မဲဆောက်မှာပြုလုပ်တဲ့ အဆိုတော် အိမ့်ချစ်နဲ့ ဝေလတို့ရဲ့ ဖျော်ဖြေပွဲကို သွားရောက်ကြည့်ရှုသူနည်းပါး
ထိုင်းနိုင်ငံ တာ့ခ်ခရိုင် မဲဆောက်မြို့မှာ ပြုလုပ်တဲ့ ကျောက်ဖော့ဖဝေါရိုးရာပွဲတော် ဖျော်ဖြေပွဲမှာ မြန်မာအဆိုတော် အိမ့်ချစ်နဲ့ ဝေလတို့ လာရောက်သီဆိုဖျော်ဖြေပေမဲ့ မြန်မာအသိုင်းအဝိုင်းက သွားရောက်ကြည့်ရှုသူ မရှိသလောက် နည်းပါးခဲ့တယ်လို့ မဲဆောက် မြန်မာအသိုင်းအဝန်းဆီက သိရပါတယ်။
ဒီဖျော်ဖြေပွဲကို မဲဆောက်မြို့ မြို့နယ်အုပ်ချုပ်ရေးမှူးရုံး (အမ်ဖိုရုံး) ဝင်းအတွင်းမှာ ဒီနေ့ ဒီဇင်ဘာ ၆ ရက်နဲ့ မနက်ဖြန် ဒီဇင်ဘာ ၇ ရက် နှစ်ရက်ဆက်ကျင်းပမှာဖြစ်ပြီး မြန်မာအဆိုတော်တွေဖြစ်တဲ့ အိမ့်ချစ်၊ မေလသံစဉ်၊ ဝေလနဲ့ နောနော်တို့လည်း ပါဝင်သီဆိုကြမှာ ဖြစ်ပါတယ်။
ဒါပေမဲ့ ကျောက်ဖော့ဖဝေါရိုးရာပွဲတော် ဖျော်ဖြေပွဲမှာ မြန်မာနိုင်ငံကနေ လာရောက်သီဆိုဖျော်ဖြေသူတွေဟာ စစ်ကော်မရှင်ရဲ့ ရွေးကောက်ပွဲအတွက် လာရောက်မဲပေးဖို့ စည်းရုံးလှုံ့ဆော်ရာမှာ ပါဝင်ထားကြသူတွေဖြစ်တာကြောင့် သွားရောက်ကြည့်ရှုတာမျိုးမလုပ်ဘဲ သပိတ်မှောက်ကြဖို့ကို Fncc Burma Fact Check Community က တိုက်တွန်းထားပါသေးတယ်။
စစ်တပ်အာဏာသိမ်းကာလအတွင်း စစ်အုပ်စုနဲ့ ပူးပေါင်းပါဝင်နေပြီး စစ်အုပ်စုအလိုကျ လုပ်ဆောင်နေတဲ့ သရုပ်ဆောင်အနုပညာရှင်တွေ၊ ဟာသသရုပ်တွေနဲ့ အဆိုတော်တွေကို လူမှုရေးပြစ်ဒဏ် (Boycott) လုပ်ဆောင်ဖို့ တော်လှန်ရေးမှာပါဝင်နေတဲ့ အင်အားစုတွေကလည်း တိုက်တွန်းမှုတွေ ရှိနေပါတယ်။
ပြီးခဲ့တဲ့ နိုဝင်ဘာ ၂၈ ရက်ကလည်း အာဏာသိမ်းစစ်တပ်ကို ထောက်ခံတဲ့ အဆိုတော်ယုန်လေး စီစဉ်ရိုက်ကူးတဲ့ “မြို့ပြထဲကလမ်းမ” ရုပ်ရှင်ဇာတ်ကားကို Boycott လုပ်ဖို့ တိုက်တွန်းမှုတွေရှိခဲ့သလို ပြည်သူတွေကလည်း သွားရောက်မကြည့်ရှုခဲ့တာကြောင့် ရုပ်ရှင်ရုံတင်တဲ့ ပထမနေ့မှာတင် ရုံပိတ်လိုက်ရပါသေးတယ်။
ဓာတ်ပုံ – အောင်အောင်