“ဝ”တပ်မတော်က ငလျင်ဘေးသင့် ပြည်သူတွေအတွက် ကျပ်သန်းနှစ်ထောင် ကူညီမယ်
“ဝ”ပြည် သွေးစည်းညီညွတ်ရေးတပ်မတော် UWSA က ငလျင်ဘေးသင့် မြန်မာပြည်သူတွေအတွက် ကျပ်သန်းနှစ်ထောင် ကူညီသွားမယ်လို့ ထုတ်ပြန်လာပါတယ်။
ပဋိပက္ခတွေကို ခေတ္တရပ်စဲပြီး ကူညီကယ်ဆယ်ရေး လုပ်ငန်းတွေမှာ အဖွဲ့အစည်းအားလုံး အတူပူးပေါင်းပါဝင်ကြဖို့ကိုလည်း UWSA က တိုက်တွန်းထားပါတယ်။
UWSA အနေနဲ့ ကယ်ဆယ်ရေးအဖွဲ့တွေကို အဆင်သင့်ပြင်ဆင်ထားပြီး သက်ဆိုင်ရာဌာနတွေရဲ့ တောင်းဆိုမှုအရ ငလျင်ဘေးသင့်တဲ့ နေရာတွေဆီကို အချိန်မရွေး သွားရောက် ကယ်ဆယ်နိုင်ဖို့ အသင့်ပြင်ထားတယ်လို့လည်း သူတို့ရဲ့ ထုတ်ပြန်ချက်မှာ ဖော်ပြထားပါတယ်။
ပြည်သူတွေဟာ စစ်ဘေးဒဏ်ကို ကြုံတွေ့နေရပြီးဖြစ်တာကြောင့် ငလျင်ဘေးကနေ အချိန်မီကယ်ဆယ်နိုင်ရေး၊ အကူညီတွေ အဟန့်အတားမရှိ ရရှိရေးနဲ့ ဘေးအန္တရာယ်ပြန်လည်တည်ဆောက်ရေး လုပ်ငန်းတွေ ဆောင်ရွက်ခွင့် ရရှိရေးကိုလည်း အားလုံး ပါဝင်ပြီး အကောင်အထည်ဖော် ဆောင်ရွက်ကြမယ်လို့ မျှော်လင့်တယ်လို့ UWSA က ဆိုပါတယ်။
မနေ့ မတ်လ ၂၈ရက်နေ့မှာ လှုပ်ခတ်ခဲ့တဲ့ ငလျင်ကြောင့် မြန်မာနိုင်ငံအတွင်း ပျက်စီးဆုံးရှုံးမှုတွေ များပြားခဲ့ပြီး လူဦးရေ ရာကျော် သေဆုံးကာ ပျောက်ဆုံးနေသူတွေလည်း အများအပြား ရှိနေပါတယ်။
ဓာတ်ပုံ – UWSA