“လိုအပ်နေတဲ့ ကျည်ဆံတွေသာပေးပါ။ ရှေ့တန်းကနေ အသက်ပေးပြီး တိုက်ပွဲဝင်ပေးမယ့် ရဲဘော်‌တွေက အသင့်ပါ။”

---

“လိုအပ်နေတဲ့ ကျည်ဆံတွေသာပေးပါ။ ရှေ့တန်းကနေ အသက်ပေးပြီး တိုက်ပွဲဝင်ပေးမယ့် ရဲဘော်‌တွေက အသင့်ပါ။”

Union Liberation Front(ULF)တပ်ပေါင်းစု ပြန်ကြားရေးတာဝန်ခံ AT နှင့်ဆက်သွယ်မေးမြန်းမှု

CJ Platform

Union Liberation Front တပ်ပေါင်းစုအနေဖြင့် ၂၀၂၂ ခုနှစ် စက်တင်ဘာလ ၁၉ ရက်နေ့မှ ၂၀၂၃ ခုနှစ်သြဂုတ်လ ၃ ရက်အထိ စစ်ကောင်စီတပ်ဖွဲ့၀င်များနှင့် ထိတွေ့တိုက်ပွဲများ၊ မိုင်းခွဲ တိုက်ခိုက်မှုပေါင်း ၃၀ ကျော်ရှိခဲ့ပြီး စစ်ကောင်စီတပ်ဖွဲ့၀င် ၂၀၀ ကျော်ကို တိုက်ခိုက်ရှင်းလင်းနိုင်ခဲ့သည်။

ထို့ပြင် ယင်းမာပင်မြို့နယ်အတွင်း စည်သူသစ်ကွင်းတွင် သစ်ခိုးထုတ်နေသော စစ်ကောင်စီတပ်သားများနှင့် ULF တပ်ပေါင်းစုတို့အကြား ၂၀၂၃ သြဂုတ် ၆ ရက်မှစတင်ကာ ထိတွေ့တိုက်ပွဲများဖြစ်ပွားမှုမှာ ၂ လနီးပါးကြာမြင့်နေပြီ ဖြစ်သည်။

ယင်းကဲ့သို့ ထိတွေ့တိုက်ပွဲများ ပြင်းထန်လာသည်နှင့်အတူ ပြည်သူ့ကာကွယ်ရေးတပ်ဖွဲ့များအနေဖြင့် လက်နက်အင်အားနည်းသည့် ပြဿနာပေါ်ပေါက်လျက်ရှိကြောင်း ကာကွယ်တပ်ဖွဲ့များထံမှ ကြားသိလာရသည်။

ထိုအခြေအနေများနှင့်ပတ်သက်၍ ULF ပြန်ကြားရေးတာဝန်ခံ AT ထံသို့ CJ Platform သတင်းဌာနက ဆက်သွယ်မေးမြန်းထားချက်များကို ကောက်နုတ်ဖော်ပြအပ်ပါသည်။

CJ – ယခုလက်ရှိ ဆရာတို့အဖွဲ့မှာ ဘာတွေလိုအပ်နေပါသလဲ။

AT- ကျွန်တော်တို့အနေနဲ့ အခုအချိန်မှာ အဓိကလိုအပ်ချက်က ကျည်ဆံပဲဗျ။ စကစနဲ့ ယှဉ်တိုက်နိင်ဖို့ ကျည်ဆံလိုအပ်နေပါတယ်ဗျ။

CJ – တိုက်ပွဲတွင်း လက်နက်မမျှတမှု ကြုံရလား။ ကြုံရရင် ဘယ်လို မမျှတာမှုမျိုးတွေရှိခဲ့လဲဆိုတာလေး ပြောပြပေးပါဦး။

AT – တိုက်ပွဲမှာ လက်နက်မမျှတမှု ကြုံရလားဆိုရင် ကြုံရတာပေါ့ဗျာ။ လက်နက်ထက် အဓိကက ကျည်မမျှတတော့ စခဘက်က လက်နက်ခဲယမ်းရရှိရမယ့်အချိန်မှာ ကျည်ဆံမမျှတတော့ လိုသလောက် ခရီးမရောက်ဘူး ဖြစ်နေတယ်ဗျ။ ရှေ့တန်းက တိုက်ပွဲဝင်နေတဲ့ ရဲဘော်တွေကို တစ်ယောက်မှ ကျည်တစ်ရာဘဲ ပေးနိုင်တယ်ဗျာ။

မေး -NUG ဘက်က ထောက်ပံ့မှုကိုရော လက်ခံရရှိခဲ့လား။ မထောက်ပံ့ဘူးလား။ ထောက်ပံ့ပေမယ့် နည်းနေတာလား။

AT- NUG ၊ MOD ဘက်ကနေ ထောက်ပံ့မှုတော့ မရသေးပါဘူးဗျ။

မေး -ဆရာတို့ ယခုလိုလိုအပ်မှုတွေရှိနေရခြင်းက ပြည်သူတွေရဲ့ကူညီမှုလျော့လာလို့လား။

AT- ပြည်သူတွေကလည်း အခုအချိန်မှာ စီးပွားရေးအဆင်မပြေကြတာထက် ပြည်သူတွေကိုယ်တိုင်ကလည်း စကစရဲ့ စစ်ဘေးဒဏ်ကို အလူးအလဲခံနေရတာဆိုတော့ ပြည်သူတွေဘက်က ကူညီမှုတော့ နည်းသွားတာပေါ့ဗျာ။

မေး – ပြီးတော့ တိုက်ပွဲတွေမှာ ဆုံးရှုံးမှုတွေရှိနေခဲ့တာလား။

AT- တိုက်ပွဲတွေမှာ ဆုံးရှုံးမှု ရဲဘော်တွေ ကျဆုံးမှုတော့ ရှိတာပေါ့ဗျာ။ ကျွန်တော်တို့မှာ စကစနဲ့ ယှဥ်ရဲတာဆိုလို့ စိတ်ဓာတ်ပဲရှိတယ်ဗျ။

မေး – ဆရာတို့အနေနဲ့ရော လက်နက်လိုအပ်ချက်များနေလား။ လက်နက်ခဲယမ်းဝယ်ယူရေးအပိုင်းမှာ အဆင်ပြေမှုရှိရဲ့လား။ ယခုလက်ရှိမှာ လိုအပ်ချက်က ဘာတွေရှိနေလဲ။

AT- လက်နက်ခဲယမ်း ဝယ်ယူရေးအပိုင်းမှာ လွယ်ကူပါတယ်ဗျ။ ကျွန်တော်တို့အနေနဲ့ အခုအချိန်မှာ အဓိက လိုအပ်ချက်က ကျည်ဆံပဲ။ စကစနဲ့ ယှဥ်တိုက်နိုင်ဖို့ ကျည်ဆံလိုအပ်နေပါတယ်ဗျ။ ကျည်ဆံရှိမှ စကစကို ဒီထက်မက တိုက်နိုင်မှာဗျ။ လိုအပ်နေတဲ့ ကျည်ဆံတွေသာပေးပါ။ ရှေ့တန်းကနေ အသက်ပေးပြီး တိုက်ပွဲဝင်ပေးမယ့် ရဲဘော်‌တွေက အသင့်ပါ။

မေး- အဖွဲ့စည်းနဲ့ပတ်သက်ပြီး လတ်တလော ဘာတွေလုပ်ဆောင်ဖို့ရှိနေသေးလဲ။

AT- NUG ၊ MOD ကိုလည်း ကျွန်တော်တို့ စစ်ကြောင်းအနေနဲ့ တရားဝင်အသိအမှတ်ပြုပေးဖို့ ကျွန်တော်တို့အဖွဲ့ လုပ်ဆောင်နေပါတယ်ဗျ။ အဲဒီကိစ္စလုပ်ဆောင်ဖို့ ကျွန်တော်တို့အဖွဲ့မှာ စစ်ရေးတွေရှုပ်နေလို့ မလုပ်ဆောင်ရသေးတာဗျ။