ရခိုင်လူမျိုးတွေရဲ့ နှစ်ပေါင်းများစွာ ပျောက်ဆုံးနေတဲ့ ရှေးဟောင်း ယတြာခေါင်းလောင်းကို AA တူးဖော်တွေ့ရှိ
နှစ်ပေါင်းများစွာပျောက်ဆုံးနေတဲ့ ရခိုင်ပြည်ရဲ့ အလေးအမြတ်ထားရာ ရှေးဟောင်း ယတြာခေါင်းလောင်းကို ရခိုင်ပြည်၊ ကျောက်တော်မြို့ မဟာမုနိဘုရားကုန်းတော်ရဲ့ အနောက်ဘက်ရှိ မဟာမုနိဘုန်းတော်ကြီးကျောင်း တစ်နေရာကနေ အာရက္ခတပ်တော်(AA)က တူးဖော် တွေ့ရှိထားတယ်လို့ ဆိုပါတယ်။
ယတြာခေါင်းလောင်းကိုတွေ့ရှိခဲ့ချိန်ဟာ ပြီးခဲ့တဲ့ ဇူလိုင်လမှာဖြစ်ပြီး AA တပ်ရဲ့ ခေါင်းဆောင် ဗိုလ်ချုပ်ထွန်းမြတ်နိုင် ရခိုင်ပြည်ကို ရောက်ရှိလာချိန်နဲ့ထပ်တူကြနေတာ ဖြစ်ပါတယ်။
ခေါင်းလောင်းရှိတဲ့နေရာကို ပြောပြသူကတော့ မဟာမုနိဘုရား ဂေါပကဟောင်းဖြစ်ခဲ့ဖူးသူ အသက် ၈၅ နှစ်အရွယ် ဦးထွန်းအောင်ဆိုသူ ဖြစ်ပါတယ်။ သူ့အသက် ၂၄ နှစ်ကတည်းကအဖေ ၊ဦးလေးတို့နဲ့အတူ ခေါင်းလောင်းကို တွေ့ရှိခဲ့ပြီး ရခိုင်ပြည်ရဲ့ အမွေအနှစ်ပစ္စည်းဖြစ်တာကြောင့် နေရာပြောင်းရွှေ့ကာ လျှို့ဝှက်ထားခဲ့တယ်လို့ ဆိုပါတယ်။
ဦးထွန်းအောင်ရဲ့ ပြောဆိုချက်အရ အရင်နှစ်များစွာက အစိုးရခေတ်အဆက်ဆက် အဲဒီခေါင်းလောင်းရဲ့တည်နေရာကို ရှာဖွေတူးဖော်ခဲ့ကြပြီး မက်လုံးပေးကမ်းလှမ်းမှုတွေ ရှိခဲ့ပေမယ့် သူ့အနေနဲ့ ထုတ်ဖော်ပြောဆိုခဲ့ခြင်းမရှိခဲ့ဘူးလို့ သိရပါတယ်။
လက်ရှိမှာတော့ အသက်အရွယ်ရလာခြင်းနဲ့အတူ ကျန်းမာရေးလည်းမကောင်းတဲ့အတွက် AA ခေါင်းဆောင်နဲ့အဖွဲ့ကို စိတ်ချယုံကြည်တာကြောင့် နှစ် ၆၀ကျော် ထိန်းသိမ်းပြီး ဝှက်ထားခဲ့တဲ့ ခေါင်းလောင်းတည်နေရာကို ထုတ်ဖော်ပြောဆိုလာတာလို့ ဆိုပါတယ်။
“ ထွန်းမြတ်နိုင်ကို ငါယုံတယ်..။ ထွန်းမြတ်နိုင်နဲ့ ခေါင်းဆောင်တွေကို ငါ ယုံတယ်”လို့ စာရေးဆရာ ဝေဟင်အောင်က ဦးထွန်းအောင်ရဲ့ပြောဆိုချက်ကို လူမှုကွန်ရက်ပေါ်မှာ ရေးသားဖော်ပြထားပါတယ်။
လက်ရှိမှာတော့ ဦးထွန်းအောင်ကို ခေါင်းလောင်းတည်နေရာကို ပြောပြတဲ့အတွက် AA က ဆုငွေ သိန်း ၅၀၀ ကို ပေးအပ်ခဲ့ပြီး အဲဒီငွေတွေကို မဟာမုနိဘုန်းကြီးကျောင်းဆောင်ပြီးအောင် ဆောက်လုပ်ရာမှာ လှူဒါန်းမှာဖြစ်ကြောင်း ဦးထွန်းအောင်က ပြောဆိုကြောင်း သိရပါတယ်။
ယတြာခေါင်းလောင်းကို ရခိုင် မြောက်ဦးခေတ်မှာရခိုင်ဘုရင် နရပတိကြီး ( ၁၆၃၈-၁၆၄၅) လက်ထက်က သွန်းလုပ်ခဲ့ကြောင်း သမိုင်းသုတေသီတွေက အတည်ပြုပြီးဖြစ်သလို သမိုင်းအထောက်အထားတွေလည်း ရှိနေပါတယ်။
ယတြာခေါင်းလောင်းမှာ အင်းကွက်ကြီး (၈)ကွက် ပါရှိပြီး အင်းကွက်ထဲတွင် မြီ(ပထဝီ) အင်း၊ မီး(တေဇော)အင်း၊ ရီ(အာပေါ) အင်း၊ လီ(ဝါယော) အင်း ဟု ဓာတ်ကြီး (၄)ပါးကို အတိုက်တစ်ကွက် အခံတစ်ကွက်နဲ့ တစ်မျိုးကို နှစ်ကွက်ကျစီ စီမံပြုလုပ်ထားတယ်သိရပါတယ်။
ရခိုင်ဘုရင်တွေက ယတြာခေါင်းလောင်းတစ်ချက်ထိုးလိုက်တာနဲ့ ရန်သူပြည်တွေဟာ စိစိညက်ညက်ပျက်စီးတတ်တယ်လို့ ငယ်စဉ်က ပုံပြင်ဇာတ်လမ်းအဖြစ် ကြားဖူးကြောင်း စာရေးဆရာ ဝေဟင်အောင်က လူမှုကွန်ရက်မှာ ရေးသားထားပါတယ်။
ဓာတ်ပုံ- APM