ဂျာမနီမှာ ကျင်းပတဲ့ လုံခြုံရေးညီလာခံကို NUG နိုင်ငံခြားရေးဝန်ကြီး တက်ရောက်
ဂျာမနီနိုင်ငံ၊ မြူးနစ်မြို့မှာ မနေ့က ကျင်းပတဲ့ လုံခြုံရေးညီလာခံကို အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်တက်ရောက်ပြီး ဆွေးနွေးပွဲမှာ ပါဝင်ဆွေးနွေးခဲ့တယ်လို့ NUG နိုင်ငံခြားရေးဝန်ကြီးဌာနရဲ့ ထုတ်ပြန်ချက်အရ သိရပါတယ်။
အဲဒီညီလာခံမှာ ကမ္ဘာတဝန်းဒီမိုကရေစီဦးတည်ရာများ ( Global Democracy Trends) ဆွေးနွေးပွဲကို နိုင်ငံခြားရေးဝန်ကြီး က ပါဝင်ဆွေးနွေးခဲ့တာဖြစ်တယ်လို့ ဆိုပါတယ်။
“ ပထဝီအနေအထားအရ မြန်မာနိုင်ငံဟာ ဒီမိုကရေစီကို သိပ်အားမပေးတဲ့နိုင်ငံတွေကြားမှာရှိနေပါတယ်။ မြန်မာနိုင်ငံ လွတ်လပ်မှုနဲ့ ဒီမိုကရေစီရေးကို အားပေးမယ့် မဟာမိတ်တွေ၊ မိတ်ဆွေတွေ လိုအပ်တဲ့အတွက် ဒီနေ့ မြူးနစ် လုံခြုံရေးညီလာခံကို တက်ရောက်တာဖြစ်တယ်” လို့ ဝန်ကြီး ဒေါ်ဇင်မာအောင်က ဆွေးနွေးပြောကြားခဲ့ပါတယ်။
လုံခြုံရေးညီလာခံရဲ့ ကမ္ဘာတဝန်းဒီမိုကရေစီဦးတည်ရာများ ( Global Democracy Trends) ဆွေးနွေးပွဲမှာ နိုင်ငံခြားရေးဝန်ကြီး ဒေါ်ဇင်မာအောင်နဲ့အတူ အမေရိကန် အထက်လွှတ်တော်အမတ် Senator Christopher A.Coons၊ ဂါနာ လွှတ်တော်အမတ် Zanetor Agyeman-Rawlings၊ ပိုလန် လွှတ်တော်အမတ်Aleksandra Uznańska-Wiśniewska တို့ ပါဝင် ဆွေးနွေးခဲ့ကြတယ်လို့ သိရပါတယ်။