နိုဝင်ဘာလ ၁၉ ရက်၊ အင်္ဂါနေ့အတွက် မိုးလေဝသခန့်မှန်းချက်
တောင်တရုတ်ပင်လယ်ပြင်မှာဖြစ်ပေါ်နေတဲ့ မန်ရီမုန်တိုင်းအားလျော့သွားပြီဖြစ်ပါတယ်။
မန်ရီဟာ တိုင်ဖွန်းမုန်တိုင်းအနေနဲ့ တောင်တရုတ်ပင်လယ်ရဲ့ အနောက်ဘက်ကိုရွေ့လျားခဲ့ပြီးနောက် အားကောင်းတဲ့အပူပိုင်းမုန်တိုင်းအဆင့်ကို အားလျော့သွားခဲ့တာဖြစ်ပြီး မနက်ဖြန် နိုဝင်ဘာ ၂၀ ရက်နေ့ မနက်ပိုင်းမှာ ဟိုင်နန်ကျွန်းအနီးကိုရောက်ရှိနိုင်တယ်လို့ စစ်ကောင်စီမိုးဇလက ခန့်မှန်းထားပါတယ်။
ဘင်္ဂလားပင်လယ်အော်မြောက်ပိုင်းမှာတော့ တိမ်အနည်းငယ်ဖြစ်ထွန်းနေပြီး ကပ္ပလီပင်လယ်ပြင်နဲ့ ကျန်ဘင်္ဂလားပင်လယ်အော်တို့မှာ တိမ်အသင့်အတင့်ကနေ တိမ်ထူထပ်နေတယ်လို့ သိရပါတယ်။