ဟားခါးက ကီယမ်တောင်တပ်စခန်းကို CC တပ်တွေ နှစ်နာရီအတွင်းသိမ်းပိုက်၊ ခလရ-၂၂၂ တပ်ရင်းမှူးအပါအဝင် ၁၀ ဦးထက်မနည်းသေဆုံးပြီး စစ်သုံ့ပန်း ၃၀ ကျော် ဖမ်းဆီးရမိ
ချင်းပြည်၊ ဟားခါးမြို့အနီး စစ်ကောင်စီတပ်ရဲ့ ခလရ-၂၂၂ တပ်ရင်း လက်အောက်ခံ ကီယမ်တောင်တပ်စခန်းကို ချင်းလဲန်းကောင်စီ(CC)ရဲ့ ပူးပေါင်းတပ်တွေက ဒီကနေ့ နိုဝင်ဘာလ ၃၀ ရက် မနက် ၁၀ နာရီဝန်းကျင်မှာ သိမ်းပိုက်ရရှိတယ်လို့ ချင်းကာကွယ်ရေးတပ်-ဟားခါး(CDF-Hakha)ရဲ့ တာဝန်ရှိသူတစ်ဦးက CJ Platform ကို ပြောပါတယ်။
စစ်ကောင်စီတပ် အင်အား ၅၀ ကျော်နဲ့ တပ်စွဲထားတဲ့ အဲဒီတပ်စခန်းကို CC တပ်တွေက နှစ်နာရီအတွင်း တိုက်ခိုက်သိမ်းပိုက်လိုက်နိုင်တာဖြစ်တယ်လို့ သူက ပြောပါတယ်။
“အခုသိမ်းပိုက်ရတဲ့စခန်းက ဟားခါး-ထန်တလန်ကြား ဟားခါးမြို့အထွက်မှာရှိတဲ့ စခန်းဖြစ်ပါတယ်။ တိုက်ပွဲက နှစ်နာရီလောက်ပဲဖြစ်တယ်” လို့ CDF-Hakha တာဝန်ရှိသူက ပြောပါတယ်။
အဲဒီစခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၁၂ ဦး လက်နက်ချခဲ့တဲ့အပြင် နောက်ထပ် ၁၉ ဦး ဖမ်းဆီးရမိတဲ့အတွက် စစ်သုံ့ပန်းအနေနဲ့ စုစုပေါင်း ၃၁ ဦးအထိ ရရှိခဲ့တယ်လို့ သိရပါတယ်။
ဒါ့အပြင် စစ်ကောင်စီတပ်ရဲ့ ခလရ-၂၂၂ တပ်ရင်းမှူးနဲ့ အရာရှိ လေးဦးအပါအဝင် တပ်ဖွဲ့ဝင် ၁၀ ဦးထက်မနည်း သေဆုံးခဲ့တယ်လို့ CDF-Hakha ဆီကနေ သိရပါတယ်။
တဖန် G3 တစ်လက်၊ MA-11 ၁၁ လက်၊ MA-1 ခြောက်လက်၊ MA- 3 သုံးလက်၊ MA-4 နှစ်လက်၊ MA -12 နှစ်လက်၊ ငါးကြင်းမီး နှစ်လက်၊ RPG နှစ်လက်၊ 60 MM နှစ်လက်၊ Pistol နှစ်လက်နဲ့ တခြား ကျည်ဘောက်မျိုးစုံ၊ ကျည်ဆန်မျိုးစုံနဲ့ မိုင်းတွေကို သိမ်းဆည်းရမိခဲ့တယ်လို့ CC တပ်တွေက ဆိုပါတယ်။
ဒီစခန်းတိုက်ပွဲသတင်းနဲ့ပတ်သက်ပြီး ချင်းအမျိုးသားတပ်မတော်(CNA/CNF)ဘက် တရားဝင်သတင်းထုတ်ပြန်လာတာမျိုးမရှိသေးပါဘူး။
ဟားခါးမြို့မှာ ဒီကနေ့မနက်ဖြစ်ပွားတဲ့တိုက်ပွဲဟာ နှစ်ပတ်ကျော်အကြာမှာ တစ်ကျော့ပြန်ဖြစ်ပွားတဲ့ တိုက်ပွဲဖြစ်တယ်လို့ ဒေသခံတွေဆီက သိရပါတယ်။
“အခု(ညနေ ၅ နာရီခန့်)ထိ သေနတ်သံတွေကြားနေရတုန်းပဲ။ မြို့ထဲလည်း စစ်ကောင်စီတပ်တွေ ရုတ်ရုတ်သဲသဲ ခြေရှုပ်နေကြတယ်။ တိုက်ပွဲကဒီလောက်နဲ့မရပ်ပဲ ဆက်ဖြစ်မယ့်အနေထားမှာရှိတယ်” လို့ အသက် ၃၀ နှစ်ဝန်းကျင် အမျိုးသားတစ်ဦးက CJ Platform ကို ပြောပါတယ်။
ပြီးခဲ့တဲ့နိုဝင်ဘာလ ၂၆ ရက်နေ့ကလည်း ဟားခါးမြို့မှာ စစ်ကောင်စီတပ်က အင်အား ၂၀၀ ခန့် လေကြောင်းကနေ လေထီးနဲ့ တပ်အင်အားဖြည့်တင်းထားတယ်လို့ ဒေသခံတွေဆီကနေ သိရပါတယ်။
ဓာတ်ပုံ – ပေးပို့
ပုံစာ- ကီယမ်တောင်စခန်းကနေ ဖမ်းဆီးရမိတဲ့ စစ်သုံ့ပန်းနဲ့ လက်နက်ခဲယမ်းတွေကို တွေ့မြင်ရစဥ်