“ဒီတစ်ပတ် ကမ္ဘာကြီး ဘာထူးလဲ” (ဇွန် ၃၀ ရက်မှ ဇူလိုင် ၆ ရက်အထိ)
ဒီတစ်ပတ်(ဇူလိုင် ၁ ရက်မှ ၇ ရက်အထိ)အတွင်း အာရုံစိုက်ခဲ့ကြတာကတော့ ဗြိတိန်ရဲ့ အထွေထွေရွေးကောက်ပွဲ၊ အမေရိကန်ရဲ့ ၂၄၈ နှစ်မြောက် လွတ်လပ်ရေးနေ့၊ တာလီဘန်တွေရဲ့ ပထမဆုံးနိုင်ငံတကာဆွေးနွေးပွဲရလဒ်၊ မိုဒီရဲ့ ရုရှားခရီးစဉ်သတင်းတွေပဲဖြစ်ပါတယ်။ အားကစားသတင်းတွေဘက်မှာဆိုရင်လည်း ပြိုင်ပွဲအရှိန်မြင့်လာတဲ့ ယူရိုနဲ့ ကိုပါအမေရိက ၂၀၂၄ ပြိုင်ပွဲသတင်းတွေကို CJ Platform ရဲ့ နိုင်ငံတကာသတင်းအနှစ်ချုပ်အဖြစ် ကောက်နုတ်ဖော်ပြအပ်ပါတယ်။
****************************************
“ကွန်ဆာဗေးတစ်တို့ရဲ့ နေဝင်ချိန်၊ လေဘာပါတီရဲ့ နေထွက်ချိန်”
ဒီတစ်ပတ်ရဲ့ နိုင်ငံတကာသတင်းတွေထဲ အထူးခြားဆုံးနဲ့ ကမ္ဘာ့လူထု စိတ်ဝင်စားခဲ့တာကတော့ ဗြိတိန်ရဲ့ ဇူလိုင် ၄ ရက် ကြာသာပတေးနေ့က ကျင်းပခဲ့တဲ့ အထွေထွေရွေးကောက်ပွဲကိုပဲဖြစ်ပါတယ်။
ကွန်ဆာဗေးတစ်တို့ရဲ့ ဝန်ကြီးချုပ် ရီရှီ ဆူးနက်က လျှပ်တပြက် ရွေးကောက်ပွဲ ကျင်းပဖို့ ခေါ်ယူခဲ့တာပါ။
အထူးခြားဆုံးကတော့ လက်ရှိအာဏာရပါတီ အရှက်တကွဲရှုံးနိမ့်ခဲ့ပြီး အတိုက်အခံပါတီက သောင်ပြိုကမ်းပြိုနိုင်ခဲ့တာပါပဲ။
ဗြိတိန်မှာ ကွန်ဆာဗေးတစ်ပါတီက အုပ်စိုးထားခဲ့တာ လွန်ခဲ့တဲ့ ၂၀၁၀ ခုနှစ် ၁၄ နှစ်ကာလဟာ မနေ့ကပဲ အဆုံးသတ်သွားခဲ့ရပါတယ်။ နှစ်ရှည်အတိုက်အခံပါတီအဖြစ်ကနေ လေဘာပါတီတို့ ခေါင်းပြူနေရာကနေ တစ်ကိုယ်လုံး ထွက်ပေါ်လာနိုင်ခဲ့ပါပြီ။
ဇူလိုင် ၅ ရက် သောကြာနေ့ ညပိုင်းအထိမဲရလဒ်တွေထဲ လေဘာပါတီက လွှတ်တော်အမတ်နေရာ ၄၁၂ ခုမှာ ၁၇၄ နေရာအထိ အနိုင်ရရှိထားပါတယ်။ ကွန်ဆာဗေးတစ်တွေဘက်ကတော့ ၁၂၂ နေရာပဲရပါတယ်။ ဒါဟာ ကွန်ဆာဗေးတစ်တွေအတွက် ၁၉၂၃ ခုနှစ် လွန်ခဲ့တဲ့ နှစ်ပေါင်း ၁၀၀ ကျော်က အမတ်နေရာ ၇၁ နေရာရပြီးနောက်ပိုင်း အဆိုးရွားဆုံးရှုံးနိမ့်မှုတစ်ခုဖြစ်ခဲ့ပါတယ်။
ဒါကြောင့် ကွန်ဆာဗေးတစ်တို့ ဒေါင်းနင်းလမ်း အမှတ် ၁၀ ကနေ ကျောခိုင်းသွားခဲ့ရပါတယ်။
ဝန်ကြီးချုပ် မစ္စတာ ဆူးနက်ကလည်း အရှုံးကိုတာဝန်ယူမယ်လို့ပြောထားတဲ့အတိုင်း ကွန်ဆာဗေးတစ်ပါတီခေါင်းဆောင်နေရာကနေ နုတ်ထွက်သွားခဲ့ပါတယ်။
သူ့နေရာ တခြားတစ်ယောက်အစားထိုးဖို့ လုပ်ဆောင်မယ်လို့ ပြောသွားခဲ့ပါတယ်။
ရီရှီ ဆူးနက်ဟာ နုတ်ထွက်ပြီးနောက် မိန့်ခွန်းပြောခဲ့သလို ဘုရင်ကြီးနဲ့ သွားရောက်တွေ့ဆုံ နှုတ်ဆက်ခဲ့ပါသေးတယ်။
ဝန်ကြီးချုပ်သစ် လေဘာပါတီခေါင်းဆောင် ကီယာ စတာမာဟာ သောကြာနေ့မှာပဲ သူ့ရဲ့ပထမဆုံး မိန့်ခွန်းကို ဒေါင်းနင်းလမ်းနေအိမ်ရှေ့ကနေ ပြောခဲ့ပါတယ်။
အဲဒီမှာ အာရှနွယ်ဖွား မစ္စတာ ဆူးနက်ကို ချီးကျူးစကားဆိုခဲ့ပါတယ်။
“လေဘာပါတီအစိုးရဟာ နိုင်ငံအတွက် အပြောင်းအလဲတွေကို အခုချက်ချင်းပဲ စလုပ်ပါပြီ။ အဲဒီအပြောင်းအလဲတွေဆိုတာ ခလုတ်တစ်ချက် ဖွင့်ပိတ်ရသလို လွယ်မှာတော့မဟုတ်ပါဘူး” လို့ သတိပေးသွားပါတယ်။
“လေဘာပါတီကို မဲပေးသူဖြစ်ဖြစ်၊ မပေးသူဖြစ်ဖြစ် အထူးသဖြင့် မဲပေးသူတွေအတွက် တာဝန်ထမ်းဆောင်မယ်” လို့ ပြောပါတယ်။
နောက်ပြီး “နိုင်ငံက ပထမ၊ ပါတီက ဒုတိယ” လို့ ကီယာစတားမားက ပြောသွားပါတယ်။
သောကြာနေ့မှာပဲ ဒေါင်းနင်းလမ်း အမှတ် ၁၀ အိမ်တော်ကနေ ရီရှီ ဆူးနက်အပါအဝင် ကွန်ဆာဗေးတစ်ပါတီက တာဝန်ယူထားသူတွေ အသီးသီး ထွက်ခွာခဲ့ကြပါတယ်။
ဝန်ကြီးချုပ်သစ် ကီယာစတားမားကတော့ သူ့ရဲ့ အစိုးရအဖွဲ့သစ်ကို ဘုရင်ရဲ့ဖိတ်ခေါ်ချက်နဲ့ ဖွဲ့မယ်လို့ ပြောခဲ့ပါတယ်။
ဗြိတိန်ရဲ့ဝန်ကြီးချုပ်သစ်ကို ယူကရိန်းသမ္မတ၊ ပြင်သစ် သမ္မတအပါအဝင် ကမ္ဘာ့နိုင်ငံအကြီးအကဲတွေက ဂုဏ်ပြုစကားဆိုခဲ့ကြပါတယ်။
****************************************
“ချို(ဂျို)ကုတ်ရှိရာ ချိုကုတ်သွား”
မြန်မာစကားပုံမှာတော့ ချို(ဂျို)ကုတ်ရှိရာ ချိုထောင်မလာဖြစ်ပါတယ်။ ဒါကြောင့် ချိုကုတ်ရှိရာ ချိုကုတ်သွားတဲ့ သဘောသက်ရောက်နေပါတယ်။
ချိုကုတ်ရှိရာကို ဘယ်ချိုထောင်မှ မလာပါဘူး။ လာခဲ့ရင်လည်း သူလည်း နည်းနည်းတော့ ကုတ်နေလိုပါပဲ။ ဒီလိုဘဲ လူမိုက်ရှိတဲ့အရပ်ကို ဘယ်လူလိမ္မာမှ မလာကြဘူး။ လာခဲ့မယ်ဆိုရင် သူလည်း နည်းနည်းလေး မိုက်ချင်နေလို့ပါလို့ အဓိပ္ပာယ်ဆောင်ပါတယ်။ တူရာတူရာ စုကြတဲ့သဘောပဲ ဖြစ်ပါတယ်။
အိန္ဒိယဝန်ကြီးချုပ်က ရုရှားသွားမယ်လို့ ဆိုလာပါတယ်။ ရုရှား သမ္မတ ဗလာဒီမာ ပူတင်ကို အားလုံးက ဝိုင်းဖယ်ကျဉ်နေကြချိန် နရန်ဒရာ မိုဒီဟာ လာမယ့် တနင်္လာနေ့ ဇူလိုင် ၈ ရက်မှာ ရုရှားနိုင်ငံကို နှစ်ရက် ခရီးစဉ်လာရောက်မယ်လို့ ရုရှားအစိုးရဘက်က အတည်ပြုချက်ထုတ်ပြန်ပါတယ်။
အိန္ဒိယဟာလည်း အရင်ကတည်းက ကောက်နေတဲ့ ချိုတစ်ခုရှိခဲ့ပုံပါ။
အဘယ့်ကြောင့်ဆိုသော် စစ်အေးခေတ်ကာလကတည်းက ရုရှားနဲ့ အိန္ဒိယ ဆက်ဆံရေးက ခိုင်မာခဲ့လို့ပါ။ အားလုံးက ကန့်ကွက်ခဲ့တဲ့ ၂၀၂၂ ယူကရိန်းကို ရုရှား ကျူးကျော်စစ် စတင်ချိန်ကစပြီး အိန္ဒိယဟာ ရုရှားအတွက် အဓိကကုန်သွယ်ဘက် အဖြစ်နေရာဝင်ယူခဲ့ပြန်ပါတယ်။
အမေရိကန်နဲ့ မဟာမိတ်တွေက ရုရှားကို ဝိုင်းကျဉ်ထားကြချိန် မြောက်ကိုရီးယား၊ တရုတ်နဲ့ ဗီယက်နမ်တို့လို အိန္ဒိယကလည်း ရုရှားဝင်ရပ်တဲ့သဘော မိုဒီရဲ့ နှစ်ရက်တာ ခရီးစဉ် ပေါ်ထွက်လာခဲ့ပါတယ်။
ရုရှားပို့ကုန်တွေ အနောက်နိုင်ငံ ဈေးကွက်မဝင်နိုင်အောင် ဒဏ်ခတ်ပိတ်ဆို့မှုတွေ လုပ်လာတဲ့နောက်ပိုင်း ရုရှားရဲ့ရေနံ သဘာဝဓာတ်ငွေ့တွေ အဓိကဝယ်ယူသူက တရုတ်နဲ့ အိန္ဒိယ ဖြစ်လာခဲ့ပါတယ်။
ကာဇက်စတန် မြို့တော် Astana မှာ ကျင်းပတဲ့ ဒီနှစ်ပတ်လည် အစည်းဝေးမှာ ရုရှား သမ္မတ ဗလာဒီမာပူတင်နဲ့ တရုတ် သမ္မတ ရှီကျင့်ပင်တို့ ကိုယ်တိုင်တက်ရောက်ခဲ့ပြီး တွေ့ဆုံဆွေးနွေးခဲ့ကြပါတယ်။
****************************************
“အကြမ်းဖက်အဖွဲ့ကနေ အစိုးရဖြစ်လာပြီးနောက် ပထမဆုံးနိုင်ငံတကာဆွေးနွေးပွဲတက်လာတဲ့ တာလီဘန်များ”
အာဖဂန် နစ္စတန်က တာလီဘန်တွေကို အမေရိကန်ပြည်ထောင်စုအပါအဝင် နိုင်ငံအများက အကြမ်းဖက်အဖွဲ့လို့ သတ်မှတ်ခဲ့ကြတာပါ။ သူတို့ဟာ လွန်ခဲ့တဲ့ ၂၀၂၁ ခုနှစ်က အမေရိကန်နဲ့ မဟာမိတ်တပ်တွေ အာဖဂန်က ထွက်ခွာသွားပြီးနောက် တာလီဘန်တွေက နိုင်ငံကို ပြန်လည်အုပ်ချုပ်ခဲ့ပါတယ်။ ဒါပေမဲ့ သူတို့ကို ဘယ်သူက နိုင်ငံအဖြစ် အသိအမှတ်မပြုသေးပါဘူး။
ဒါပေမဲ့ တာလီဘန်တွေဟာ သူတို့အာဏာရယူပြီး ပထမဆုံး နိုင်ငံတကာဆွေးနွေးပွဲကို ဇူလိုင် ၂ နဲ့ ၃ ရက်တို့မှာ ကာတာနိုင်ငံ၊ ဒိုဟာမြို့မှာ ကျင်းပခဲ့တဲ့အစည်းအဝေးကို တက်ရောက်ခဲ့ပါတယ်။
သူတို့ဟာ ပထမဆုံးအကြိမ် နိုင်ငံတကာ အသိုက်အဝန်းနဲ့ ထိတွေ့ ဆွေးနွေးမှုမှာတင် ကောင်းမွန်တဲ့ အလားအလာကောင်းတွေ ရရှိစေခဲ့တယ်လို့ သံတမန် အသိုက်အဝန်းက ပြောပါတယ်။
အဲဒီဆွေးနွေးပွဲမှာ တာလီဘန်အစိုးရ ကိုယ်စားလှယ်အဖွဲ့တွေနဲ့အတူ အမျိုးသမီးတစ်ဦးမှမပါလို့ လူ့အခွင့်အရေး၊ အမျိုးသမီး အခွင့်အရေး တက်ကြွလှုပ်ရှားသူတွေက ဝေဖန်ရှုတ်ချခဲ့ပါတယ်။
တာလီဘန်တွေဟာ အာဖဂန်မှာ အမျိုးသမီးတွေရဲ့ ပညာသင်ယူခွင့်နဲ့ အခြေခံရပိုင်ခွင့်တွေကို ဖိနှိပ် နေလို့ နာမည်ဆိုး ထွက်နေပါတယ်။
ဇူလိုင် ၂ ရက်နေ့ အစည်းအဝေးမှာ ကုလသမဂ္ဂအရာရှိတွေဟာ အာဖဂန် အခြေစိုက် အရပ်ဘက် အဖွဲ့အစည်းတွေနဲ့ သီးခြားတွေ့ဆုံခဲ့ပါတယ်။
နိုင်ငံတကာ အသိုက်အဝန်းနဲ့ တာလီဘန် အစိုးရကြား တွေ့ဆုံဆွေးနွေးမှု အပြီးမှာ တရားဝင် သဘောတူညီမှုတွေ၊ အဖြေရှာမှုတွေ၊ ကြေညာချက်တွေ ထွက်ပေါ်မလာခဲ့ပါဘူး။ အဲဒီအစား သံတမန် အသိုက်အဝန်းကရော၊ တာလီဘန် ကိုယ်စားလှယ်တွေကပါ ရလဒ်အားဖြင့် အပေါင်းလက္ခဏာ ဆန်ခဲ့တယ်လို့ပဲ အသီးသီး မှတ်ချက်ပေးသွားခဲ့ပါတယ်။
****************************************
“အမေရိကန်ပြည် တည်ထောင်ခြင်း ၂၄၈ နှစ်ပြည့်ပြီ”
ဇူလိုင် ၄ ရက်နေ့ဟာ နှစ်စဉ်နှစ်တိုင်း အမေရိကန်ပြည်ထောင်စုရဲ့ လွတ်လပ်ရေးနေ့ဖြစ်ပါတယ်။ ဒီတစ်ပတ် ကြာသာပတေးနေ့မှာကျရောက်တဲ့ လွတ်လပ်ရေးနေ့ကို နိုင်ငံတဝန်း အကြီးအကျယ်အခမ်းအနားတွေပြင်ဆင်ပြီး ကျင်းပခဲ့ပြီး အလှပြချီတက်ပွဲတွေ၊ မိသားစုတွေဆုံစည်းတာ၊ ပျော်ပွဲစားထွက်တာတွေ လုပ်တတ်ကြပါတယ်။
ညပိုင်းမှာဆိုရင်လည်း မီးရှူးမီးပန်းတွေဖောက်ရင်း တစ်နေ့တာ အဆုံးသတ်ခဲ့ကြပါတယ်။
နောက်ပြီး ဒီနှစ် လွတ်လပ်ရေးနေ့မှာ ခရီးသွားထွက်သူတွေများပြားနေပါတယ်။ ဒါကြောင့် အားလပ်ရက် သီတင်းပတ်ကုန် ဇူလိုင် ၇ ရက် တနင်္ဂနွေမှာ အမေရိကန် လေဆိပ်တွေမှာ ခရီးသွား ၃ သန်းကျော်မယ်လို့ ခန့်မှန်းထားပါတယ်။
****************************************
“ဘာသာရေးပွဲမှာ လူရာချီသေရတဲ့ အိန္ဒိယ”
ကမ္ဘာ့လူဦးရေးအများဆုံးဖြစ်တဲ့ အိန္ဒိယနိုင်ငံရဲ့ ဘာသာရေးပွဲတစ်ခုမှာ လူအုပ်ပြိုလို့ လူ ၁၂၀ ကျော်သေဆုံးခဲ့ရပါတယ်။
အူတာပရာဒက်ရှ်ပြည်နယ်မှာ ဇူလိုင် ၂ ရက်နေ့ကဖြစ်ပွားတဲ့ လူအုပ်ပြိုမှုအတွင်း ဒဏ်ရာရသူတွေလည်း အများအပြား ရှိခဲ့ပါတယ်။
နယူးဒေလီမြို့တော်ရဲ့ အရှေ့တောင်ဘက် ကီလိုမီတာ ၂၀ဝ လောက် အကွာမှာတည်ရှိတဲ့ မူဂယ်လ်ဂါဟီ ကျေးရွာထဲမှာ ဒေသအခေါ် ဆက်ဆန်ဆိုတဲ့ ဆုတောင်းပွဲတစ်ခု ကျင်းပရင်း လူတွေ ပြုံတိုးကြရာက ကြေကွဲစရာအဖြစ်ဆိုးတွေနဲ့ ကြုံတွေ့ခဲ့ရတာပါ။
ကနဦး ၁၀၀ စွန်းစွန်းသာရှိခဲ့ရာမှ နောက်ပိုင်းမှာ ၁၂၀ ဦးကျော်အထိ သေဆုံးသူတိုးလာခဲ့တာပါ။
အိန္ဒိယ ဝန်ကြီးချုပ် နာယန်ဒရာ မိုဒီက ဖြစ်စဉ်အတွင်း ထိခိုက်နစ်နာမှု ကြုံခဲ့သူ အားလုံးအတွက် စာနာဝမ်းနည်းကြောင်း ပြောကြားခဲ့ပြီး အစိုးရဟာ သူတို့ကို အကူအညီ ပေးနိုင်ဖို့ အစွမ်းကုန် အားထုတ်သွားမယ်လို့ ကတိပြုခဲ့ပါတယ်။
ဒေသဆိုင်ရာ အုပ်ချုပ်ရေး အာဏာပိုင်တွေဟာ အခုဖြစ်စဉ်ကို စုံစမ်းဖို့ ကော်မတီတစ်ခု ချက်ချင်း ဖွဲ့စည်းပြီး စစ်ဆေးမှုတွေပြုလုပ်နေပါတယ်။
****************************************
“ကွာတားဖိုင်နယ်အထိရောက်နေကြတဲ့ ယူရိုနဲ့ ကိုပါအမေရိက ၂၀၂၄ ဖလားများ”
ဂျာမနီက အိမ်ရှင်အဖြစ်လက်ခံကျင်းပနေတဲ့ ယူရို ၂၀၂၄ ပြိုင်ပွဲ ဇွန် ၁၄ ရက်နေ့က စတင်ခဲ့ပါတယ်။ အခုတော့ ကွာတားဖိုင်နယ်ပွဲစဉ်တွေကို ရောက်ရှိနေပြီဖြစ်ပါတယ်။
မနေ့က ကစားခဲ့တဲ့ ကွာတားပွဲစဉ်တွေထဲ အိမ်ရှင် ဂျာမနီက စပိန်အသင်းကို အချိန်ပို နောက်ဆုံးမိနစ်ဂိုးနဲ့အတူ ၂ ဂိုး ၁ ဂိုးနဲ့ ရှုံးနိမ့်ပြီး ပြိုင်ပွဲက ထွက်ခွာခဲ့ရပါတယ်။
နောက်ထပ် ကွာတားပွဲစဉ်ဖြစ်တဲ့ ပြင်သစ်နဲ့ ပေါ်တူဂီအသင်းတို့ပွဲစဉ်မှာ ပွဲချိန်တလျှောက် နှစ်ဖက်ဂိုးမသွင်းနိုင်ခဲ့ကြဘဲ ပင်နယ်တီအဆုံးအဖြတ်ကန်သွင်းခဲ့ရာမှာ ပြင်သစ်အသင်းက ၅ ဂိုး ၃ ဂိုးနဲ့ အနိုင်ရခဲ့ပါတယ်။
ဒါကြောင့် ပေါ်တူဂီအသင်းခေါင်းဆောင် စီရော်နယ်ဒိုကတော့ ယူရိုပွဲစဉ်တွေကို လုံးဝနှုတ်ဆက်သွားခဲ့ရပြီဖြစ်ပါတယ်။ ဒါကြောင့် ဆီမီးဖိုင်နယ်မှာ ပြင်သစ်နဲ့ စပိန် ယှဉ်ပြိုင်ရမှာ ဖြစ်ပါတယ်။
ဇူလိုင် ၆ ရက် စနေနေ့ ည မြန်မာစံတော်ချိန် ၁၀ နာရီခွဲမှာ အင်္ဂလန်-ဆွစ်ဇာလန်နဲ့ သန်းခေါင် ၁ နာရီခွဲမှာ နယ်သာလန်-တူရကီတို့ပွဲစဉ်တွေကန်ဖို့ရှိပါတယ်။
ဒီပွဲစဉ်တွေမှာ အနိုင်ရရှိတဲ့နှစ်သင်းဟာ ဆီမီးဖိုင်နယ်ကို ဆက်လက်ယှဉ်ပြိုင်ရမှာဖြစ်ပါတယ်။ ဗိုလ်လုပွဲစဉ်ကိုတော့ ဇူလိုင် ၁၄ ရက်နေ့မှာ ကျင်းပမှာပါ။
အဲဒီလိုပဲ တောင်အမေရိကတိုက်မှာလည်း ၄၈ ကြိမ်မြောက်အဖြစ် အမေရိကန်ပြည်ထောင်စုမှာ ကျင်းပနေတဲ့ ကိုပါအမေရိကဖလားပြိုင်ပွဲဟာလည်း ကွာတားဖိုင်နယ်အဆင့်ကို ရောက်ရှိနေပါပြီ။
ဇူလိုင် ၅ ရက် မနက်ပိုင်းက ကစားခဲ့တဲ့ လက်ရှိချန်ပီယံ အာဂျင်တီးနား-အီကွေဒေါပွဲစဉ်မှာ တစ်ဖက်တစ်ဂိုးစီသရေကျလို့ ပင်နယ်တီအဆုံးအဖြတ်အထိ ကစားခဲ့ရာမှာ အာဂျင်တီးနားအသင်းက ၄ ဂိုး ၂ ဂိုးနဲ့ အနိုင်ရခဲ့လို့ ဆီမီးဖိုင်နယ်အဆင့်ကို တက်ရောက်သွားပါတယ်။
နောက်ထပ်ပွဲစဉ် ဗင်နီဇွဲလားနဲ့ ကနေဒါတို့လည်း တစ်ဖက်တစ်ဂိုးစီသရေကျလို့ ပင်နယ်တီအဆုံးအဖြတ်မှာ ကနေဒါက ၄ ဂိုး ၃ ဂိုးနဲ့ အနိုင်ရခဲ့ပါတယ်။
ဇူလိုင် ၇ ရက် မြန်မာစံတော်ချိန် မနက် ၅ နာရီမှာ ကိုလံဘီယာနဲ့ ပနားမားပွဲစဉ်၊ မနက် ၈ နာရီမှာ ဥရုဂွေးနဲ့ ဘရားဇီးလ်ပွဲစဉ်တွေ ယှဉ်ပြိုင်သွားဖို့ ရှိနေပါတယ်။
ဒီပြိုင်ပွဲဟာလည်း ဇူလိုင် ၁၄ ရက်နေ့မှာ ဗိုလ်လုပွဲကျင်းပမှာဖြစ်ပါတယ်။