မိုးကုတ်မြို့ထဲ စစ်အုပ်စုတပ်ဖွဲ့တွေ ဝင်ရောက်လာနေပြီလို့ MDY PDF ပြော
မန္တလေးတိုင်း မိုးကုတ်မြို့ထဲကို စစ်အုပ်စုတပ်ဖွဲ့ဝင်တွေ ဝင်ရောက်လာနေပြီဖြစ်တယ်လို့ မန္တလေး ပြည်သူ့ကာကွယ်ရေးတပ်မတော် (MDY PDF) ပြောရေးဆိုခွင့်ရှိသူ ကိုအော်စမွန်က CJ Platform ကို အတည်ပြုပြောပါတယ်။
“၂၈ ရက်နေ့က မိုးကုတ်ကို စစ်အုပ်စုတပ်တွေ ဝင်ပြီဆိုတာတော့ အတည်ပြုပါတယ်။ အင်အားတော့ စိစစ်ဆဲပါ” လို့ ကိုအော်စမွန်က ပြောပါတယ်။
တအာင်းတပ်မတော် (TNLA) ရဲ့ မဟာမိတ် ရှမ်းမြောက်တပ်ဖွဲ့တစ်ခုကလည်း မိုးကုတ်မြို့ထဲကို စစ်အုပ်စု ဝင်လာတဲ့ပတ်သက်ပြီး စစ်အုပ်စုတပ်ဖွဲ့တွေနဲ့ အုပ်ချုပ်ရေးပိုင်း တာဝန်ရှိသူတွေကို ပြန်လည် ဝင်ရောက်လာတာကို အတည်ပြုထားပါတယ်။
မိုးကုတ်မြို့ထဲကို စစ်အုပ်စုတပ်ဖွဲ့တွေ မဝင်ရောက်မီ အစောပိုင်းရက်တွေကတည်းက ဒေသခံအများစုဟာ မြို့ကနေ နေရပ်စွန့်ခွာ တိမ်းရှောင်လာကြတယ်လို့ မိုးကုတ်ကနေ နေရပ်စွန့်ခွာ တိမ်းရှောင်လာတဲ့ ဒေသခံတွေဆီက သိရပါတယ်။
“မန္တလေး–မိုးကုတ် လမ်းမကြီးဘက်မှာဆို ဘယ်သူမှ မရှိတော့ဘူး။ ကျပ်ပြင်နာရီစင်နားက ပုံမှန်ဆို ဆိုင်တန်းတွေရှိလို့ အမြဲ စည်ကားနေတာ အခုက ဘာမှ မရှိတော့တာ။ ဒေသခံ ၉၀ ရာခိုင်နှုန်းနီးပါးလောက်က အညာဘက် တော့၊ ရန်ကုန်ဘက် တော့၊ တခြားဒေသတွေကို ထွက်သွားကြတာ” လို့ မိုးကုတ်ကနေ နေရပ်စွန့်ခွာလာသူတစ်ဦးက CJ Platform ကို ပြောပါတယ်။
မိုးကုတ်နဲ့ ရှမ်းမြောက် မိုးမိတ်တို့ထဲကို စစ်အုပ်စုတပ်တွေ ဝင်ရောက်လာတဲ့အခြေအနေနဲ့ ပတ်သက်ပြီး TNLA ပြောရေးဆိုခွင့်ရှိသူ လွေးယေဦးကို CJ Platform က ဆက်သွယ်မေးမြန်းထားဆဲ ဖြစ်ပါတယ်။
မိုးကုတ်မြို့ထဲကို စစ်အုပ်စုတပ်ဖွဲ့တွေ ဝင်ရောက်မလာမီ စစ်အုပ်စုလက်အောက်ခံ အုပ်ချုပ်ရေးအဖွဲ့တွေ အခု နိုဝင်ဘာ လလယ်ပိုင်းကတည်းက ဝင်ရောက်လာမှုတွေရှိနေပြီး TNLA ထံကနေ အုပ်ချုပ်ရေးပိုင်းဆိုင်ရာ ကိစ္စရပ်တွေကို လွှဲပြောင်း လက်ခံရယူမှုတွေလည်း ရှိခဲ့တယ်လို့ မိုးကုတ်ကနေ နေရပ်တိမ်းရှောင်လာတဲ့ အခြား ဒေသခံတစ်ဦးကလည်း ပြောပါတယ်။
TNLA ထိန်းချုပ်ထားတဲ့ မြို့တွေထဲက နောင်ချို၊ ကျောက်မဲနဲ့ သီပေါတို့ကို စစ်အုပ်စုက ပြန်လည်ရယူခဲ့ပြီးနောက် မိုးကုတ်နဲ့ မိုးမိတ်တို့ကို တရုတ်ရဲ့ ကြားဝင်မှုနဲ့အတူ စစ်အုပ်စုက ပြန်လည် ရရှိခဲ့တာ ဖြစ်ပါတယ်။ ဒါကြောင့် ၁၀၂၇ စစ်ဆင်ရေးအတွင်း TNLA သိမ်းယူခဲ့တဲ့ မြို့တွေထဲက ၅ မြို့ကို ပြန်လည် လက်လွှတ်ခဲ့ရသလို ကွတ်ခိုင်၊ နမ့်ဆန်၊ နမ့်ခမ်း၊ မန်တုံ၊ နမ္မတူ၊ မိုင်းငေါ့၊ မိုင်းလုံတို့ကိုသာ TNLA က ဆက်လက် ထိန်းချုပ်ထားနိုင်ခဲ့ပါတယ်။
ဓာတ်ပုံ – Pro-SAC