အပစ်ရပ်မယ်လို့ဆိုပြီး ထိုးစစ်ဆက်ထိုးတာ လေကြောင်းတိုက်ခိုက်တာတွေကို စစ်ကောင်စီ ဆက်လုပ်နေ
အင်အားပြင်း စစ်ကိုင်းမြေငလျင်လှုပ်ခတ်ပြီးနောက် တိုင်းရင်းသားလက်နက်ကိုင်အဖွဲ့တွေနဲ့ တော်လှန်ရေးအင်အားစုတွေက ကိုယ်ကိုကိုယ် ခုခံကာကွယ်ခြင်းကလွဲပြီး အပစ်ရပ်ထားချိန်မှာ ဆက်လက်တိုက်ခိုက်မယ်လို့ပြောခဲ့တဲ့ စစ်ကောင်စီက မနေ့ကတော့ ရက် ၂၀ ကြာ အပစ်ရပ်မယ်လို့ ကြေညာလာပါတယ်။
တိုင်းရင်းသားတပ်ဖွဲတွေထဲ အပစ်ရပ်မယ်လို့ ကြေညာတာရှိသလို ကြေညာချက်မထုတ်ပြန်တဲ့ တပ်ဖွဲ့တွေလည်း အပစ်ရပ်ထားကြပြီးတဲ့နောက်မှာ စစ်ကောင်စီက အပစ်ရပ်မယ်လို့ မနေ့ကညက ထုတ်ပြန်လာတာပဲ ဖြစ်ပါတယ်။
ဒါပေမဲ့ မနေ့ကအထိ စစ်ကောင်စီက တိုင်းရင်းသားလက်နက်ကိုင်တပ်ဖွဲ့တွေ ထိန်းချုပ်ထားရာ နေရာတွေကို တိုက်ပွဲဖြစ်ပွားခြင်းမရှိပဲ လေကြောင်းကနေ ဗုံးကြဲတိုက်ခိုက်တာ ထိုးစစ်ဆင်တိုက်ခိုက်တာတွေ ရှိနေတာပါ။
ဒီကနေ့မှာတော့ စစ်ကောင်စီက လေကြောင်း လက်နက်ကြီးပစ်ကူများနဲ့ မြစ်ကြီးနားမြို့အနီး ထိုးစစ်ဆင်တိုက်ခိုက်နေတာကို “ Lamyang Mare makau ( လမြန် ကျေးရွာအနီး ) “ ဆိုပြီး ကချင်လွတ်မြောက်ရေးတပ်မတော် KIA ရဲ့ စစ်ဦးစီးချုပ် ဗိုလ်ချုပ်ကြီးဂွမ်မော်က သူရဲ့ လူမှုကွန်ရက်စာနှာကနေ အသိပေးထားပါတယ်။
စစ်ကောင်စီက အပစ်ရပ်တယ်လို့ ကြေညာပြီးနောက်မှာတော့ KIO/KIA ကလည်း ရက် ၂၀ ကြာအပစ်ရပ်တယ်လို့ ကြေညာခဲ့ပါတယ်။ စစ်ကောင်စီရဲ့ ထုတ်ပြန်ချက်ပါ အပိုဒ် ၄ ကို တိုင်းရင်းသားလက်နက်ကိုင်တွေနဲ့ တော်လှန်ရေးတပ်ဖွဲ့တွေအပြင် စစ်ကောင်စီကပါ လိုက်နာဖို့လိုအပ်တယ်လို့ ထုတ်ပြန်ချက်ထဲ အကြံပြုထားပါတယ်။
အပစ်ရပ်ထားတဲ့ကာလအတွင်း အများပြည်သူ သွားလာအသုံးပြုနေတဲ့ ဆက်သွယ်ရေးလမ်းကြောင်း တွေနဲ့ ပြည်သူလူထုရဲ့ အသက်အိုးအိမ်စည်းစိမ်ကို ထိခိုက် ပျက်စီးစေတာ၊ တပ်စခန်းတွေကို တိုက်ခိုက်တာ၊ တပ်ဌာနချုပ်တွေကို တိုက်ခိုက်တာ၊ အင်အားစုတာ၊ ပြင်ဆင်စုဖွဲ့တာ၊ နယ်မြေချဲ့ထွင်တာတွေကိုမပြုလုပ်ဖို့ စစ်ကောင်စီက ဆိုပါတယ်။
ပြင်းထန်တဲ့ ငလျင်ဘေးဒဏ်ကြောင့် အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက မတ်လ ၃၀ ရက်နေ့ကနေ ဧပြီ ၁၂ ရက်နေ့အထိ အပစ်ရပ်တယ်လို့ မတ်လ ၂၉ ရက်နေ့က ကြေညာခဲ့ပြီး စစ်ကောင်စီရဲ့ အပစ်ရပ်ကြေညာပြီးမှာတော့ တစ်စုံတစ်ရာ ထုတ်ပြန်လာတာ မရှိသေးပါဘူး။
ညီနောင် မဟာမိတ် သုံးဖွဲ့ဖြစ်တဲ့ ကိုးကန့်တပ် MNDAA၊ တအာင်းတပ် TNLA နဲ့ အာရက္ခတပ်တော် AA တို့က ဧပြီ ၁ ရက်နေ့ကနေ ဧပြီ ၃၀ ရက်အထိ တစ်လတာ အပစ်ရပ်တယ်လို့ ဧပြီလ ၁ ရက်နေ့က ထုတ်ပြန်ထားပါတယ်။
ကရင်နီတပ်ပေါင်းစုအဖွဲ့ကတော့ စစ်ကောင်စီရဲ့ တိုက်ခိုက်မှုရပ်တန့်ထားခြင်း မရှိတာကြောင့် သဘာဝဘေးအန္တရာယ် ကယ်ဆယ်ရေးလုပ်ငန်းများအပေါ် ချိန်ညှိပြီး စစ်ဆင်ရေးကို လုပ်ဆောင်သွားမယ်လို့ ဧပြီလ ၂ ရက်နေ့က ထုတ်ပြန်ကြေညာထားပါတယ်။
ကရင်အမျိုးသားအစည်းအရုံး KNU အနေနဲ့ ငလျင်နဲ့ပတ်သတ်ပြီး အရေးပေါ်လိုအပ်မှုတွေကို ကိုယ်စွမ်းဉာဏ်စွမ်းရှိသ၍ တတ်နိုင်တဲ့နည်းလမ်းနဲ့ ပါဝင်သွားမယ်လို့ ထုတ်ပြန်ထားပြီး ငလျင်လှုပ်ပြီး ကတည်းက တိုက်ခိုက်မှုတွေ မလုပ်တော့ကြောင်း KNU ပြောခွင့်ရ ပဒိုစောတောနီး ကသတင်းမီဒီယာတွေကို ပြောဆိုထားပါတယ်။
အင်အားပြင်းငလျင်လှုပ်ခတ်ပြီးနောက် ချင်းပြည်က မင်းတပ်၊ ကန်ပက်လက်မြို့တို့ကို မနေ့ကအထိ စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာရှိပြီး ဖလမ်းမြို့သိမ်းတိုက်ပွဲအတွင်း နှစ်ဖက် စစ်ရေးပြင်ဆင်နေတာပဲရှိတယ်လို့ ချင်းညီနောင်ပြောရေးဆိုခွင့်ရှိသူ ဆလိုင်းယောမာန်ကလည်း CJ Platform ကိုပြောပါတယ်။
ဓာတ်ပုံ – pro-SAC