လူသတ်သမားမင်းအောင်လှိုင်ကို ငါတို့မကြိုဆိုဘူး ဆိုတဲ့ ထိုင်းပြည်သူတွေ
ထိုင်းနိုင်ငံ ဘန်ကောက်မြို့ကို ရောက်ရှိနေတဲ့ စစ်ကောင်စီခေါင်းဆောင် မင်းအောင်လှိုင်ကို ထိုင်းပြည်သူတွေနဲ့ ထိုင်းရောက်မြန်မာတွေက ဒီကနေ့ ဧပြီ ၄ရက်နေ့ မနက်ပိုင်းမှာ “လူသတ်သမား မင်းအောင်လှိုင်ကို ငါတို့ မကြိုဆိုဘူး”ဆိုတဲ့ စာတန်းချိတ်ဆွဲကာ မင်းအောင်လှိုင်တည်းခိုတဲ့ ဟိုတယ်အနီးမှာ ချိတ်ဆွဲ ဆန္ဒပြခဲ့ကြပါတယ်။
မင်းအောင်လှိုင် တည်းခိုတဲ့ ရှန်ဂရီလာဟိုတယ်အနီးမှာရှိတဲ့ ကျောက်ဖရားမြစ်ပေါ်က Somdet Chao Phraya တံတားပေါ်မှာ “We do not welcome Murderer Min Aung Hlaing “ဆိုတဲ့ စာသားကို ချိတ်ဆွဲဆန္ဒပြခဲ့ကြတာပါ။
စစ်ကောင်စီခေါင်းဆောင် မင်းအောင်လှိုင်ဟာ ထိုင်းနိုင်ငံက အိမ်ရှင်အဖြစ် လက်ခံကျင်းပတဲ့ ဘင်းစတက်ထိပ်သီးညီလာခံကို ထိုင်းဝန်ကြီးချုပ်ရဲ့ ဖိတ်ကြားချက်အရ တက်ရောက်ဖို့အတွက် ရောက်ရှိနေတာပဲဖြစ်ပါတယ်။
ထိုင်းလွှတ်တော်အမတ်တွေကလည်း ဝန်ကြီးချုပ်ရဲ့ ဖိတ်ကြားချက်ကို ဝေဖန်မှုတွေ ရှိနေပြီး ထိုင်းပြည်သူတွေကလည်း စစ်ကောင်စီခေါင်းဆောင် မင်းအောင်လှိုင် လာရောက်တဲ့အပေါ်မှာ ကျေနပ်မှုမရှိဘဲ လူမှုကွန်ရက်စာမျက်နှာတွေပေါ်ကနေတဆင့် ဝေဖန်မှုတွေ ရှိနေပါတယ်။
ဆန္ဒပြစာတမ်းကို တစ်နာရီခန့်ချိတ်ဆွဲထားပြီးနောက်မှာ ထိုင်းအာဏာပိုင်တွေက လာရောက်သိမ်းဆည်းသွားခဲ့တယ်လို့ သိရပါတယ်။
စစ်ကောင်စီခေါင်းဆောင် မင်းအောင်လှိုင်ဟာ မြန်မာနိုင်ငံမှာ နှစ်ပေါင်း ၁၈၆နှစ်အတွင်း အဆိုးဝါးဆုံးသော ငလျင်ဘေးနဲ့ ကြုံတွေ့နေရချိန်မှာ ကူညီကယ်ဆယ်ရေးတွေကို မလုပ်ဆောင်ဘဲ ထိုင်းနိုင်ငံကို ထွက်ခွာသွားတာပဲ ဖြစ်ပါတယ်။
ဓါတ်ပုံ – The Reporters