အင်္ဂါ မနက်အတွက် CJ Platform ရဲ့ အားကစားသတင်းတိုများ စုစည်းမှု
အီဒူးရဲ့နေရာကို လူးဝစ် ကမ်ပိုစ့်နဲ့ အစားထိုးချင်နေတဲ့ အာဆင်နယ်
အာဆင်နယ်အသင်းဟာ အီဒူးထွက်ခွာသွားလို့ လစ်လပ်နေတဲ့ အားကစားဒါရိုက်တာ ရာထူးအတွက် ပီအက်စ်ဂျီအသင်းမှာ တာဝန်ထမ်းဆောင်နေတဲ့ လူးဝစ် ကမ်ပိုစ့်ကို ခေါ်ယူနိုင်ဖို့အတွက် ဆက်သွယ်မှုတွေပြုလုပ်နေပါတယ်။
ကမ်ပိုစ့်နဲ့ ပီအက်စ်ဂျီတို့ရဲ့ စာချုပ်ဟာ ဒီရာသီအကုန်မှာ ကုန်ဆုံးမှာဖြစ်ပြီး ပီအက်စ်ဂျီဘက်ကတော့ စာချုပ်သစ်ကမ်းလှမ်းထားပါတယ်။
ကမ်ပိုစ့်ဟာ ၂၀၁၃ ကနေ ၂၀၁၆ အထိ မိုနာကိုအသင်းမှာ အားကစားဒါရိုက်တာအဖြစ် ဆောင်ရွက်ခဲ့စဉ်က ဖယ်လ်ကာအို၊ မာရှယ်၊ ဘာနာဒိုဆေးလ်ဗားနဲ့ ဂျိမ်းစ် ရိုဒရီဂွက်စ်တို့ကို ခေါ်ယူပေးနိုင်ခဲ့သလို ၂၀၁၇ ကနေ ၂၀၂၀ အထိ လိုင်လီအတွက် အလုပ် လုပ်ချိန်မှာလည်း အိုဆင်ဟမ်၊ ရာဖယ် လီယာအိုနဲ့ လက်ရှိအာဆင်နယ်ခံစစ်မှူး ဂါဘရီရယ်လ် မာဂယ်ဟေးတို့ကို ခေါ်ယူပေးနိုင်ခဲ့သူဖြစ်ပါတယ်။
ရာသီကုန်ချိန်မှာ စာချုပ်ကုန်ဆုံးမှာဖြစ်ပြီး ကမ်ပိုစ့်အနေနဲ့ ပရီးမီးယားလိဂ်မှာ အလုပ် လုပ်ခွင့်အတွက် အာဆင်နယ်ကို ရွေးချယ်မလား၊ ပီအက်စ်ဂျီနဲ့ သက်တမ်းတိုးမလားဆိုတာ စောင့်ကြည့်ရမှာပါ။
ဇက်ခ်ဇီးကို အလိုက်ပေးပြီး အိုဆင်ဟမ်ကိုခေါ်ယူဖို့ ကြိုးစားမယ့် မန်ယူ
မန်ယူအသင်းဟာ လာမယ့်ဇန်နဝါရီအပြောင်းအရွှေ့မှာတော့ အသင်းမှာ ပုံမှန်ခြေစွမ်းပျောက်ဆုံးနေတဲ့ ဂျိုရှူအာ ဇက်ခ်ဇီးကို အလိုက်ပေးပြီး နာပိုလီအသင်းရဲ့ တိုက်စစ်မှူး အိုဆင်ဟမ်ကိုခေါ်ယူဖို့ ကြိုးစားဖွယ်ရှိတယ်လို့ အီတလီအခြေစိုက်သတင်းဌာနတစ်ခုဖြစ်တဲ့ Calcio Napoli က ရေးသားဖော်ပြလာခဲ့ပါတယ်။
လက်ရှိအချိန်မှာ အသက် ၂၅ နှစ်အရွယ် ရှိပြီဖြစ်တဲ့ အိုဆင်ဟမ်ဟာ ဂါလာတာစာရေးအသင်းမှာ အငှားသွားရောက် ကစားနေတာဖြစ်ပြီး နာပိုလီနည်းပြ ကွန်တီရဲ့ စိတ်ကြိုက်ကစားသမားမဟုတ်တာကြောင့် သင့်တော်တဲ့ကမ်းလှမ်းမှုမျိုးရခဲ့ရင် ရောင်းထုတ်သွားဖို့ ရှိနေပါတယ်။
ပွဲကစားချိန်နည်းလွန်းတာကြောင့် အီတလီကို ပြန်ချင်နေတဲ့ ချီယေဆာ
ပြီးခဲ့တဲ့နွေစျေးကွက်မှာ ဂျူဗင်တပ်စ်ကနေ လီဗာပူးလ်အသင်းထံ ရောက်လာခဲ့တဲ့ အီတလီတောင်ပံတိုက်စစ်သမား ချီယေဆာကတော့ ပွဲကစားချိန်နည်းပါးလွန်းတာကြောင့် အီတလီမြေကို ပြန်ချင်နေတယ်လို့ သိရပါတယ်။
ချီယေဆာဟာ ဒီရာသီမှာ လီဗာပူးလ်အတွက် သုံးပွဲသာ ကစားခွင့်ရထားပြီး အဲဒီ သုံးပွဲလုံးမှာ ပွဲကစားချိန်ဟာ ၇၈ မိနစ်တည်းသာ ရှိခဲ့တာပါ။ ဒါကြောင့် ပုံမှန်ခြေစွမ်းပြန်ရနိုင်ဖို့အတွက် ပွဲကစားခွင့်ရမယ့် အသင်းဆီကို အငှားထွက်ဖို့ ဆန္ဒရှိနေတာဖြစ်ပါတယ်။
လက်ရှိမှာတော့ သူ့ကိုခေါ်ယူဖို့အတွက် အင်တာမီလန်အသင်းက စောင့်ကြည့်နေတယ်လို့ သိရပါတယ်။
ဥရောပထိပ်တန်းလိဂ်တွေမှာပဲ ဆက်ကစားချင်သေးတဲ့ ပေါ့ဂ်ဘာ
ဂျူဗင်တပ်စ်အသင်းနဲ့ စာချုပ်ဖျက်သိမ်းပြီးနောက် အသင်းလက်မဲ့ ဖြစ်နေတဲ့ ပြင်သစ်ကွင်းလယ်လူ ပေါလ် ပေါ့ဂ်ဘာက သူ့ကစားသမားဘ၀ကို ဥရောပထိပ်တန်းလိဂ် ငါးခုထဲက အသင်းတွေနဲ့ပဲ ဆက်လက်ဖြတ်သန်းချင်တယ်လို့ ESPN နဲ့ အင်တာဗျူးမှာ ဖွင့်ဟခဲ့ပါတယ်။
ပေါ့ဂ်ဘာဟာ တားမြစ်ဆေးသုံးစွဲမှုကြောင့် ပွဲပယ်ခံထားရရာကနေ လာမယ့်ဇန်နဝါရီမှာ လေ့ကျင့်ခန်းဆင်းနိုင်တော့မှာဖြစ်ပြီး မတ်လထဲမှာတော့ တရားဝင်ပွဲကစားခွင့် ပြန်လည်ရရှိမှာဖြစ်ပါတယ်။
ပေါ့ဂ်ဘာကို ခေါ်ယူဖို့အတွက် မေဂျာလိဂ်ကလပ် အင်တာမိုင်ယာမီနဲ့ ဆော်ဒီကလပ်တွေက စောင့်ကြည့်နေကြပေမယ့် ကစားသမားကတော့ ထိပ်တန်းလိဂ်တွေမှာ ဆက်ကစားချင်သေးတယ်လို့ ဆိုထားတာကြောင့် ဘယ်အသင်းကို ရောက်ဦးမလဲ စောင့်ကြည့်ရမှာဖြစ်ပါတယ်။
ရာထူးက ထုတ်ပယ်ခံရနိုင်တဲ့အထိ ဖိအားများတဲ့ ရှောင်ဒိုက်ချ်အတွက် ဒီဇင်ဘာကာလ
အဲဗာတန်နည်းပြ ရှောင်ဒိုက်ချ်အတွက်တော့ ဒီဇင်ဘာလဟာ တကယ့်ကို အကျပ်အတည်း ကာလအဖြစ် ရင်ဆိုင်ရဖို့ ရှိနေပါတယ်။ လက်ရှိအချိန်မှာ အဲဗာတန်အသင်းဟာ ၁၁ ပွဲကစားပြီးချိန်မှာ နှစ်ပွဲသာ အနိုင်ရထားပြီး တန်းဆင်းဇုန်နဲ့ သုံးမှတ်အကွာ အဆင့် ၁၆ မှာ ရပ်တည်နေတာပါ။
ဒီဇင်ဘာလထဲမှာတော့ အဲဗာတန်ဟာ မန်ယူ (အဝေးကွင်း)၊ ဝုလ်ဗာဟမ်တန် (အိမ်ကွင်း)၊ လီဗာပူး (အိမ်ကွင်း)၊ အာဆင်နယ် (အဝေးကွင်း)၊ ချယ်လ်ဆီး (အိမ်ကွင်း)နဲ့ မန်စီးတီး (အဝေးကွင်း) တို့ကို ရင်ဆိုင်ရမှာဖြစ်ပါတယ်။
ပွဲကျပ်ကာလဖြစ်တာကြောင့် ရှောင်ဒိုက်ချ်အနေနဲ့ အကောင်းဆုံး မစွမ်းဆောင်နိုင်ဘူးဆိုရင်တော့ ရာထူးကနေ ထုတ်ပယ်ခံရဖို့များတယ်လို့ Football Insider က ခန့်မှန်းထားခဲ့ပါတယ်။ ရှောင်ဒိုက်ချ်ဟာ နောက်ဆုံး နှစ်ရာသီဆက် အဲဗာတန်ကို တန်းဆင်းလုနီးပါး အခြေအနေတွေက ကယ်တင်နိုင်ခဲ့သူလည်း ဖြစ်ပါတယ်။
ဓာတ်ပုံ – Goal