ချင်းပြည် တွန်းဇံမြို့မှာ ချင်းတော်လှန်ရေးပူးပေါင်းတပ်ဖွဲ့တွေနဲ့ ဇိုမီးတပ်တွေ တိုက်ပွဲဖြစ်ပွားနေ
ချင်းပြည်က တွန်းဇံမြို့မှာ ချင်းအမျိုးသားတပ်ဦး CNF ၊ ချင်းကာကွယ်ရေးတပ်ဖွဲ့ CDF-Tonzang တို့နဲ့ ဇိုမီးတော်လှန်ရေးတပ်ဖွဲ့ Zomi Revolution Army(ZRA EC ) တို့ကြား ဒီကနေ့အထိ တိုက်ပွဲပြင်းထန်နေတယ်လို့ ဒေသခံတွေရဲ့ ပြောဆိုချက်အရ သိရပါတယ်။
တွန်းဇံမြို့နယ် Mualkawi ရွာ က CDF-Tonzang ရဲ့ စခန်းတစ်ခုကို ZRA EC တို့က ပြီးခဲ့တဲ့ ဧပြီလ ၂ ရက်နေ့ကတည်းက ဝင်ရောက်တိုက်ခိုက်ခဲ့တာကြောင့် CNF နဲ့ CDF-Tonzang တပ်ဖွဲ့ဝင်တွေဟာ တွန်းဇံမြို့ထဲကို ပြန်လည်ဆုတ်ခွာခဲ့ပြီးနောက် နောက်တစ်နေ့မှာ တွန်းဇံမြို့ကို ထပ်မံဝင်ရောက် တိုက်ခိုက်ခဲ့တာလို့ စုံစမ်းသိရှိရပါတယ်။
“ မနေ့က ၁၁ နာရီလောက်ကလည်း တိုက်ပွဲတွေဖြစ်တယ်။ ဒီနေ့လည်း ဖြစ်နေတယ်။ ZRA ဘက်က ကျဆုံးတာတွေလည်း ရှိတယ် “ လို့ တွန်းဇံဒေသခံ အမျိုးသားတစ်ဦးက CJ Platform ကိုပြောပါတယ်။
မနေ့က နေ့လယ် ၁၁ နာရီမှာ တစ်နာရီကျော်ကြာတိုက်ပွဲ ဖြစ်ပွားခဲ့ပြီး မနေ့ မနက် ၈ နာရီကစလို့ တိုက်ပွဲဆက်လက် ဖြစ်ပွားကာ မြို့ထဲရှိပြည်သူတွေကို စစ်ရှောင်ကြဖို့ အချိန် ၃ နာရီပေးထားတယ်လို့ သိရပါတယ်။
တွန်းဇံမြို့ကို CDF-Tonzang ပါဝင်တဲ့ ချင်းလဲန်းကောင်စီ Chinland Council (CC) တို့က မြို့ပေါ်ကို ထိန်းချုပ်ထားတာဖြစ်ပြီး ZRA EC တပ်ဖွဲ့တွေက ကျေးရွာတွေကို ထိန်းချုပ်ထားတာဖြစ်တယ်လို့ သိရပါတယ်။
တိုက်ပွဲတွေအတွင်း ZRA EC ကတပ်ဖွဲ့ဝင်တွေ ကျဆုံးတာရှိတယ်လို့ သိရပြီး နှစ်ဖက်အကျအဆုံး ဘယ်လောက်ရှိတယ်ဆိုတာကို CJ Platform အနေနဲ့ စုံစမ်းနေဆဲဖြစ်ပါတယ်။
အင်အားပြင်းငလျင်ဒဏ်ကြောင့် နိုင်ငံအတွင်း ဒုက္ခရောက်နေကြတဲ့ ပြည်သူတွေကို ကယ်ဆယ်ရေးနဲ့ ကူညီထောက်ပံ့ရေးအတွက် ယာယီအပစ်အခတ်ရပ်စဲပြီး ဝိုင်းဝန်းဆောင်ရွက်နေတဲ့ အချိန် ဖြစ်တာကြောင့် စစ်ရေးလှုပ်ရှားမှုကန့်သတ်ထားခြင်းကို အခွင့်အရေးယူပြီး ကျူးကျော်တိုက်ခိုက်လာတာဖြစ်တယ်လို့ ချင်းအမျိုးသားတပ်မတော် CAN တပ်မဟာ ၄ က ထုတ်ပြန်ထားပါတယ်။
ဒါ့အပြင် မိမိကိုယ်ကို ခုခံကာကွယ်ရန် လိုအပ်လာလို့ စစ်ကောင်စီနဲ့ သူတို့လက်အောက်ခံ ZRA တပ်ဖွဲ့တွေကို တိုက်ခိုက်ချေမှုန်းသွားမယ်လို့ ထုတ်ပြန်ချက်ထဲ ဖော်ပြထားပါတယ်။
တွန်းဇံမြို့နယ်နဲ့ တီးတိန်မြို့နယ်တို့မှာ ၈၀ ရာခိုင်နှုန်းခန့်ဟာ ဇိုမီးလူမျိုးတွေဖြစ်တယ်လို့ သိရပြီး အခြားချင်းလူမျိုးတွေလည်း နေထိုင်ကြကာ အခုတိုက်ပွဲဟာ ချင်းလူမျိုးစုတွေကြား ဖြစ်တဲ့ တိုက်ပွဲ ဖြစ်လို့ စိတ်မချမ်းမြေ့စရာ အဖြစ်တွေဖြစ်တယ်လို့ ဒေသခံတစ်ဦးက ပြောပါတယ်။
ဓာတ်ပုံ – လူမှုကွန်ရက်