ကြာသပတေးနေ့အတွက် CJ Platform ရဲ့ အားကစားသတင်းတိုများစုစည်းမှု
ရက်ချ်ဖိုဒ့်ရဲ့ အေးဂျင့်တွေနဲ့ ဘာစီလိုနာအမှုဆောင်အရာရှိတွေ ပေါ်တူဂီမှာတွေ့ဆုံ
ဇန်နဝါရီစျေးကွက်အတွင်း မန်ယူအသင်းကနေ ထွက်ခွာဖို့ ပြင်ဆင်နေတဲ့ အင်္ဂလန်တိုက်စစ်မှူး မားကပ်စ် ရက်ချ်ဖို့ဒ်ရဲ့ အေးဂျင့်တွေဟာ ပြီးခဲ့တဲ့ အင်္ဂါနေ့တုန်းက ဘင်ဖီကာနဲ့ ချန်ပီယံလိဂ်ပွဲကစားဖို့ ပေါ်တူဂီနိုင်ငံကို ရောက်ရှိလာတဲ့ ဘာစီလိုနာအသင်းရဲ့ အမှုဆောင်တွေနဲ့ တွေ့ဆုံခဲ့တယ်လို့ သိရပါတယ်။ ဘာစီလိုနာအသင်းဟာ ရက်ချ်ဖို့ဒ်ကို ခေါ်ယူဖို့ စိတ်ဝင်စားနေပေမဲ့ အသင်းမှာရှိနေတဲ့ ကစားသမားတချို့ကို ရှင်းထုတ်ပြီးမှသာ ခေါ်ခွင့်ရမှာပါ။ အဲဒီအခြေအနေနဲ့ ပတ်သက်ပြီး ဘာစီလိုနာအသင်းရဲ့ အားကစားဒါရိုက်တာ ဒေကိုက “ဘဏ္ဍာရေး မျှခြေစည်းမျဉ်းအရ ကျွန်တော်တို့ အသေအချာကိုင်တွယ်နေရပါတယ်။ အပြောင်းအရွှေ့ နောက်ဆုံးရက်တွေအထိ အကောင်းဆုံးဖြစ်ဖို့ ကြိုးစားသွားမှာပါ။ အခုထိတော့ ထူးခြားမှုမရှိသေးပါဘူး” လို့ ပြောထားပါတယ်။
****************************************
ဆက်စ်ကို ကို ခေါ်ယူဖို့ လိုက်ပ်ဇစ်ထံ စုံစမ်းမေးမြန်းခဲ့တဲ့ အာဆင်နယ်
အာဆင်နယ်အသင်းဟာ ဇန်နဝါရီစျေးကွက်မှာ တိုက်စစ်ပိုင်း အင်အားဖြည့်တင်းနိုင်ရေးအတွက် လိုက်ပ်ဇစ်အသင်းရဲ့ တိုက်စစ်မှူး ဘင်ဂျမင် ဆက်စ်ကို ကို ခေါ်ယူနိုင်ဖို့ ဆက်သွယ်စုံစမ်းမှုတွေ ပြုလုပ်ခဲ့တယ်လို့ talkSPORT က ဖော်ပြလာခဲ့ပါတယ်။ အာဆင်နယ်အသင်းဟာ ဇန်နဝါရီလအတွင်းမှာပဲ အဓိက တိုက်စစ်သမားဖြစ်တဲ့ ဂျေးဆုက ACL ဒဏ်ရာကြောင့် ကာလရှည်အနားယူရတော့မှာဖြစ်လို့ ကစားသမားသစ် အားဖြည့်ဖို့ လိုအပ်နေခဲ့တာပါ။ အသက် ၂၁ နှစ်အရွယ် ဆလိုဗေးနီးယားလက်ရွေးစင် ဆက်စ်ကိုဟာ ဒီရာသီဘွန်ဒက်စ်လီဂါမှာ သွင်းဂိုး ရှစ်ဂိုးနဲ့ ဖန်တီးမှု နှစ်ကြိမ် ရယူထားပါတယ်။
****************************************
ကွန်ဟာအတွက် ကလပ်စံချိန်တင်ကြေးနဲ့ ကမ်းလှမ်းမယ့် နော်တင်ဟမ်ဖောရက်စ်
ဒီရာသီ ပရီးမီးယားလိဂ်မှာ ပုံစံကောင်းတွေပြသနေပြီး အမှတ်ပေးဇယား အဆင့် ၃ မှာ ရပ်တည်နေနိုင်တဲ့ နော်တင်ဟမ်ဖောရက်စ်အသင်းကတော့ ၀ုလ်ဗ်အသင်းရဲ့ တိုက်စစ်မှူး မားသီးယပ်စ် ကွန်ဟာအတွက် ကလပ် စံချိန်တင်ပြောင်းရွှေ့ကြေးပေးပြီး ကမ်းလှမ်းဖို့ အသင့်ဖြစ်နေပြီလို့ သိရပါတယ်။ နော်တင်ဟမ်ဖောရက်စ်ဟာ ကွန်ဟာကို စိတ်ဝင်စားနေတဲ့အသင်း ငါးသင်းထဲက တစ်ခုဖြစ်ပြီး သူ့ကို စိတ်ဝင်စားနေတဲ့အသင်းတွေထဲမှာ အာဆင်နယ်လည်း ပါဝင်နေပါတယ်။ ကွန်ဟာဟာ ဒီရာသီ ၀ုလ်ဗ်နဲ့အတူ အထူးခြေစွမ်းပြနေပြီး စာချုပ်က ၂ နှစ်ခွဲ ကျန်နေသေးတာကြောင့် ပေါင်သန်း ၆၀ လောက်အထိ ပေးချေရဖွယ်ရှိနေတယ်လို့ သိရပါတယ်။
****************************************
ဒေါက်ကလပ် လူးဝစ်အတွက် အပြိုင်ကြိုးပမ်းနေကြတဲ့ မန်စီးတီးနဲ့ ချဲလ်ဆီး
မန်စီးတီးနဲ့ ချဲလ်ဆီးတို့ဟာ ဂျူဗင်တပ်စ်အသင်းရဲ့ ကွင်းလယ်လူ ဒေါက်ကလပ် လူးဝစ်ကို အငှားစာချုပ်နဲ့ ခေါ်ယူနိုင်ဖို့အတွက် ကြိုးပမ်းနေတယ်လို့ သိရပါတယ်။ ဂျူဗင်တပ်စ်နည်းပြ သီယာဂို မော့တာဟာ ဒေါက်ကလပ် လူးဝစ်ကို သူ့ရဲ့ အနာဂတ်အစီအစဉ်တွေမှာ မပါတော့တာကြောင့် ထုတ်ရောင်းဖို့ ပြင်ဆင်နေတာပါ။ ဂျူဗင်တပ်စ်ဟာ ပြီးခဲ့တဲ့ ရာသီကမှ ဗီလာကနေ ပေါင် ၄၂ သန်း ဝန်းကျင်နဲ့ ခေါ်ယူထားခဲ့တဲ့ ဘရာဇီးလ်သားအတွက် မြင့်မားတဲ့ ပြောင်းရွှေ့ကြေးတစ်ရပ်တော့ အလိုရှိနေပါတယ်။ မန်စီးတီးနဲ့ ချဲလ်ဆီးတို့ကတော့ အပြီးသတ်ခေါ်ယူရေးထက် အငှားသာခေါ်ချင်နေတာကြောင့် အသေးစိတ်ညှိနှိုင်းမှုတွေ ဆက်လက်လုပ်ဆောင်ရဖွယ် ရှိတယ်လို့ သိရပါတယ်။
ဓာတ်ပုံ – Goal, skysports