ရန်ကုန်မှာ စစ်အုပ်စုက ရွေးကောက်ပွဲအတွက် အိမ်ထောင်စုစာရင်း မိတ္တူတွေ တောင်းယူနေ
စစ်အုပ်စုက ရွေးကောက်ပွဲအတွက် ရန်ကုန်မြို့ပေါ်က မြို့နယ်အချို့မှာ အိမ်ထောင်စုစာရင်း မိတ္တူတွေကို စတင်ကောက်ယူနေတယ်လို့ ဒေသခံတွေဆီက သိရပါတယ်။
ရပ်ကွက်အုပ်ချုပ်ရေးမှူးတွေက တဆင့် ကောက်ယူခိုင်းတာဖြစ်ပြီး သေဆုံးစာရင်း၊ ပြည်ပထွက်ခွာသူတွေရဲ့ စာရင်းတွေကိုပါ ပူးတွဲကောက်ယူနေတယ်လို့ ရန်ကုန်မြို့နေ ပြည်သူတချို့က CJ Platform ကို ပြောပါတယ်။
“အုပ်ချုပ်ရေးမှူးတွေ ကောက်ခိုင်းတာ သန်းခေါင်စာရင်း မိတ္တူတွေ တောင်းတယ်။ နောက်ပြီး သေတဲ့ လူစာရင်းပါ ကောက်ခဲ့လို့ မှာပါတယ်။ ပြည်ပထွက်ခွာသူတွေ ဆိုရင်လည်း ဘာကြောင့် သွားတယ်၊ ဘယ်တော့ပြန်ရောက်မယ် ဆိုတာကို မေးခိုင်းတယ်” လို့ အုပ်ချုပ်ရေးမှူးနဲ့ နီးစပ်သူတစ်ဦးက ပြောပါတယ်။
ရန်ကုန်မြို့အတွင်း စစ်တပ်ရဲ့ လှုပ်ရှားမှုတွေကို အဓိက စောင့်ကြည့်နေတဲ့ Rangoon Scout Network ကလည်း အခုလို သန်းခေါင်စာရင်း မိတ္တူတွေ ကောက်ယူတာဟာ ရွေးကောက်ပွဲအတွက် လူစာရင်း စိစစ်တာဖြစ်ပြီး မြို့နယ်တော်တော်များများမှာ ကောက်ယူနေပြီလို့ အတည်ပြုပြောဆိုထားပါတယ်။
ဒါ့အပြင် ဧည့်စာရင်းနဲ့ နေထိုင်သူတွေကိုပါ ဒေသအလိုက် စိစစ်နေပြီး၊ ဧည့်စာရင်းတိုင် နေထိုင်သူတွေရဲ့ အိမ်ထောင်စုစာရင်းတွေကိုပါ ကောက်ခံတာဖြစ်တယ်လို့ သိရပါတယ်။
စစ်ကော်မရှင်က ရွေးကောက်ပွဲ ပထမအပိုင်း ကျင်းပမယ့် ရက်ကို အတည်ပြုပြီးတဲ့နောက် တယ်လီဖုန်း မက်ဆေ့ချ်တွေကနေ တစ်ဆင့် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့မှာ ရွေးကောက်ပွဲကို မြို့နယ် ၁၀၂ မြို့နယ်အတွင်း ကျင်းပမယ် ဆိုတဲ့ စာသားတွေ ပေးပို့နေပါတယ်။
ရန်ကုန်မြို့ပေါ်မှာလည်း စစ်တပ်က လုံခြုံရေး တင်းကြပ်တာမျိုးတွေ ပိုလုပ်လာသလို ရွေးကောက်ပွဲအတွက် လုံခြုံရေး ကြီးကြပ်မှုကော်မတီကိုလည်း သြဂုတ်လ ၂၆ ရက်နေ့မှာ ဖွဲ့စည်းခဲ့ပါတယ်။
ဓာတ်ပုံ – လူမှုကွန်ရက်
ပုံစာ – စစ်အုပ်စုမှ လူဦးရေနှင့်သန်းခေါင်စာရင်း ကောက်ယူခဲ့စဉ် (ပုံဟောင်း)