တောင်ကုတ်က စစ်ကောင်စီအဓိကတပ်ရင်း နှစ်ခုကို နှစ်ရက်ဆက် AA သိမ်းပိုက်
တိုက်ပွဲပြင်းထန်နေတဲ့ ရခိုင်ပြည်၊ တောင်ကုတ်မြို့က စစ်ကောင်စီရဲ့ အဓိက တပ်ရင်းနှစ်ခုကို နိုဝင်ဘာ ၂၇ နဲ့ ၂၈ ရက် နှစ်ရက်ဆက် အာရက္ခတပ်တော်(AA)က သိမ်းပိုက်ရရှိခဲ့တယ်လို့ စစ်ရေးသတင်းရင်းမြစ်တွေဆီကနေ သိရပါတယ်။
တောင်ကုတ်မြို့အခြေစိုက် စစ်ကောင်စီတပ်ရဲ့ စစ်ဆင်ရေးကွပ်ကဲမှုဌာနချုပ်(စကခ-၅) လက်အောက်ခံ ခမရ-၃၄၆ နဲ့ ခမ-၅၄၄ တပ်ရင်းနှစ်ခုလုံးကို AA က အင်အားအလုံးအရင်းနဲ့ တိုက်ခိုက်သိမ်းပိုက်နိုင်ခဲ့တာဖြစ်တယ်လို့ စစ်ရေးသတင်းရင်းမြစ်တစ်ဦးက ပြောပါတယ်။
“အညံ့ခံသူတချို့တွေလည်းရှိပေမဲ့ အများစုက AA ထိုးစစ်ကို ပြန်ခုခံတယ်။ ဒီနေ့မှာတော့ တပ်ရင်းနှစ်ခုလုံးကို AA ရသွားပြီ။ စကခ-၅ ပဲကျန်တယ်” လို့ သူက ပြောပါတယ်။
ယမန်နေ့ နိုဝင်ဘာလ ၂၇ ရက်နေ့ညနေပိုင်းမှာ ခမရ-၃၄၆ ကို သိမ်းပိုက်ရရှိခဲ့ပြီး ခမရ-၅၄၄ ကိုတော့ ဒီကနေ့ နိုဝင်ဘာလ ၂၈ ရက်နေ့ မနက်ပိုင်းမှာ သိမ်းပိုက်ရရှိခဲ့တာဖြစ်တယ်လို့ သူက ဆက်ပြောပါတယ်။
လက်ကျန် စကခ-၅ ကို ဆက်လက်ထိုးစစ်ဆင် တိုက်ခိုက်နေတယ်လို့ သိရပါတယ်။
“စကခ-၅ ကိုပါ သိမ်းနိုင်ပြီဆိုရင် တောင်ကုတ်တစ်ခုလုံးက AA လက်ထဲရောက်ပြီ။ အခုအင်အားအလုံးအရင်းနဲ့ ဝင်တိုက်နေတာလို့သိရတယ်။ သိမ်းပိုက်နိုင်ခဲ့ရင်တော့ ၁၂ မြို့မြောက်ဖြစ်ပြီ” လို့ CJ Platform ရဲ့ စစ်ရေးရင်းမြစ်တစ်ဦးက ပြောပါတယ်။
ဒီလိုစခန်းတွေသိမ်းပိုက်လိုက်နိုင်တာနဲ့ပတ်သက်ပြီး ထပ်မံအတည်ပြုနိုင်ဖို့ AA ရဲ့ ပြောရေးဆိုခွင့်ရှိသူ ဦးခိုင်သုခကို CJ Platform က ဆက်သွယ်မေးမြန်းနေဆဲဖြစ်ပါတယ်။
AA အနေနဲ့ တောင်ကုတ်မြို့ရှိ စစ်ကောင်စီရဲ့ တပ်စခန်းတွေကို အောက်တိုဘာလ ၃၁ ရက်နေ့မှာစတင်ထိုးစစ်ဆင်တိုက်ခိုက်ခဲ့ပြီး တောင်ကုတ်မြို့ပေါ်က တပ်စခန်းတွေကို နိုဝင်ဘာလ ၂၀ ရက်နေ့မှာကတည်းက AA က သိမ်းပိုက်ထိန်းချုပ်ထားပြီးဖြစ်တယ်လို့ မြေပြင်စစ်ရေးသတင်းရင်းမြစ်တွေဆီက သိရပါတယ်။
ဒါကြောင့် တောင်ကုတ်မြို့သိမ်းတိုက်ပွဲ တစ်လအတွင်း စကခ-၅ တပ်မကလွဲလို့ တပ်စခန်းအားလုံးကိုသိမ်းပိုက်ရရှိခဲ့ပြီဖြစ်တယ်လို့ ဒေသခံတွေက ပြောပါတယ်။
လက်ရှိ တောင်ကုတ်မြို့သိမ်းတိုက်ပွဲဟာ ဆက်လက်ပြင်းထန်နေပြီး စစ်ကောင်စီဘက်က လေကြောင်းကနေ ပြန်လည်ခုခံနေတယ်လို့ မြေပြင်စစ်ရေးရင်းမြစ်တွေက ပြောပါတယ်။
ရခိုင်ပြည်အတွင်း တောင်ကုတ်မြို့အပြင် အမ်း၊ မောင်တောနဲ့ ဂွမြို့တို့မှာလည်း တိုက်ပွဲပြင်းထန်နေပြီး AA က အရှိန်မြှင့်ထိုးစစ်ဆင်တိုက်ခိုက်နေတာကြောင့် ၂၀၂၅ မတိုင်မီ ကျသွားနိုင်တယ်လို့ နိုင်ငံရေးလေ့လာသုံးသပ်သူတွေက သုံးသပ်ထားကြပါတယ်။
ဓာတ်ပုံ- AA Info Desk
ပုံစာ- ရခိုင်ပြည်၊ အမ်းမြို့ရှိ စစ်ကောင်စီတပ်ရင်းတစ်ခုကို သိမ်းပိုက်ရရှိပြီးနောက် AAတပ်ဖွဲ့ဝင်တွေကို တွေ့ရစဉ်