စစ်အာဏာရှင်စနစ် သက်ဆိုးရှည်ရေး ပွဲစားဆန်ဆန် လုပ်ဆောင်မှု အလိုမရှိ
နွေဦးတော်လှန်ရေး အောင်ပွဲနီးကပ်လာချိန်တွင် စေ့စပ်ညှိနှိုင်းရေး အကြောင်းပြကာ တော်လှန်ရေး အရှိန်လျော့ကျသွားစေမည့် စစ်အာဏာရှင်စနစ် သက်ဆိုးရှည်ရေး ပွဲစားဆန်ဆန် လုပ်ဆောင်လာမှုများကို အလိုမရှိကြောင်း ဆားလင်းကြီး ကျေးရွာပေါင်းစုံ လူထုသပိတ်တိုက်ပွဲကော်မတီက ဆန္ဒထုတ်ဖော်ခဲ့ကြတယ်လို့ အထွေထွေသပိတ် ပေါင်းစပ်ညှိနှိုင်းရေးအင်အားစု GSCBက ဒီကနေ့ ဩဂုတ် ၃ရက်နေ့မှာ ဖော်ပြလာပါတယ်။
ပုသိမ်-မုံရွာလမ်း မြောက်ယမားတံတားပေါ်မှာ “ပြည်သူ့တော်လှန်ရေး ဘယ်ပွဲစားမှ ကြေးဖြတ်ခွင့်မရှိ”ဆိုတဲ့ ကြွေးကြော်သံပါ စာသားကို ကိုင်ဆောင်ခဲ့ပြီး ဆန္ဒထုတ်ဖော်ခဲ့ကြတာပါ။
“ကျနော်တို့ရဲ့ ပြည်သူ့တော်လှန်ရေးကြီး ဘယ်သူတဦးတယောက်သာမက ဘယ်အဖွဲ့အစည်း၊ဘယ်နိုင်ငံက ဟန့်တားပိတ်ဆို့ ဆောင်ရွက်လာမှုကိုမှပြည်သူလူထု တရပ်လုံးအနေနဲ့ ငြိမ်ခံနေမှာ မဟုတ်ပါဘူး ။ တော်လှန်ရေး (၃) နှစ်ကျော်ကာလအတွင်း အောင်ပွဲနဲ့အတူ အထွေထွေ အကြပ်အတည်းနဲ့ပိုမို ရင်ဆိုင်လာနေကြရပြီ ဖြစ်ပါတယ်။ ထိုအကြပ်အတည်းများသည်လည်း စစ်အာဏာရှင်တို့ရဲ့ ဆိုးညစ်ယုတ်မာမှုတွေသာ ဖြစ်ပါတယ်။ ဒါကြောင့် ဆိုးညစ်ယုတ်မာမှုတွေ အဆုံးသတ်ရေးဟာ တော်လှန်ရေးမှတပါး အခြားမရှိ ဖြစ်ပါတယ်”လို့ GSCB က ဖော်ပြထားပါတယ်။
အောင်ပွဲတွေနဲ့အတူတူ တော်လှန်ရေးအရှိန် အားကောင်းနေချိန်မှာ အဖွဲ့အစည်းအချို့ ၊ လူပုဂ္ဂိုလ်အချို့၊ နိုင်ငံတကာအစိုးရတွေအနေနဲ့ စေ့စပ်ညှိနှိုင်းရေး လမ်းကြောင်း အကြောင်းပြုပြီး တော်လှန်ရေး အရှိန်ကို ယုတ်လျော့စေအောင် လုပ်ဆောင်နေတယ်လို့လည်း GSCB က ထည့်သွင်း ဖော်ပြထားပါတယ်။
ဓာတ်ပုံ – GSCB Facebook