ချင်း၊ ကချင်၊ ရှမ်း ဘာသာစကားများ Google Translate မှာ စသုံးနိုင်ပြီ
မြန်မာနိုင်ငံက ဘာသာစကားတွေဖြစ်တဲ့ ချင်း၊ ကချင်၊ ရှမ်း ဘာသာစကားများကို Google ရဲ့ ဘာသာစကား ဖလှယ်ဘာသာပြန်လို့ရတဲ့ Google Translate မှာ စတင်အသုံးပြုနိုင်ပြီဖြစ်တယ်လို့ Google ရဲ့ ထုတ်ပြန်ချက်အရ သိရပါတယ်။
ချင်းဘာသာစကားထဲက ဟားခါးချင်းဘာသာစကား၊ ကချင် (ဂျိန်းဖောဘာသာစကား)နဲ့ ရှမ်း ဘာသာစကားတို့ဟာ Google ကနေ အသစ်ထည့်သွင်းလိုက်တဲ့ ဘာသာစကား ၁၀ဝ ကျော်ထဲမှာ ပါဝင်ခဲ့တာလည်းဖြစ်ပါတယ်။
အဲဒီဘာသာစကားတွေကို Google Translate မှာဆိုရင် Hakha Chin၊ Jingpo နဲ့ Shan လို့ ရိုက်ရှာပြီး အသုံးပြုနိုင်ပါတယ်။
ဒါပေမဲ့ CJ Platform က စမ်းသပ်သုံးစွဲကြည့်တဲ့အခါမှာတော့ ဘာသာစကားနာမည်နဲ့ ရိုက်ရှာလို့ရနိုင်တာက Website မှာသာ ရှာတွေ့နိုင်ပြီး Google Translate Mobile Apps မှာတော့ ဘာသာစကားနာမည်ကို ရိုက်ရှာလို့ မတွေ့သေးပါဘူး။
Mobile Apps မှာ အသုံးပြုလိုပါက ဘာသာစကားနာမည်ကို ဦးစွာရွေးထားဖို့မလိုဘဲ Detect Language ကနေ ဟားခါးချင်း၊ ဂျိန်းဖောနဲ့ ရှမ်းဘာသာစကားတွေ ရိုက်ထည့် ဘာသာပြန်နိုင်တာတွေ့ရပါတယ်။
Google Translate မှာ ပြီးခဲ့တဲ့ ၂၀၂၂ ခုနှစ်တုန်းက ဇိုမီးချင်း ဘာသာစကားကိုလည်း ထည့်သွင်းခဲ့ပါတယ်။
ဒါကြောင့် လက်ရှိမှာ မြန်မာနိုင်ငံမှာ အသုံးပြုတဲ့ဘာသာစကားတွေဖြစ်တဲ့ မြန်မာ၊ ချင်း (ဇိုမီး၊ ဟားခါး)၊ ကချင် (ဂျိန်းဖော)၊ ရှမ်း စတဲ့ ဘာသာစကားတွေကို Google Translate မှာ အသုံးပြုနိုင်ပြီဖြစ်ပါတယ်။ ဒါပေမဲ့ မြန်မာဘာသာစကားကလွဲလို့ တခြားဘာသာစကားတွေကတော့ Text-to-voice လို့ခေါ်တဲ့ စာတွေကို အသံထွက်ဖတ်ပြပေးတဲ့ ဝန်ဆောင်မှုတော့ မရနိုင်သေးပါဘူး။
Google က ပြီးခဲ့တဲ့ရက်ပိုင်းအတွင်း Google Translate မှာ ဘာသာစကားပေါင်း ၁၀ဝ ကျော်ထပ်မံထည့်သွင်းခဲ့တာကြောင့် စုစုပေါင်း ဘာသာစကား ၂၄၃ မျိုး ရှိလာပြီဖြစ်ပါတယ်။
ပုံစာ – ဂျိန်းဖော(ကချင်)ဘာသာစကားဖြင့် CJ Platform က စမ်းသပ်ဘာသာပြန်ထားတာကိုတွေ့ရစဉ်