စစ်အုပ်ချုပ်ရေး ကြေညာခဲ့တဲ့ တောင်ကိုရီးယားသမ္မတကို ဖမ်းဖို့ ကြိုးပမ်းနေ
စစ်အုပ်ချုပ်ရေး ကြေညာခဲ့လို့ သမ္မတရာထူးကနေ ဆိုင်းငံ့ခံထားရတဲ့ ယွန်ဆွတ်ယိုလ်ကို တောင်ကိုရီးယားအာဏာပိုင်တွေက ဖမ်းဆီးဖို့ ကြိုးပမ်းနေကြတယ်လို့ နိုင်ငံတကာသတင်းတွေက ဒီကနေ့ ဒီဇင်ဘာလ ၃၀ ရက်နေ့မှာ ဖော်ပြလာပါတယ်။
စစ်အုပ်ချုပ်ရေး အမိန့်ထုတ်ခဲ့တာနဲ့ ပတ်သက်လို့ အခုလ အစမှာ ယွန်ကို စစ်ဆေးမေးမြန်းဖို့ ခေါ်ယူခဲ့ပေမဲ့ သမ္မတရာထူးကနေ ဆိုင်းငံ့ခံထားရတဲ့ ယွန်ကတော့ တုံ့ပြန်မှုတွေ မလုပ်သေးပါဘူး။
အခုဆိုရင် သုံးကြိမ်မြောက် ဆင့်ခေါ်ခံခဲ့ရပြီးနောက်မှာ ဘာမှ တုံ့ပြန်မှုမလုပ်သေးတဲ့ ယွန်ကို တောင်ကိုရီးယား ပူးတွဲ စုံစမ်းစစ်ဆေးရေး ဌာနချုပ်က ဖမ်းဆီးဖို့ ဒီကနေ့ တနင်္လာနေ့မှာ တောင်းဆိုလာတာပါ။
ယွန်ရဲ့ ဒီဇင်ဘာ ၃ ရက်နေ့က စစ်အုပ်ချုပ်ရေးကြေညာချက်ဟာ အာရှနဲ့ ကမ္ဘာမှာပါ အံ့အားသင့်စေခဲ့ရပြီး တောင်ကိုရီးယားနိုင်ငံဟာလည်း ဒီရဲ့ အကျိုးဆက်ကြောင့် အကြီးမားဆုံး နိုင်ငံရေး အကျပ်အတည်းနဲ့ စီးပွားရေးအကျပ်အတည်းတွေကိုပါ တစ်ချိန်တည်းမှာ ရင်ဆိုင်ကြုံတွေ့လိုက်ရတာ ဖြစ်ပါတယ်။
ယွန်ဟာ စစ်အုပ်ချုပ်ရေး ကြေညာစဉ်က လွှတ်တော်အတွင်း ဝင်ရောက်ဖို့ လိုအပ်ရင် ပစ်ခတ်ခွင့်ပါ အမိန့်ပေးခဲ့တယ်ဆိုတဲ့ စွပ်စွဲချက်တွေနဲ့ လက်ရှိမှာ ရင်ဆိုင်နေရပါတယ်။
ဓာတ်ပုံ – Reuters