KNU ထံမှ သတင်းရယူခွင့်ပုံစံ ပြောင်းလဲ၊ ကြန့်ကြာမှုများရှိ
ကရင်အမျိုးသားအစည်းအရုံး(KNU)ထံမှ သတင်းမီဒီယာများ၏ သတင်းရယူခွင့်ပုံစံကို ယမန်နေ့ကစတင်၍ ပြောင်းလဲလိုက်သည်။
KNU ဗဟိုဌာနချုပ်မှ ၎င်းတို့၏ သတင်းထုတ်ပြန်ချက်များ၊ သဘောထားထုတ်ပြန်ချက်များနှင့်ပတ်သတ်၍ ပြောရေးဆိုခွင့်ရှိသူ(၂)ဦးကို တိုက်ရိုက်ဆက်သွယ်ခွင့်မပေးတော့ဘဲ ပြောရေးဆိုခွင့်ရှိသူများကို တစ်ဆင့်ခံဆက်သွယ်ရမည့်သူနှစ်ဦးထံမှတစ်ဆင့် ဆက်သွယ်မေးမြန်းရတော့မည်ဖြစ်သည်။
ယခုသတင်းအကြောင်းအရာနှင့်ပတ်သက်၍ CJ Platform သတင်းဌာနမှ ပြောရေးဆိုခွင့်ရှိသူများ၏ တစ်ဆင့်ခံပုဂ္ဂိုလ်များထံ နေ့လယ်ပိုင်းကတည်းက ဆက်သွယ်ခဲ့သော်လည်း ယခုသတင်းရေးသားချိန် ည ၇ နာရီအထိ အဖြေပြန်မရခဲ့ပေ။
ထို့ကြောင့် KNU ၏ ပြောရေးဆိုခွင့်ရှိသူ ပဒိုစောတောနီးထံ တိုက်ရိုက်ဆက်သွယ်မှသာ အဆက်အသွယ်ရခဲ့သည်။
ယခုထုတ်ပြန်ချက်နှင့်ပတ်သက်၍ နှောင့်နှေးမှုများရှိနေသည့်ကိစ္စနှင့်ပတ်သက်၍ ပဒိုစောတောနီးက
“အခိုက်အတန့်အားဖြင့်တော့ နှောင့်နှေးနိုင်ပါတယ်။ သို့သော်ရေရှည်အတွက် အကျိုးရှိပါလိမ့်လို့တော့ ယုံကြည်ပါတယ်။ အကောင်းဆုံးတော့ ကြိုးစားသွားပါ့မယ်။ ကျေးဇူးပါ” ဟု CJ Platform သို့ ပြန်လည်ဖြေကြားသည်။
K.N.U ၏ နိုဝင်ဘာလ (၆) ရက်ထုတ်ပြန်ချက်အတွင်း၌ ” K.N.U ၏ သဘောထားထုတ်ပြန်ချက်များဖြစ်စေ၊ သတင်းထုတ်ပြန်ချက်များဖြစ်စေ ပြောရေးဆိုခွင့်ရှိသူ(Spoke Person)အဖြစ် (၁)ပဒိုစောတောနီး(ဗဟိုအလုပ်အမှုဆောင်ကော်မတီ)၊ (၂) ပဒို စောကလယ်စေး(ဗဟိုအမြဲတမ်းကော်မတီ)တို့ကို တာဝန်ပေးအပ်သည်” ဟု ဖော်ပြထားသည်။
ထို့ပြင် သတင်းထုတ်ပြန်ချက်များနှင့် သဘောထားထုတ်ပြန်ချက်များအတွက် ပြောရေးဆိုခွင့်ရှိသူ (Spoke Person)များနှင့် ဆက်သွယ်ဆောင်ရွက်ပြောဆိုရန်အတွက် ဆက်သွယ်ရမည့်သူ(Contact Person)အဖြစ် စောနယ်ဒုဒါး(+66986879384) နှင့် နော်ဆိုဖီ (+66802280996)တို့ နှစ်ဦးကို တာဝန်ပေးအပ်ကြောင်း KNU က ထုတ်ပြန်ထားသည်။