ဘန်ကောက်စစ်ဘေးရှောင်စခန်းကို စစ်ကောင်စီ ဗုံးထပ်ကြဲ
ရှမ်း-ကယား (ကရင်နီပြည်) နယ်စပ်ရှိ ဖယ်ခုံမြို့နယ် လအိကျေးရွာအနီးက ဘန်ကောက်စစ်ဘေးရှောင် စခန်းကို စစ်ကောင်စီက ဒီကနေ့ မနက်မှာ ဗုံးကြဲတိုက်ခိုက်ခဲ့လို့ ထိခိုက်ဒဏ်ရာရရှိခဲ့သူတချို့ ရှိခဲ့ပြီး အဆောက်အအုံတွေ ထိခိုက်ပျက်စီးခဲ့တယ်လို့ အမှတ် ၁၀၀၇ မိုးဗြဲပြည်သူ့ကာကွယ်ရေးတပ် ၂ (1007 Battalion MOEBYE People Defence Force – 2) ရဲ့ ထုတ်ပြန်ချက်အရ သိရပါတယ်။
နိုဝင်ဘာ ၁၈ ရက် မနက် ၁၁ နာရီခွဲခန့်မှာ ဂျက်ဖိုက်တာ နှစ်စင်းနဲ့ စစ်ကောင်စီက လေကြောင်းကနေ နှစ်ကြိမ်တိုက်ခိုက်ခဲ့ပြီး ပေါင် ၅၀၀ ဗုံးအပါအဝင် ဗုံး ၅ လုံးကြဲချ တိုက်ခိုက်ခဲ့တယ်လို့ ဆိုပါတယ်။
အဲဒီလို ဗုံးကြဲတိုက်ခိုက်ခဲ့တာကြောင့် ဘာသာရေး ဘုရားကျောင်းအပါအဝင် လူနေအိမ်တွေ၊ တဲတွေ စပါးကျီတွေ ပျက်စီးခဲ့ရတယ်လို့ ထုတ်ပြန်ထားချက်အရ သိရပါတယ်။
ဘန်ကောက်စစ်ရှောင်စခန်းဟာ ပြီးခဲ့တဲ့ စက်တင်ဘာ ၅ ရက်နေ့ကလည်း စစ်ကောင်စီလေကြောင်း တိုက်ခိုက်မှုကြောင့် ကလေးငယ်နဲ့ အမျိုးသမီးတွေ အပါအဝင် ၁၀ ထက် မနည်း သေဆုံးခဲ့ရပါတယ်။
ဘန်ကောက်စစ်ရှောင်စခန်းက စစ်ရှောင်အရပ်သားတွေကို ပစ်မှတ်ထား တိုက်ခိုက်မှုအပေါ် ကရင်နီအရပ်ဘက်အဖွဲ့အစည်းတွေ၊ မြန်မာအရပ်ဘက်အဖွဲ့အစည်းတွေနဲ့ တော်လှန်ရေးအင်အားစု စုစုပေါင်း ၃၁၆ ဖွဲ့က ပြီးခဲ့တဲ့ စက်တင်ဘာလ ၁၂ ရက်နေ့က ပြင်းပြင်းထန်ထန် ရှုတ်ချခဲ့ပါတယ်။
ဓာတ်ပုံ – 1007 MOBYE PDF 2
ပုံစာ – ဘန်ကောက်စစ်ဘေးရှောင်စခန်း တိုက်ခိုက်ခံရပြီး တွေ့ရစဉ်