အဇာဘိုင်ဂျန် ခရီးသည်လေယာဉ်ကို ရုရှားပစ်ချခဲ့တာလို့ ဆို
လူပေါင်း ၃၈ ဦးသေဆုံးခဲ့ရတဲ့ ဒီဇင်ဘာ ၂၅ ရက်နေ့က ပျက်ကျခဲ့တဲ့ အဇာဘိုင်ဂျန် ခရီးသည်လေယာဉ်ဟာ မတော်တဆမှုကြောင့် ပျက်ကျခဲ့တာ မဟုတ်ဘဲ ရုရှားရဲ့ လေကြောင်းရန် ကာကွယ်ရေးစနစ်က ပစ်ချလို့ ပျက်ကျခဲ့တာဖြစ်တယ်လို့ နိုင်ငံတကာသတင်းဌာနတွေက ဖော်ပြပါတယ်။
ရိုက်တာသတင်းဌာနရဲ့ ဖော်ပြချက်အရ ဗုဒ္ဓဟူးနေ့က ကာဇက်စတန် Aktau မြို့အနီးမှာ ပျက်ကျခဲ့တဲ့ လေယာဉ်ဟာ ပြင်ပ နည်းပညာဆိုင်ရာ တိုက်ခိုက်မှုနဲ့ ကြုံတွေ့ခဲ့ရတယ်လို့ ဒီကနေ့ ဒီဇင်ဘာလ ၂၇ ရက်နေ့မှာ အဇာဘိုင်ဂျန်လေကြောင်းလိုင်းက အသိပေးထားတယ်လို့ ဆိုပါတယ်။
အဲဒီလေယာဉ်ပေါ်မှာ လေယာဥ်အဖွဲ့သား ၅ ဦးအပါအဝင် ၆၇ ဦးပါရှိခဲ့ပြီး လူ ၂၉ ဦးကတော့ အသက်ရှင်ကျန်ခဲ့ပါတယ်။ ဒီ ရှင်ကျန်ခဲ့သူတွေထဲမှာ ကလေး ၂ ယောက်ဦးလည်း ပါဝင်တယ်လို့ နိုင်ငံတကာသတင်းဌာနတွေက ဖော်ပြထားပါတယ်။
လေယာဉ်ပျက်ခဲ့တဲ့ ပြီးခဲ့တဲ့ ဗုဒ္ဓဟူးနေ့မှာတော့ ရုရှားအစိုးရက ရုရှားအပေါ် ယူဆချက်တွေနဲ့ မစွပ်စွဲဖို့ သတိပေးခဲ့ပါတယ်။ ဒါပေမဲ့ အခုလို ရုရှားရဲ့ လေကြောင်းရန်ကာကွယ်ရေး စနစ်ကြောင့် အဇာဘိုင်ဂျန် ခရီးသည်လေယာဉ် ပျက်ကျခဲ့တာလို့ သတင်းတွေ ထွက်ပေါ်လာတဲ့နောက်မှာတော့ ရုရှားဘက်က ဖြေရှင်းလာတာတွေ မရှိသေးပါဘူး။
ဓာတ်ပုံ – Reuters
ပုံစာ – အဇာဘိုင်ဂျန် ခရီးသည်လေယာဉ် ပျက်ကျပြီး မြင်ရပုံ