ငါးဖမ်းလှေကို ဝင်တိုက်မိတဲ့ မော်တင်ဘုရားဖူး ရေယာဉ် လေးခွနဲ့ ပစ်ခတ်ခံရ
ဧရာဝတီတိုင်း၊ ပုသိမ်မြို့ကနေ ခမောက်မော်ကို ပြေးဆွဲနေတဲ့ မော်တင်စွန်းဘုရားဖူး ရွှေစင်ကြယ် ရေယာဉ်ကို ဖေဖော်ဝါရီ ၁၆ ရက်၊ ညပိုင်းမှာ လေးခွနဲ့ လိုက်လံ ပစ်ခတ်ခံခဲ့ရတယ်လို့ ဘုရားဖူးသွားရောက်သူတွေဆီက သိရပါတယ်။
ပုသိမ်ဆိပ်ကမ်းကနေ ထွက်ခွာပြီး မကြာမီ နတ်ကျွန်းကျေးရွာအနီးမှာ ငါးဖမ်းလှေ ၄ စင်းက လေးခွနဲ့ လိုက်လံ ပစ်ခတ်ခဲ့တာ ဖြစ်တယ်လို့ သိရပါတယ်။
ရွှေစင်ကြယ်ရေယာဉ်ဟာ နတ်ကျွန်းကျေးရွာအနီးမှာ ငါးပိုက်ထောင်နေကြတဲ့ လှေ ၄ စင်းကို ဝင်တိုက်မိရာကနေ ငါးဖမ်းလှေတွေက လေးခွနဲ့ လိုက်လံပစ်ခတ်ခဲ့တာ ဖြစ်တယ်လို့ ခရီးသွားတွေက ပြောပါတယ်။
“ခရီးသည်တွေကို မပစ်ပါဘူး၊ သင်္ဘောကို ပစ်တာ။ ရဲလိုက်ဖမ်းတာ မိတယ်ပြောတယ်။ ငါးဖမ်းလှေကို ဝင်တိုက်မိတာကို မကျေနပ်လို့ လိုက်ပစ်တာ” လို့ ခရီးသွားတစ်ဦးက ပြောပါတယ်။
မော်တင်စွန်းဘုရားပွဲကို ဖေဖော်ဝါရီ ၁၆ ရက်မှာ စတင်ဖွင့်လှစ်ခဲ့ပြီး မတ် ၂ ရက်အထိ ကျင်းပသွားမယ်လို့ သိရပါတယ်။
ဓာတ်ပုံ – လူမှုကွန်ရက်
ပုံစာ – ရွှေစင်ကြယ် မော်တင်စွန်းဘုရားဖူးရေယာဉ်တစ်စင်းကို တွေ့ရစဉ်။