ပျော်ဘွယ် KBZ ဘဏ်ပြိုကျမှုမှာ အသက်ရှင်လျက် ၁၆ဦး ကယ်ဆယ်နိုင်ခဲ့
မန္တလေးတိုင်း ပျော်ဘွယ်မြို့ ကမ္ဘောဇဘဏ်ပြိုကျမှုဖြစ်စဉ်အတွင်း အသက်ရှင်လျက် ၁၆ဦး ကယ်ဆယ်နိုင်ခဲ့တယ်လို့ ပျော်ဘွယ်မြို့နယ် မီးသတ်တပ်ဖွဲ့ရဲ့ ယနေ့ ထုတ်ပြန်မှုအရ သိရပါတယ်။
မြန်မာနိုင်ငံမှာ နှစ်ပေါင်း ၁၈၆နှစ်အတွင်း အဆိုးဝါးဆုံးအဖြစ် မတ်လ ၂၈ရက်နေ့မှာ ကြုံတွေ့ခဲ့ရတဲ့ ငလျင်ဘေးကြောင့် ပျော်ဘွယ်မြို့လည်း ထိခိုက်ခဲ့သလို ပျော်ဘွယ် ကမ္ဘောဇဘဏ်ခွဲလည်း ပြိုကျပျက်စီးခဲ့ပြီး ဘဏ်ဝန်ထမ်းတွေ အပါအဝင် ပြည်သူတွေပါ ပိတ်မိခဲ့ရပါတယ်။
ပျော်ဘွယ်မီးသတ်တပ်ဖွဲ့နဲ့ လူမှုရေးအဖွဲ့တွေ နိုင်ငံတကာရှာဖွေရေးအဖွဲ့တွေရဲ့ ပူးပေါင်းလုပ်ဆောင်မှုအရ ဘဏ်အဆောက်အဦပြိုကျချိန်ကနေ ဒီကနေ့အထိ အသက်ရှင်လျက် ကယ်ထုတ်နိုင်သူ ၁၆ဦး၊ ကယ်ထုတ်နိုင်ပြီးနောက် ဆေးရုံသို့ပို့ဆောင်ရာ လမ်းခုလပ်တွင် သေဆုံးသွားသူ ၃ဦး၊ အလောင်းပြန်လည်ရှာဖွေရရှိမှု ၂၀ခုထိ ရှိခဲ့တယ်လို့ သိရပါတယ်။
သေဆုံးသူတွေအတွင်း ဘဏ်ဝန်ထမ်း ၁၀ဦး၊ အာမခံဝန်ထမ်း တစ်ဦးနဲ့ ဘဏ်ကို ငွေသွင်းငွေထုတ်လုပ်ဆောင်ဖို့ လာရောက်သူ ၉ဦး ပါဝင်ခဲ့တယ်လို့ သိရပါတယ်။
ဓာတ်ပုံ – ပျော်ဘွယ်မီးသတ်တပ်ဖွဲ့