ဂေါ်ရန်ဂျီမှာ စက်လှေတွေကို လိုက်ဖမ်းပြီး ငွေတောင်းနေတဲ့ စစ်ကောင်စီအဖွဲ့ ဓားနဲ့အခုတ်ခံရပြီး ရဲတစ်ဦးသေ သေနတ်တွေပါသွား
ဧရာဝတီတိုင်း ငပုတောမြို့နယ် ဂေါ်ရန်ဂျီကျွန်းဒေသ ဘုတ်ပင်ဆိပ်ကျေးရွာအနီးက ပင်လယ်အတွင်းမှာ ကုန်သွယ်စက်လှေတွေကို လိုက်ဖမ်းပြီး ငွေတောင်းနေတဲ့ စစ်ကောင်စီတပ်သားတွေနဲ့ ရဲအဖွဲ့ ဓားနဲ့ အခုတ်ခံရပြီး ရဲတပ်သားတစ်ဦး သေဆုံးကာ သေနတ်တွေ ပါသွားခဲ့တယ်လို့ ဒေသခံတွေဆီက သိရပါတယ်။
ငပုတောမြို့နယ် မကျီးဇင်ကျေးရွာကနေ ငှက်ပျောချောင်းအတွင်း ကုန်သယ်နေတဲ့ စက်လှေတစ်စင်းကို ဧပြီ ၃ရက်နေ့မှာ စစ်ကောင်စီတပ်က ဖမ်းဆီးထားပြီးနောက် ဧပြီ ၄ရက်နေ့ ညနေ ၄နာရီခန့်မှာ ငရုတ်ကောင်းမြို့ကို ပို့ဆောင်စဉ် ပင်လယ်အတွင်းမှာ ဖမ်းဆီးခံထားရသူ လှေထိုးသားတွေက လှေပေါ်မှာ လိုက်ပါလာသူ ရဲတပ်သားတစ်ဦးနဲ့ စစ်ကောင်စီ အရာရှိတစ်ဦးကို ဓားနဲ့ခုတ်ကာ ပင်လယ်ထဲကို ပစ်ချခဲ့တာပါ။
“လှေဖမ်းပြီး ငွေတောင်းဖို့ ကြံတာ၊ ပြီးတော့ ရဲစခန်းကို ပို့ဖို့ အသွားမှာ ဟိုက ဝိုင်းပြီး ဓားနဲ့ခုတ်ပြီး ပင်လယ်ထဲကို ပစ်ချခဲ့တာ၊ ရဲတပ်သားက သေသွားတယ် စစ်ကြောင်းမှူးလို့ ပြောတဲ့သူကတော့ မသေဘူး ဒဏ်ရာအတော်ကြီး၊ သေနတ်တွေတော့ အကုန်ပါသွားတယ်၊ သူတို့ကိုတောင် နောက်ထပ် စက်လှေတစ်စင်းက တွေ့လို့ ဆယ်လိုက်ရတာ”လို့ အဲဒီအကြောင်းကို သိရှိထားသူ ဒေသခံတစ်ဦးက ပြောပါတယ်။
ဓားနဲ့ခုတ်ခံရမှုကြောင့် ရဲတပ်သား မင်းထက်ဝဠာကျော်ဟာ ငရုတ်ကောင်းဆေးရုံကို ပို့ဆောင်စဉ်မှာပဲ သေဆုံးသွားပြီး စစ်ကြောင်းမှူးဟုဆိုသူကလည်း ဒဏ်ရာပြင်းထန်စွာ ရရှိခဲ့တယ်လို့ သိရပါတယ်။
“သူတို့ဖမ်းထားတဲ့ စက်လှေရော လူတွေရော အကုန်လွတ်သွားတယ်၊ သေနတ်တွေလဲ ပါသွားတော့ ပင်လယ်ထဲ ပတ်ရှာနေကြတယ်၊ ငါးဖမ်းလှေတွေတောင် မထွက်ရဲဘူး အရမ်းခံရမှာစိုးလို့”လို့ အဆိုပါ ဒေသခံက ဆက်ပြောပါတယ်။
သေဆုံးသွားသူ ရဲတပ်သားဟာ ငပုတောမြို့နယ် ကျောက်ချောင်းကျေးရွာ ဒေသခံတစ်ဦးဖြစ်တယ်လို့ သိရပါတယ်။
ဂေါ်ရန်ဂျီကျွန်းနဲ့ အနီးတဝိုက်မှာ တပ်စွဲထားတဲ့ စစ်ကောင်စီတပ်ဟာ ပင်လယ်အတွင်း ကုန်သွယ်သွားလာနေတဲ့ လှေတွေကို ဖမ်းဆီးပြီး ငွေညှစ်တာတွေ လုပ်ဆောင်လေ့ရှိပါတယ်။
ဓာတ်ပုံ – လူမှုကွန်ရက်