KNLA တပ်ဖွဲ့တွေနဲ့အတူ မြို့သိမ်းတိုက်ပွဲ ဖော်ဆောင်နေတယ်လို့ NUG ရဲ့ အထူးတိုင်းစစ်ဌာန ထုတ်ပြန်
ကရင်အမျိုးသားလွတ်မြောက်ရေးတပ်မတော် (KNLA) တပ်ဖွဲ့တွေနဲ့အတူ စခန်းသိမ်းတိုက်ပွဲနဲ့ မြို့သိမ်းတိုက်ပွဲတွေ ဖော်ဆောင်နေတယ်လို့ အမျိုးသားညီညွတ်ရေးအစိုးရ (NUG) ရဲ့ ကာကွယ်ရေးဝန်ကြီးဌာနအောက်ကနေ အသစ်ဖွဲ့စည်းထားတဲ့ အထူးတိုင်းစစ်ဌာနက ဒီနေ့မှာ သတင်းထုတ်ပြန်ပါတယ်။
အထူးတိုင်းစစ်ဌာနဟာ KNLA တပ်ဖွဲ့တွေနဲ့အတူ ဖာပွန်မြို့သိမ်းတိုက်ပွဲ၊ အနန်းကွင်းဗျူဟာစခန်းသိမ်းတိုက်ပွဲနဲ့ ထိုင်း-မြန်မာနယ်စပ် စခန်းသိမ်းတိုက်ပွဲတွေကို ဖော်ဆောင်နေတာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
အထူးတိုင်းစစ်ဌာနကို ကရင်ပြည်နဲ့ မွန်ပြည်မှာ အခြေပြု ဖွဲ့စည်းထားပြီး ပြည်သူ့ကာကွယ်ရေးတပ်မတော် (PDF) နည်းဗျူဟာတွေ၊ တပ်ရင်း၊ တပ်ဖွဲ့တွေ၊ ဒရုန်းလက်ရုံးတပ်ဖွဲ့တွေ၊ ပြည်သူ့ကာကွယ်ရေးအဖွဲ့ (ပကဖ) တွေနဲ့ စုဖွဲ့ထားတဲ့ တိုင်းစစ်ဌာနတစ်ခုဖြစ်တယ်လို့ သိရပါတယ်။
စစ်ရေးလှုပ်ရှားမှုအနေနဲ့ KNU/KNLA တပ်တွေနဲ့အတူ ကရင်ပြည်၊ မွန်ပြည်နဲ့ ရေး-ထားဝယ်ဒေသတွေအပြင် ပဲခူးတိုင်းစစ်ဌာန၊ ရန်ကုန်တိုင်းစစ်ဌာနတို့နဲ့ပါ ပူးပေါင်းပြီး ပဲခူးတိုင်းထဲက နယ်မြေတချို့မှာ စစ်ရေးဖော်ဆောင်ကာ နယ်မြေစိုးမိုးရေးလုပ်ငန်းတွေ ဆောင်ရွက်နေတယ်လို့ ထုတ်ပြန်ချက်မှာ ဖော်ပြထားပါတယ်။
အခုနှစ် ဖေဖော်ဝါရီ ၁ ရက်နေ့မှာ မဲပလီဗျူဟာစခန်းကုန်းကို တိုက်ခိုက်သိမ်းပိုက်နိုင်ခဲ့ပြီး လှဂွန်းပျိုစခန်းက တပ်ရင်းမှူးအပါအဝင် အခြားအဆင့် တပ်သား ၁၆ ဦးကို လက်နက်တွေနဲ့ အလင်းဝင်လာအောင် စည်းရုံးနိုင်ခဲ့တယ်လို့ ဆိုပါတယ်။
ဒါ့အပြင် ပဲခူးတိုင်း၊ ရွှေကျင်မြို့နယ်မှာရှိတဲ့ ခမရ ၅၉၈ တပ်ရင်းဌာနချုပ်ကို တိုက်ခိုက်သိမ်းပိုက်နိုင်ခဲ့သလို ကရင်ပြည်၊ တနင်္သာရီတိုင်းနဲ့ ထိစပ်နေတဲ့ ထိုင်း-မြန်မာနယ်စပ်က စစ်တပ်အထိုင်စခန်းတွေကိုလည်း သိမ်းပိုက်နိုင်ခဲ့တယ်လို့ သိရပါတယ်။
အထူးတိုင်းစစ်ဌာန ဖွဲ့စည်းမှုကို အခုနှစ် ဇန်နဝါရီလကတည်းက စတင်ဖွဲ့စည်းခဲ့တာဖြစ်ပြီး NUG ရဲ့ ပြည်သူ့ကာကွယ်ရေးတပ်မတော် (PDF) စစ်ရုံးချုပ်က တိုက်ရိုက်ကွပ်ကဲနေတာ ဖြစ်ပါတယ်။
တိုင်းစစ်ဌာနချုပ်မှာ ပြည်သူ့ကာကွယ်ရေးတပ်မတော် (PDF) စုစုပေါင်း နည်းဗျူဟာ (၅) ခု၊ တိုင်းစစ်ဌာနကွပ်ကဲမှုအောက်က တပ်ရင်း (၁၁) ရင်းနဲ့ 1801 ဒရုန်းတပ်ရင်း၊ SDDF ဒရုန်းအထူးတပ်ဖွဲ့၊ ရောင်နီဒရုန်းအထူးတပ်ဖွဲ့ နှင့် Cloud Wings ဒရုန်းအထူးတပ်ဖွဲ့တွေ ပါဝင်တယ်လို့ သိရပါတယ်။
ဒါ့အပြင် မွန်ပြည်သူ့ကာကွယ်ရေးအဖွဲ့၊ ရန်ကုန်ပြည်သူ့ကာကွယ်ရေးအဖွဲ့၊ ပဲခူးခရိုင် ပြည်သူ့ကာကွယ်ရေးအဖွဲ့တွေလည်း တိုင်းစစ်ဌာနရဲ့ စစ်ဆင်ရေးကွပ်ကဲမှုအောက်မှာ ပူးပေါင်းဆောင်ရွက်နေတယ်လို့ ဆိုပါတယ်။
အထူးတိုင်းစစ်ဌာနချုပ်ဟာ ပြည်သူ့ကာကွယ်ရေးတပ်မတော် (PDF) စစ်ရုံးချုပ်ရဲ့ မဟာဗျူဟာ စစ်ရေးရည်မှန်းချက်တွေ၊ တိုင်းရင်းသားလက်နက်ကိုင်တပ်ဖွဲ့ (EROs) တွေရဲ့ စစ်ရေးရည်မှန်းချက်တွေနဲ့ အတူတကွ လက်တွဲဖော်ဆောင်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။
NUG မှာ လက်ရှိ တိုင်းစစ်ဒေသ (၃) ခု ရှိထားကာ တပ်ရင်းပေါင်း ၃၀၀ ခန့်အထိ စုဖွဲ့ထားပြီး စစ်ဒေသအသီးသီးက PDF တပ်ရင်းတွေမှာ တိုင်းရင်းသားတော်လှန်ရေးအဖွဲ့အစည်း (EROs) တွေနဲ့ ပူးပေါင်းလှုပ်ရှားနေကြပါတယ်။
ဓာတ်ပုံ – အထူးတိုင်းစစ်ဌာန