လောက်ကိုင်တွင် ပိတ်မိ စစ်ကောင်စီတပ်သားများက အရပ်သားများကို ပစ်ခတ်၍ (၃)ဦးသေဆုံးပြီး တစ်ဦးဒဏ်ရာရဟု MNDAA ဆို
ရှမ်းပြည်(မြောက်ပိုင်း)၊ ကိုးကန့်ဒေသ၊ လောက်ကိုင်နယ်မြေအတွင်း ကိုးကန့်တပ်မတော်(MNDAA)၏ ပိတ်ဆို့ခြင်းခံထားရသော စစ်ကောင်စီတပ်သားများ ထွက်ပေါက်ရရှိရေးအတွက် ပြည်သူများကို ဦးတည်ပစ်ခတ်တိုက်ခိုက်မှုများ ပြုလုပ်ခဲ့သဖြင့် အရပ်သား(၃)ဦး သေဆုံးကာ (၁)ဦးဒဏ်ရာရရှိခဲ့ကြောင်း MNDAA က ထုတ်ပြန်သည်။
ပြီးခဲ့သည့် ဒီဇင်ဘာ (၁၀)ရက်နေ့ ညနေ(၃)နာရီခန့်တွင် လောက်ကိုင်ဒေသ ပေါက်ပေါက်ကျိုင့်ရွာအတွင်း စစ်ကောင်စီတပ်သားများ ထွက်ပေါက်ရရှိရေး လက်နက်ကြီးများကို အရပ်သားများနေထိုင်ရာ အိမ်များအတွင်းသို့ ပစ်ခတ်ခဲ့သဖြင့် အရပ်သားနှစ်ဦး လက်နက်ကြီးစထိမှန်၍ နေရာတွင် ပွဲချင်းပြီး သေဆုံးခဲ့ရပြီး အမျိုးသားတစ်ဦး လက်နက်ကြီးစထိမှန်၍ ဘယ်လက်မောင်းတွင် ပြင်းထန်ဒဏ်ရာရရှိခဲ့ကြောင်း MNDAA ၏ ထုတ်ပြန်ချက်တွင် ဖော်ပြသည်။
ဒဏ်ရာရ အမျိုးသားကို လောက်ကိုင် မီရှင့်ကုတ်ဒေသရှိ စစ်ကောင်စီလက်အောက်ခံဆေးရုံသို့ ပို့ဆောင်သော်လည်း ဆေးရုံမှ ကုသပေးရန် ငြင်းဆိုကာ မျက်ကွယ်ပြုခဲ့၍ ဒဏ်ရာအခြေအနေပိုဆိုးလာခဲ့ကြောင်း သိရသည်။
ထို့ကြောင့် ဒေသခံများက MNDAA သို့ ဆက်သွယ်အကူအညီတောင်းလာသည့်အတွက် MNDAA က အဆိုပါအမျိုးသားကို နောက်တန်းရှိ ဆေးရုံသို့ ဒီဇင်ဘာ ၁၁ ရက် နံနက်ပိုင်းတွင် သွားရောက်ခေါ်ယူပြီး ပို့ဆောင်ပေးခဲ့သည့်အတွက် ယခုအခါ ဒဏ်ရာအခြေအနေ ကောင်းမွန်သက်သာ လာပြီဖြစ်သည်ဟု MNDAA က ဆိုထားသည်။
အလားတူ ဒီဇင်ဘာ (၁၀)ရက် တစ်ရက်တည်းတွင်ပင် စစ်ကောင်စီတပ်သားများက ကိုးကန့်နယ်စပ်နေရာတစ်ခုဖြစ်သော ရန်လုံကျိုင့်နေရာကို လက်နက်ကြီးဖြင့် ပစ်ခတ်သဖြင့် (၃၁)နှစ်အရွယ် အမျိုးသားတစ်ဦး လက်နက်ကြီးစထိမှန် သေဆုံးခဲ့ကြောင်း MNDAA က ထုတ်ပြန်ချက်အတွင်း ဖော်ပြသည်။
ရှမ်းပြည်မြောက်ပိုင်းတွင် ညီနောင် သုံးဖွဲ့ ၏ “၁၀၂၇ စစ်ဆင်ရေး” ဖော်ဆောင်မှုကြောင့် စစ်ကောင်စီ တပ်စခန်းပေါင်း (၂၆၀) ကျော်နှင့်အတူ သံချပ်ကာ ကား(၈)စီး ၊ လက်နက်ခဲယမ်းအမြောက်အမြား ဆုံးရှုံးထားရသော စစ်ကောင်စီသည် ၎င်းတို့ ထွက်ပေါက်ရရှိရေးအတွက် ပြည်သူများအပေါ် ပစ်မှတ်ထားတိုက်ခိုက်မှုများ ဆက်တိုက်ကျူးလွန်လျက်ရှိနေသည်။