အပစ်ရပ် ကြေညာထားပေမဲ့ TNLA ထိန်းချုပ်ထားတဲ့ မိုးကုတ်မြို့ကို စစ်ကောင်စီ လေကြောင်းတိုက်ခိုက်မှုပြုလုပ်
စစ်ကောင်စီဟာ ဧပြီ ၂ ရက်နေ့ကနေ ၂၂ ရက်နေ့အထိ ယာယီအပစ်ခတ်ရပ်စဲရေးကာလ အဖြစ် ကြေညာထားပေမဲ့ ဒီကနေ့ ဧပြီ ၅ ရက်နေ့ နေ့လယ်ပိုင်းမှာ တအာင်းအမျိုးသား လွတ်မြောက်ရေး တပ်မတော် (TNLA ) ထိန်းချုပ်ထားရာ မိုးကုတ်မြို့ အနောက်ပိုင်းကို လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေရဲ့ ပြောကြားချက်အရ သိရပါတယ်။
ဒီကနေ့ နေ့လယ် ၂ နာရီ ၁၅ မိနစ်ဝန်းကျင်မှာ မိုးကုတ်မြို့ အနောက်ပိုင်းမှာရှိတဲ့ ပင့်ကူတောင် တောင်ခြေတဝိုက်ကို လေကြောင်းကနေ ဗုံး နှစ်လုံး ကြဲချသွားတာဖြစ်တယ်လို့ ဆိုပါတယ်။
“အသံဝေါခနဲ ကြားပြီး ကြဲသွားတာပဲ၊ လေယာဉ်ဖြတ်ပျံလာသံ ခဏကြားပြီး ကြဲသွားတာ၊ (အသံ) ကြားပြီး ရင်တုန်ပြီး ဘယ်ပြေးရမှန်း မသိဘူး” လို့ အသက် (၅၄) နှစ်အရွယ် မိုးကုတ်မြို့ အနောက်ပိုင်း ဒေသခံ အမျိုးသမီး တစ်ဦးက CJ Platform သတင်းဌာနကို ပြောပါတယ်။
လေယာဉ်နဲ့ ဗုံးလာကြဲချိန်ဟာ ဒီကနေ့ နေ့လယ် ၂ နာရီ ၁၅ မိနစ်ဝန်းကျင် ဖြစ်နိုင်ပြီး လေယာဉ်သံ ငြိမ်သွားချိန်မှာ ၂ နာရီ ၂၀ မိနစ် ဖြစ်နေပြီ ဖြစ်ကြောင်းနဲ့ ဗုံးကြဲခံရတဲ့ နေရာဟာ ပင့်ကူတောင် တောင်ခြေနားမှာရှိတဲ့ ခေါင်းဦးဘာရပ်ကွက် သင်္ချိုင်းအနီးနားဖြစ်နိုင်တယ်လို့လည်း အဆိုပါ အမျိုးသမီးက ဆက်ပြောပါတယ်။
TNLA အပါအဝင် မြန်မာအမျိုးသားဒီမိုကရက်တစ် မဟာမိတ် တပ်မတော် (MNDAA)၊ အာရက္ခတပ်တော် (AA) စတဲ့ မြောက်ပိုင်း ညီနောင်မဟာမိတ် သုံးဖွဲ့ဟာ ပြီးခဲ့တဲ့ မတ်လ ၂၈ ရက်နေ့မှာ မြန်မာနိုင်ငံမှာ လှုပ်ခတ်ခဲ့တဲ့ ငလျင်ကြောင့် နောက်ဆက်တွဲ ကယ်ဆယ်ရေးလုပ်ငန်းတွေ ဆောင်ရွက်နိုင်ဖို့အတွက် ဧပြီ ၁ ရက်ကနေ ဧပြီ ၃၀ ရက်နေ့အထိ တစ်ဖက်သတ်အပစ်ရပ်စဲပြီး ခုခံတုံပြန်မှုကလွဲပြီး ထိုးစစ်ဆင် တိုက်ခိုက်မှုတွေ လုပ်မှာ မဟုတ်ကြောင်း ဧပြီ ၁ ရက်နေ့မှာ ထုတ်ပြန်ကြေညာထားပါတယ်။
စစ်ကောင်စီကလည်း ငလျင်ဘေးကနေ ပြန်လည်ထူထောင်ရေးနဲ့ ကူညီကယ်ဆယ်ရေးလုပ်ငန်းတွေ လုပ်ကိုင်ဖို့ ရည်ရွယ်ပြီး ဧပြီ ၂ ရက်နေ့ကနေ ဧပြီ ၂၂ ရက်အထိကာလကို ယာယီပစ်ခတ်တိုက်ခိုက်မှု ကာလအဖြစ်သတ်မှတ်တယ်လို့ ဧပြီ (၂) ရက်နေ့မှာ ထုတ်ပြန်ကြေညာခဲ့ပါတ်။
ဒါပေမဲ့ စစ်ကောင်စီဟာ မတ်လ ၂၈ ရက်နေ့နောက်ပိုင်းမှာကတည်းက ပစ်ခတ်တိုက်ခိုက်မှုတွေကို နိုင်ငံတဝှမ်းလုပ်ဆောင်နေသလို အပစ်ရပ်ကြောင်း ကြေညာပြီးနောက်ပိုင်းမှာလည်း လေကြောင်းတိုက်ခိုက်မှုတွ ဆက်လက်လုပ်တောင်နေဆဲဖြစ်ပါတယ်။
ဓာတ်ပုံ – လူမှုကွန်ရက်
ပုံစာ – မိုးကုတ်မြို့အနောက်ပိုင်း ပင့်ကူတောင် တောင်ခြေကို စစ်ကောင်စီက ဗုံးကြဲတိုက်ခိုက်ပြီးနောက်တွင် မီးခိုးလုံးများထွက်နေသည်ကို တွေ့မြင်ရစဉ်