ဘုန်းကြီးတစ်ပါးက ၅ တန်းကျောင်းသူကို အကြိမ်ကြိမ် အဓမ္မပြုကျင့်၊ ကိုယ်ဝန် ၅ လကျော်ချိန် အတင်းဖြတ်ချခိုင်းလို့ ဆေးရုံရောက်
ဧရာဝတီတိုင်း၊ မြောင်းမြမြို့မှာ အသက် (၅၆) ရှိနေပြီဖြစ်တဲ့ ဘုန်းကြီးတစ်ပါးက ကျောင်းတိုက်အတွင်း လာရောက်မှီခိုနေထိုင်နေရသူ ၅ တန်းကျောင်းသူ ကလေးငယ်ကို အကြိမ်ကြိမ် အဓမ္မပြုကျင့်ခဲ့ပြီး ကိုယ်ဝန် ၅ လကျော်ချိန်မှ အတင်းဖြတ်ချခိုင်းလို့ ကလေးငယ်ဟာ ဆေးရုံမှာ တက်ရောက်ကုသနေရတယ်လို့ ဒေသခံတွေဆီက သိရပါတယ်။
မြောင်းမြမြို့၊ ဘုရားငုတ်တိုရှမ်းစုကျေးရွာရှိ ငွေဟင်္သာတောရကျောင်းမှ အသက် (၅၆) နှစ်၊ ဝါတော် (၁၅) ဝါရှိ ရဟန်းဘွဲ့ ဦးဥတ္တမ၊ လူအမည် ဦးအေးလွင်ဆိုသူ ဘုန်းကြီးတစ်ပါးက ကျောင်းတိုက်တွင် မှီခိုနေထိုင်နေရသူ ၅ တန်းကျောင်းသူကို အကြိမ်ကြိမ် အဓမ္မပြုကျင့်ခဲ့တာ ဖြစ်တယ်လို့ သိရပါတယ်။
“ကလေးမိသားစုက နာဂစ်ဒေသဘက်က၊ သူတို့မိသားစုက ဆင်းရဲလွန်းလို့ သမီးလေးနဲ့ သားကြီးကို ဘုန်းကြီးဆီမှာ အပ်ထားရတာ၊ ကလေးက ၅ တန်းဆိုပေမယ့် ကျောင်းထားတာ နောက်ကျခဲ့တာမို့ ၁၄ နှစ်ကျော်နေပြီ” လို့ အဲဒီအကြောင်း သိထားသူ ဒေသခံတစ်ဦးက ပြောပါတယ်။
ကလေးငယ်ကို အဓမ္မပြုကျင့်တယ်လို့ စွပ်စွဲခံရသူ ဘုန်းကြီးဟာ ကလေးငယ် ကိုယ်ဝန်ရှိလာချိန်တွင် တရားစခန်းပွဲများ သွားရောက်မည်ဟုဆိုကာ ကျေးရွာကနေ ကလေးငယ်နဲ့ မိသားစုကိုပါ ခေါ်ဆောင်သွားပြီး ချင်းကုန်းကျေးရွာရှိ အရပ်လက်သည်ကို ခေါ်ယူကာ ကိုယ်ဝန်ဖျက်ချစေခဲ့တာ ဖြစ်တယ်လို့ သိရပါတယ်။
အဲဒီဖြစ်စဉ်ကို ကလေးငယ် တက်ရောက်ပညာသင်ကြားနေတဲ့ စာသင်ကျောင်းမှ တာဝန်ရှိသူတွေနဲ့ ဒေသတွင်း ကလေးငယ်အခွင့်အရေးကာကွယ်ရေးအဖွဲ့တွေက သိရှိသွားချိန်မှာ မြောင်းမြရဲစခန်းသို့ သွားရောက်အမှုဖွင့်တိုင်ကြားခဲ့ပြီး ကလေးငယ်နဲ့ မိသားစုကို ပြန်လည်ခေါ်ယူနိုင်ရေးအတွက် ဆောင်ရွက်ခဲ့ချိန်မှ အဓမ္မပြုကျင့်တယ်လို့ စွပ်စွဲခံရသူ ဘုန်းကြီးဟာ ကလေးငယ်မိသားစုကို ပြန်ခေါ်လာပြီး ထွက်ပြေးတိမ်းရှောင်သွားခဲ့တာပဲ ဖြစ်ပါတယ်။
“စနေနေ့က အမှုဖွင့်လိုက်တယ်၊ ဘုန်းကြီးက သူ့ကားကို ထားခဲ့ပြီး ထွက်ပြေးသွားတယ်၊ ဒီကနေ့ (တနင်္လာ) မနက်ပိုင်းမှာတော့ ဖားအံမှာ သူ့ကို ဖမ်းမိပြီလို့ ကြားတယ်” လို့ အဲဒီအကြောင်း သိရှိထားသူက ပြောပါတယ်။
စွပ်စွဲခံရသူ ဦးဥတ္တမ ခေါ် ဦးအေးလွင်ဟာ ကလေးငယ်နဲ့ မိသားစုကို တရားစခန်းအကြောင်းပြကာ ခေါ်ဆောင်သွားချိန်မှာ ကလေးငယ်ရဲ့ ကိုယ်ဝန်ကို ဖျက်ချခဲ့တာကြောင့် လက်ရှိမှာ ကလေးငယ်ဟာ မြောင်းမြဆေးရုံမှာ တက်ရောက်ဆေးကုသနေရတယ်လို့ သိရပါတယ်။
စစ်အုပ်စုလက်အောက်ခံ ရဲတပ်ဖွဲ့ရဲ့ စစ်ဆေးချက်တွေအရ စွပ်စွဲခံရသူ ဦးဥတ္တမ ခေါ် ဦးအေးလွင်ဟာ အခု ၂၀၂၅ ခုနှစ် ဇွန်လခန့်မှ စတင်ကာ ဘုန်းကြီးကျောင်းအတွင်း အကြိမ်ကြိမ် သားမယားအဖြစ် ပြုကျင့်ခဲ့ခြင်းဖြစ်ပြီး ကလေးငယ်ကို မိဘတွေကို ပြန်မပြောရန်နှင့် အခြားသူများကို ပြန်မပြောရန် ခြိမ်းခြောက်ထားခဲ့တာဖြစ်တယ်လို့ သိရပါတယ်။
လက်ရှိမှာ စွပ်စွဲခံရသူ ဦးဥတ္တမ ခေါ် ဦးအေးလွင်ကို မြောင်းမြမြို့မရဲစခန်းက ပုဒ်မ ၃ ခုနဲ့ အမှုဖွင့်အရေးယူထားတယ်လို့ ဒေသခံတွေဆီက သိရပါတယ်။
ဒီသတင်းဟာ CJ Platform ရဲ့ Citizen Journalist တစ်ဦး ပေးပို့လာတဲ့ CJ Report သတင်းဖြစ်ပါတယ်။
CJ Platform ရဲ့ CJ Report ကဏ္ဍအတွက် သတင်းပေးပို့လိုပါက CJ Platform Facebook Page Messenger ကနေ ပေးပို့နိုင်ပါတယ်။
ပုံစာ – ကျူးလွန်သူလို့ စွပ်စွဲခံရသူ ဦးဥတ္တမ (ခေါ်) ဦးအေးလွင်ကို မြင်ရပုံ