မဲဆောက်တွင် ညဘက်ထွက်သည့် မြန်မာ ၉ ဦးဖမ်းဆီးခံရ၊ ၂ ဦးကို ရွာသူကြီးက ရိုက်နှက်အပြစ်ပေး
ထိုင်းနိုင်ငံ၊ တက်ခရိုင်၊ မဲဆောက်မြို့နယ်၊ မယ်ပရပ်ကွက်၊ ဘန်းမိုင်ရွာ(ဘတ်မိုင်)တွင် ယခုနှစ်၊ မတ်လ ၃၁ ရက်နေ့က ညမထွက်ရအမိန့်ဖောက်ဖျက်သည့် မြန်မာနိုင်ငံသား ကိုးဦးကို ရွာသူကြီးနှင့်အဖွဲ့က ဖမ်းဆီးခဲ့သည်ဟု ထိုဖြစ်စဉ်တွင်ပါဝင်သူမြန်မာအမျိုးသားတစ်ဦးက ပြောသည်။
ထိုင်း-မြန်မာနယ်စပ်မြို့ဖြစ်သော မဲဆောက်ရှိ ကျေးရွာအများစုတွင် ည ၉ နာရီကျော်လျှင် မြန်မာလူမျိုးများကို အပြင်မထွက်ရန် ကန့်သတ်မိန့်ထုတ်ပြန်ထားကြသည်။
“ကျွန်တော်တို့နှစ်ယောက်ကိုက အချင်းချင်းပြန်ရိုက်ခိုင်းတာ။ ကျွန်တော့်သူငယ်ချင်းက ကျွန်တော့်ကိုနာမှာစိုးလို့ ဖြေးဖြေးလေးရိုက်တာကို အဲဒီရွာသူကြီးက ‘အားနဲ့ရိုက်နော်။ မနာရင် မင်းကို ပြန်ရိုက်မှာ’ ဆိုပြီးတော့ အချင်းချင်းကို အားနဲ့ရိုက်ခိုင်းတာ” လို့ ရိုက်နှက်ခံရသူအမျိုးသားက ပြောသည်။
၎င်းတို့သည် နေအိမ်နှင့် မလှမ်းမကမ်းနေရာသို့ ယင်းနေ့ ည ၉ နာရီနောက်ပိုင်း စားသောက်စရာများထွက်ဝယ်စဉ် ဝှေ့ကလုတ်နှင့် ဘန်းမိုင်(ဘတ်မိုင်)ရွာကြားတွင် ရွာသူကြီးအပါအဝင် လူ ၁၀ ဦးနှင့်အထက်ပါဝင်သောအဖွဲ့၏ ဖမ်းဆီးခြင်းကိုခံခဲ့ရခြင်းဖြစ်သည်ဟု ယင်းအမျိုးသားအပြောအရ သိရသည်။
၎င်းတို့နှင့်အတူ ဖမ်းဆီးခံရသူ ၉ ဦးအနက် ၂ ဦးသာအပြစ်ပေးခံရခြင်းဖြစ်သည်ဟု သိရသည်။
ထိုင်းလူမျိုးများက လာရောက်ခေါ်ဆောင်သည့် ကျောင်းသားအရွယ်လူငယ်များပါဝင်သည့် ကျန်ခုနစ်ဦးကို အပြစ်ပေးသည့်အနေဖြင့် အမှိုက်ကောက်ခြင်းသာ ပြုလုပ်ခိုင်းမည်ဟုဆိုကာ ရွာသူကြီးက ပြန်လွှတ်ပေးခဲ့သည်ဟု သိရသည်။
ရိုက်နှက်အပြစ်ပေးခံရသူ မြန်မာအမျိုးသားနှစ်ဦးမှာ ထိုင်းနိုင်ငံတွင် ထိုင်းနိုင်ငံတွင် တရားဝင်နေထိုင်ခွင့်အထောက်အထားစာရွက်စာတမ်းများ အပြည့်အစုံရှိကြသည်ဟု သိရသည်။
“ကျွန်တော်တို့ကို လာထုတ်တဲ့လူမရှိလို့ အရိုက်ခံရတာမျိုးတော့မဟုတ်ဘူး။ ဖမ်းတဲ့သူတွေက အထောက်အထားရှိရင် လုပ်ပေးတဲ့သူဆီ ဖုန်းဆက်ဆိုလို့ ပွဲစားဆီအရင်ဆက်လိုက်တယ်။ သူကပြောတယ်။ သူဋ္ဌေးက ဘန်ကောက်သွားနေတယ်ဆိုလို့ အိမ်ရှင်ကိုပဲ လှမ်းဆက်လိုက်တယ်။ ကျွန်တော်တို့ အိမ်ရှင်နဲ့ သူကြီးနဲ့ ဖုန်းပြောကြတယ်။ ဖုန်းပြောပြီးတော့မှ ကျွန်တော်တို့ကိုရိုက်တာ။ စဖမ်းခံရတဲ့အချိန်ကနေ အိမ်ပြန်ရောက်တဲ့အထိ အချိန်တွက်ကြည့်တာ တစ်နာရီကျော်ကြာတယ်။ ဘာကြောင့်ရိုက်တာလဲဆိုတာ မသိတော့ပါဘူး။ တမင်သူတို့ရိုက်ချင်လို့ ရိုက်တာလို့ပဲ သဘောထားရတော့မှာပေါ့” ဟု ရိုက်နှက်ခံခဲ့ရသူအမျိုးသားနှစ်ဦးအနက် တစ်ဦးက ပြောသည်။
ရွာသူကြီးနှင့်အဖွဲ့သည် မြန်မာလူမျိုးများကိုသာ ပစ်မှတ်ထား အပြစ်ပေးခြင်းဖြစ်ကြောင်း ၎င်းက ပြောဆိုသည်။
ယင်းကဲ့သို့ရွာသူကြီးနှင့်အဖွဲ့၏ ဖမ်းဆီးခြင်းခံရဖူးသူ မဲဆောက်မြို့၊ ကျေးရွာတစ်ရွာတွင်နေထိုင်သည့် အသက် ၄၀ ကျော်အရွယ်ရှိ အမျိုးသားတစ်ဦးကလည်း “ကိုယ်က မူးပြီးပြန်လာတာကို။ ညတစ်ချက်ခွဲကြီးဆိုတော့ မယုံသင်္ကာဖြစ်တာပေါ့။ ခေါ်စစ်ခံရတယ်။ ကိုယ်ကမူးနေတာလေ။ အိမ်ကလူတွေကို လာခေါ်ခိုင်းတယ်။ လာခေါ်ပေးတယ်။ အဲဒီညက ၁၀ ယောက်လောက် အဖမ်းခံထားရတာတွေ့တယ်။ ကျွန်တော်တစ်ယောက်တည်း လွတ်တာ။ ကျန်တဲ့သူတွေကို ရဲကားပေါ်တင်ခေါ်သွားတယ်။ ဖြစ်တာ နှစ်လလောက်ရှိပြီ” ဟု ပြောသည်။
ထို့ပြင် မဲဆောက်ရောက်မြန်မာအမျိုးသမီးတစ်ဦးကလည်း လက်ရှိကျေးရွာများတွင်ဖြစ်ပေါ်နေသည့် အခြေအနေကို ယခုကဲ့သို့ပြောပြသည်။
“နောင်ဘွားရွာဘက်မှာလည်း ဖေဖော်ဝါရီလလောက်ထဲက သူကြီးအမိန့်ဆိုပြီး ည ၉ နာရီမထွက်ရ လုပ်သေးတယ်။ သူက ပိုက်ဆံနဲ့ နေထိုင်ခွင့်ကတ် တစ်နှစ်စာ လုပ်စေချင်တာ။ အထောက်အထားရှိလည်း သူတို့ပိုက်ဆံရဖို့ ဒီမှာနေမယ်ဆို လုပ်ရမယ့်သဘောပေါ့” ဟု ၎င်းက ပြောသည်။
မြန်မာနိုင်ငံတွင်ဖြစ်ပေါ်နေသော ပြည်တွင်းပဋိပက္ခနှင့် စစ်မှုထမ်းဥပဒေတို့ကြောင့် ကရင်ပြည်၊ မြဝတီမြို့နှင့်ထိစပ်နေသော မဲဆောက်မြို့အပါအဝင် ထိုင်းနိုင်ငံအတွင်းသို့ မြန်မာနိုင်ငံသားများ ရွှေ့ပြောင်းဝင်ရောက်မှု အလွန်များပြားလာနေပြီး စုစုပေါင်း မြန်မာ ခုနစ်သန်းခန့်အထိ ရှိနိုင်သည်ဟု ထိုင်းရောက် မြန်မာအရေးကူညီပေးနေသည့်အဖွဲ့အစည်းများ၏ ကိန်းဂဏန်းများအရ သိရသည်။
ထို့ကြောင့် မြန်မာနိုင်ငံသားအများစုနေထိုင်သည့် မဲဆောက်မြို့အတွင်း ၎င်းတို့ကို ထိုင်းအာဏာပိုင်များက ပစ်မှတ်ထား ဖမ်းဆီးခြင်း၊ ငွေညှစ်ခြင်းများနှင့် ဖိနှိပ်ခြင်းများရှိနေသည်ဟု ယင်းမြို့ရောက် မြန်မာနိုင်ငံသားများထံမှ သိရသည်။
ဓာတ်ပုံ – ပေးပို့