ကုမ္ပဏီဟာ ဒီအရှုပ်တော်ပုံတွေ ပေါ်ပေါက်လာပြီးနောက် ၂၀၁၉ ခုနှစ်က စံချိန်တင် FTC ဒဏ်ကြေး ဒေါ်လာ ၅ ဘီလီယံအပါအဝင် ဒဏ်ကြေးတွေနဲ့ တရားစရိတ် စုစုပေါင်း ဒေါ်လာ ၈ ဘီလီယံကျော် ပေးဆောင်ခဲ့ရပါတယ်။ အခုတော့ အစုရှယ်ယာရှင်တွေက ဒီငွေတွေကို ကုမ္ပဏီထံ ပြန်လည်ပေးလျော်စေလိုတာပါ။
ဗုဒ္ဓဟူးနေ့မှာ ဒယ်လာဝဲပြည်နယ်ရဲ့ ချန်စရီတရားရုံးမှာ စတင်မယ့် ဒီအမှုကို သမိုင်းထဲက အရေးအပါဆုံး ကော်ပိုရိတ်ကြီးကြပ်မှုဆိုင်ရာ တရားခွင်တစ်ခုအဖြစ် ပြောဆိုနေကြပါတယ်။
တရားလိုတွေက ကုမ္ပဏီဟာ ဇူကာဘတ်ရဲ့ ညွှန်ကြားမှုနဲ့ ဒေတာအလွဲသုံးစားမှုတွေကို ဆက်လုပ်ခဲ့တယ်လို့ စွပ်စွဲထားပါတယ်။
ကာကွယ်သူဘက်ကတော့ Meta ဟာ Cambridge Analytica ရဲ့ လှည့်ဖြားမှုကို ခံခဲ့ရတာဖြစ်ပြီး လုံခြုံရေးစည်းမျဉ်းတွေကို လိုက်နာဖို့ အဆင့်ဆင့် လုပ်ဆောင်ခဲ့တယ်လို့ ချေပထားပါတယ်။
ဒီတရားစွဲဆိုမှုမှာ ဇူကာဘတ်ဟာ အရှုပ်တော်ပုံ မပေါ်ပေါက်ခင်ကတည်းက အရှုံးရှောင်ရှားဖို့ ကုမ္ပဏီရှယ်ယာတွေ ကြိုတင်ရောင်းချခဲ့ပြီး ဒေါ်လာ ၁ ဘီလီယံကျော် အမြတ်ထုတ်ခဲ့တယ်လို့လည်း စွပ်စွဲထားပါတယ်။ အဲဒီ စွပ်စွဲချက်ကိုတော့ ဇူကာဘတ်က ငြင်းဆိုထားပါတယ်။
တရားခွင်ဟာ ၈ ရက်ကြာမြင့်မယ်လို့ မျှော်လင့်ရပြီး Meta ရဲ့ ခေါင်းဆောင်အဖွဲ့ဟာ သုံးစွဲသူတွေရဲ့ ဒေတာတွေကို ကာကွယ်ပေးရမယ့် တာဝန်ကို တမင်တကာ ပျက်ကွက်ခဲ့ခြင်း ရှိမရှိ ဆိုတာအပေါ် အဓိကထား စစ်ဆေးသွားမှာ ဖြစ်ပါတယ်။ ကုမ္ပဏီရဲ့ ပြင်ပပုံရိပ်အတွက် လုံခြုံရေးဆိုင်ရာ စိုးရိမ်မှုတွေကလည်း အဓိကကျနေဆဲ ဖြစ်ပါတယ်။
Source – Reuters
ဓာတ်ပုံ – CNN