ဝက်လက်မြို့က ဒေသကာကွယ်ရေးတပ်ဖွဲ့တချို့ ပြည်သူတွေအပေါ် ဘယ်လိုပြုမူဆက်ဆံနေသလဲ? ပြည်သူပြောတဲ့ ပြည်သူ့ PDF တွေအကြောင်း

---

စစ်ကိုင်းတိုင်း၊ ဝက်လက်မြို့နယ်အတွင်း နွေဦးတော်လှန်ရေးနဲ့အတူ လက်နက်မဲ့ပြည်သူတွေကို ကာကွယ်ဖို့ ပေါက်ဖွားလာတဲ့ ပြည်သူ့ကာကွယ်ရေးတပ်တွေ ပြည်သူတွေကို ဘယ်လိုပြုမူဆက်ဆံနေပါသလဲ။ ဘယ်လိုကာကွယ်နေပါသလဲ။ အဲဒီက LPDF နဲ့ ဒေသခံတို့ကြား ဆက်ဆံရေးအခြေအနေ၊ LPDF တွေကြောင့် ဒေသခံတွေ အခက်အခဲကြုံနေစေပါသလား စတဲ့ အကြောင်းအရာတွေကို ဒေသခံများထံ CJ Platform က စုံစမ်းမေးမြန်းထားတာတွေကို ကောက်နုတ်ဖော်ပြအပ်ပါတယ်။

 

၀က်လက်မြို့နယ် ပြည်သူ့အုပ်ချုပ်ရေးဆိုင်ရာ နီးစပ်သူဒေသခံတစ်ဦးရဲ့ ပြောကြားချက် >>>

• ဇူလိုင် ၁၆ ရက်က ဝက်လက်မြို့နယ် ပအဖနဲ့ ပကဖတွေ အစည်းဝေးပြုလုပ်ခဲ့၊
• အဲဒီအစည်းအဝေးမှာ မြို့ဝင်/ထွက်မှာ ဆန်၊ ဆီ၊ စက်သုံးဆီ လူသုံးကုန်သယ်ခွင့် ရွှေဘိုခရိုင် တပ်ရင်း ၂ က တင်းကျပ်နေတယ်လို့ လူသားစာနာဌာနက တင်ပြခဲ့၊
• မြို့နယ် ပကဖ ခေါင်းဆောင် ဦးနေမျိုးအောင်က ဒါဟာ မူအရ MoD ခွင့်မပြုဘဲလုပ်မရလို့ တပ်ရင်းနဲ့ ညှိနှိုင်းမယ်လို့ပြော၊
• အဓိက ပကဖနဲ့ တပ်ရင်းတို့ ပေါင်းလုပ်တာလို့ဆို၊
• ဇူလိုင် ၁၄ မှာ စားသောက်ကုန်ဂျက်ဖာကို PDF စစ်ဆေးရေးဂိတ်က သိမ်းယူခဲ့၊
• ခရိုင်က ပေးလို့ပြောမှ ပြန်ရ
• ၀က်လက်မြို့အ၀င်ရှိ တပ်ရင်းနဲ့ ပကဖ ပူးပေါင်းစောင့်တဲ့ သခွတ္တောနဲ့ ရေလည်ဂိတ်တို့မှာ ပြည်သူတွေရဲ့ ကုန်ပစ္စည်းတွေ သိမ်းခြင်း၊ ပြုမူပြောဆိုပုံ ဆိုးရွားစွာ လုပ်ဆောင်၊
• ရှိုန်းမက္ကားက မုဒိမ်းမှုနဲ့ ထောင်ခုနစ်နှစ်ချခံထားရသူကို လာဘ်ငွေရယူပြီး ၂ နှစ်ကျော်နဲ့ လွှတ်ပေး၊
• လူသတ်မှုအပါအ၀င် အကြမ်းဖက်ပုဒ်မနဲ့ အကျဥ်းသားများကိုလည်း ထိုနည်းတူ လွှတ်ပေးထား၊
• ဖမ်းမိ သုံ့ပန်း သုံးယောက် ပလဖတွေ ပေါ့လျော့လို့ လွတ်မြောက်၊
• မြို့အတွင်း စစ်တပ်ရဲ့ ရွှေပန်းကုန်းစခန်းတစ်ခုသာ သိမ်းထားနိုင်၊
• ပြည်သူအပေါ် ရိက္ခာဖြတ်တောက်ခြင်း၊ မာန်မဲခြင်း၊ ရိုက်နှက်ခြင်းများ ပြုလုပ်နေ၊

မြို့နေပြည်သူများကို မြို့နယ်နိမိတ်ပြင်ပ ထွက်နေကြရန် တော်လှန်ရေးရဲဘော်တချို့က ပြောတယ်လို့ ဆိုပါတယ်။

 

ရွှေဘိုခရိုင် ပြည်သူ့ကာကွယ်ရေးတပ်ရင်းတစ်ခုရဲ့ အဖွဲ့၀င်တစ်ဦးရဲ့ ပြောကြားချက် >>>

 

• ဝက်လက်မြို့မှာ စစ်ရေးလှုပ်ရှားမှု အနည်းငယ်ပဲလုပ်ပြီး ပြည်သူတွေကို ကန့်သတ်ဖိနှိပ်နေ
• အမျိုးသမီးတစ်ဦးရဲ့ ဆန်လေးဘူးကို စစ်တပ်ရိက္ခာဖြစ်မှာစိုးလို့ဆိုပြီး သိမ်းဆည်း၊
• မြို့နယ်ထဲက မတရားမှုနဲ့ အဂတိမှုတွေကို အဆင့်ဆင့်တင်ပြတိုင်ကြားပေမဲ့ MoD ဘက်က အရေးမယူပေးလို့ အောက်ခြေမှာ လုပ်ချင်ရာလုပ်ကိုင်နေတယ်လို့ ဆိုပါတယ်။
• ဇူလိုင် ၈ ရက်က ဗကသရဲဘော် မြင့်မြတ်ဦး သတ်ဖြတ်ခံရ၊
• စစ်တပ်ဂိတ်နဲ့ဝေးသလို ဒေသတွင်းမှ လုပ်ကြံသတ်ဖြတ်ခြင်းဖြစ်နိုင်လို့ စုံစမ်းပေးဖို့ အဆင့်ဆင့်တင်ပြပေမဲ့ ဆောင်ရွက်မှုအားနည်း၊
• ရွဲရွာပကဖ ဦးမြင့်ဝေကို လွန်ခဲ့တဲ့ ၂ လခန့်က မျက်နှာဖုံးစွပ်လူတစ်စုက လာခေါ်သွားပြီးနောက် ရွာပြင်သင်္ချိုင်းအနီးမှာ သေဆုံးလျက်ပြန်တွေ့၊
• သံသယရှိသူတွေကို ခေါ်ယူစစ်ဆေးခဲ့ပေမဲ့ အမှုမှန်မပေါ်ပေါက်သေး၊
• ဒါကြောင့် ပြည်သူတွေ တော်လှန်ရေးအင်အားစုအပေါ် ယုံကြည်မှုနည်းလာသလို ထောက်ပံ့မှုလျော့ကျလာ၊
• တော်လှန်ရေးတပ်ဖွဲ့ဝင်တွေရဲ့ သတ်ဖြတ်ခံရတဲ့ ပြည်သူတွေရှိပေမဲ့ ဘယ်သူ့တိုင်ကြားရမှန်း မသိဖြစ်နေ၊

တိုင်ကြားသူတချို့ ပျောက်ကွယ်သွားရတဲ့ မှုခင်းဖြစ်ရပ် အများအပြားရှိတယ်လို့ ဆိုပါတယ်။

 

ဒေသခံ အမျိုးသမီးတစ်ဦးရဲ့ ပြောကြားချက် >>>

• တခြားမြို့နယ်တွေကို တစ်ဆင့်ခံကားသမားများထံ မှာယူရာမှာ PDF ဂိတ်တွေက သယ်ယူခွင့်ကန့်သတ်၊
• ခရီးသွားဒေသခံတွေအပေါ် ကြမ်းကြမ်းတမ်းတမ်းနဲ့ နိုင့်ထက်စီးနင်းပြောဆို၊

 

ဝက်လက်မြို့ခံတစ်ဦးရဲ့ ပြောကြားချက် >>>

• ရွာတစ်ရွာက အမွေဆိုင်လယ်ယာမှုကို မျှတအောင် လုပ်ဆောင်မပေး၊

၁၀ ဧကမြေပေါ် ၅ ဧကမှာသာ လုပ်ကိုင်ခွင့်ရလို့ နစ်နာသူက မြို့နယ်ကို တင်ပြပေမဲ့ မလုပ်ပေးလို့ ခရိုင်သို့ တိုင်ကြားထားတယ်လို့ ဆိုပါတယ်။

 

ဒါဟာ ဝက်လက်မြို့နယ်အတွင်း ဖြစ်ပွားနေတဲ့ ဖြစ်စဉ် အချို့ ဖြစ်တယ်လို့ CJ Platform ရဲ့ အညာသတင်းထောက်က စုစည်း သတင်းပေးပို့ပါတယ်။