ဒီတစ်ပတ် ငါတို့နိုင်ငံ ဘာထူးလဲ? (နိုဝင်ဘာ ၁၁ ရက်မှ ၁၆ ရက်နေ့အထိ)
ဒီတစ်ပတ် (နိုဝင်ဘာ ၁၁ ရက်မှ ၁၆ ရက်နေ့အထိ)အတွင်း တန်ဆောင်မုန်းလပြည့်နေ့နဲ့အတူ တန်ဆောင်တိုင်ပွဲတော်ကာလဖြစ်ခဲ့ပါတယ်။ ကထိန်ရာသီဖြစ်တာကြောင့် အလှူခံမဏ္ဍပ်တွေကဖွင့်တဲ့ ဆောင်းဘောက်နဲ့ လော်စပီကာအသံတွေနဲ့ ပဒေသာပင်လှည့်တဲ့ ကားပေါ်က အသံကျယ်ကျယ်တွေကြောင့် ဒေသခံတွေ အတိဒုက္ခတွေ့ခဲ့ကြရတာတွေ အပြောများခဲ့ကြပါတယ်။ သတင်းတွေဘက်မှာဆိုရင် ထူးထူးခြားခြားနဲ့ အမှတ်ရစရာအနေနဲ့ ရခိုင်ပြည်က တစ်ကျော့ပြန်တိုက်ပွဲတွေ စတင်ခဲ့တာ တစ်နှစ်ပြည့်သွားပါတယ်။ နောက်ပြီး လူငယ်ယောကျ်ားလေးချင်း ချစ်နှစ်သက်တဲ့အကြောင်းရေးတဲ့ ဝတ္ထုထုတ်ဝေသူတွေ စစ်ကောင်စီရဲ့ အရေးယူခံရမယ့်သတင်း၊ ကြက်ပျံမကျ စည်ကားနေတဲ့ တောင်ကြီးတန်ဆောင်တိုင် မီးပုံးပျံပွဲသတင်းတွေ၊ အညာဒေသ ပုလဲမြို့နယ်အတွင်းက တိုက်ပွဲသတင်းတွေနဲ့ ရှမ်းမြောက် တအာင်းဒေသ ဗုံးကြဲခံရလို့ ဒေသခံတွေ အထိနာရတဲ့သတင်းတွေနဲ့အတူ အထူးခြားဆုံးသတင်းတွေကို အနှစ်ချုပ်ဖော်ပြပေးသွားမှာ ဖြစ်ပါတယ်။
“မြို့ ၁၂ ခုသိမ်းပြီး တစ်နှစ်ပြည့်သွားတဲ့ AA”
ရခိုင်ပြည်အတွင်း အာရက္ခတပ်တော်(AA)ရဲ့ စစ်ကောင်စီကင်းစင်နယ်မြေဖြစ်လာရေး ပြီးခဲ့တဲ့ ၂၀၂၃ ခုနှစ် နိုဝင်ဘာ ၁၃ ကနေ့စခဲ့တဲ့ တစ်ကျော့ပြန်တိုက်ပွဲတွေ ဒီတစ်ပတ် နိုဝင်ဘာ ၁၃ ရက် ဗုဒ္ဓဟူးနေ့မှာ တစ်နှစ်ပြည့်ခဲ့ပါတယ်။
AA ရဲ့ ရခိုင်တစ်ကျော့ပြန်တိုက်ပွဲတွေဟာ ရှမ်းပြည်မြောက်ပိုင်းက ၁၀၂၇ စစ်ဆင်ရေးနဲ့တစ်ဆက်တည်း ပေါ်ပေါက်လာခဲ့တာဖြစ်ပါတယ်။
ပြီးခဲ့တဲ့နှစ် နိုဝင်ဘာ ၁၃ ရက်မှာ ရသေ့တောင်မြို့နယ်၊ ချိန်ခါလီနယ်ခြားစောင့်စခန်းကနေ AA တို့ တိုက်ပွဲ စတင်ခဲ့ပါတယ်။ စစ်ဆင်ရေးစစချင်း စစ်ကောင်စီရဲ့ အဓိက တပ်စခန်း ၄၀ ကျော်ကို တစ်လအတွင်း သိမ်းပိုက်နိုင်ခဲ့ပါတယ်။
အဲဒီနောက် ဒီနှစ် ၂၀၂၄ ဇန်နဝါရီလမှာတော့ ချင်းပြည်၊ ပလက်ဝဒေသတစ်ခုလုံးနဲ့ ပေါက်တောမြို့နယ်တွေကို သိမ်းပိုက်ပြီး မြို့သိမ်းတိုက်ပွဲတွေ စတင်နိုင်ခဲ့ပါတယ်။ ဆက်လက်ပြီး ဖေဖော်ဝါရီလမှာ ကျောက်တော်၊ မင်းပြား၊ မြေပုံနဲ့ မြောက်ဦး၊ မတ်လမှာ ပုဏ္ဏားကျွန်း၊ ရမ်းဗြဲနဲ့ ရသေ့တောင်၊ မေလမှာ ဘူးသီးတောင်မြို့တွေကို ဆက်တိုက်သိမ်းပိုက်ခဲ့ပြီးနောက် လေးလအကြာ စက်တင်ဘာလမှာတော့ စစ်ကောင်စီ ရေတပ်နဲ့ ငပလီကမ်းခြေရှိရာ သံတွဲမြို့ကို AA က သိမ်းပိုက်ခဲ့ပါတယ်။
ဒါဟာ စစ်ကောင်စီရဲ့ အားနည်းချက်ကို အပြည့်အဝရယူနိုင်ခဲ့တဲ့အတွက် အချိန်တိုအတွင်း အောင်မြင်မှုတွေ ရယူနိုင်ခဲ့တာဖြစ်တယ်လို့ AA က ထုတ်ပြောပါတယ်။
အာရက္ခဒေသတစ်ခုလုံး အာရက္ခပြည်သူ့လက်ထဲကို အမြန်ဆုံးရောက်ရှိစေဖို့ တစ်နှစ်လုံးမနားဘဲ စစ်ကောင်စီရဲ့ ကြည်း၊ ရေ၊ လေ ခုခံစစ်နဲ့ တန်ပြန်ထိုးစစ်တွေကြားကနေ ဒီလိုအောင်ပွဲတွေ ရယူနိုင်ခဲ့တာလို့ အာရက္ခတပ်တော်က ဆိုပါတယ်။
သိမ်းပိုက်ရရှိထားတဲ့ မြို့တွေမှာ စားဝတ်နေရေးနဲ့ ပြည်သူ့ဝန်ဆောင်ရေး လုပ်ငန်းတွေ လိုအပ်ချက်ရှိနေတယ်ဆိုတာသိထားပြီး အဲဒီ လိုအပ်ချက်တွေကို အနှေးနဲ့ အမြန် ဖြည့်ဆည်းပေးမယ်လို့ AA က ကတိပြုထားပါတယ်။
လက်ရှိ AA အနေနဲ့ အမ်း၊ တောင်ကုတ်၊ ဂွနဲ့ မောင်တောမြို့တွေကို ထိုးစစ်ဆင်တိုက်ခိုက်နေပြီး အပြီးသတ်သိမ်းပိုက်နိုင်ဖို့ လက်တစ်ကမ်းအလိုသာ ရှိတော့တယ်လို့ ပြောပါတယ်။
ဒါ့အပြင် မောင်တောတစ်မြို့လုံးကို သိမ်းပိုက်ထားပြီး နောက်ဆုံးကျန်တဲ့ စစ်ကောင်စီနယ်ခြားစောင့်တပ်-နခခ-၅ ကို ဆက်လက်ထိုးစစ်ဆင်တိုက်ခိုက်နေတယ်လို့ သိရပါတယ်။
အမ်းမြို့နယ်မှာတော့ ခမရ-၃၇၃၊ အမတ-၃၇၄၊ တိုက်ပွဲဝင်စည်းရုံးရေးသင်တန်းကျောင်း တသစ-၈၊ လေကြောင်းရန်ကာကွယ်ရေးတပ်နဲ့ စရဖတပ်တွေအပါအဝင် တပ်စခန်း ရှစ်ခုကို အာရက္ခတပ်တော်က သိမ်းပိုက်ထားပြီးပြီလို့ ထုတ်ပြန်ချက်မှာ ဖော်ပြပါတယ်။
အဲဒီမှာ နပခအပါအဝင် တပ်ရင်း/တပ်ဖွဲ့ ၁၀ ခုကျန်ရှိနေသေးပြီး ဆက်လက်ထိုးစစ်ဆင်နေတယ်လို့ သိရပါတယ်။
နောက်ပြီး ကိုးကန့်တပ် MNDAA ၊ တအာင်းတပ် (TNLA)နဲ့ AA တို့ရဲ့ ပြီးခဲ့တဲ့ ၂၀၂၃ ခုနှစ်ကစခဲ့တဲ့ ၁၀၂၇ စစ်ဆင်ရေး၊ ကရင်နီဒေသက ကရင်နီအမျိုးသားများကာကွယ်ရေးတပ်(KNDF)ရဲ့ ၁၁၁၁ စစ်ဆင်ရေးနဲ့ နွေဦးတော်လှန်ရေးနဲ့အတူ ပေါ်ပေါက်လာတဲ့ တော်လှန်ရေးတပ်တွေရဲ့ စစ်ဆင်ရေး စတဲ့စစ်ဆင်ရေးတွေမှာ စခန်းသိမ်း၊ မြို့သိမ်းတိုက်ပွဲတွေအထိ ဟန်ချက်ညီညီ ထိုးစစ်ဆင်နိုင်ခဲ့တာကြောင့် စစ်ကောင်စီရဲ့ တပ်ရင်း၊ တပ်မ၊ ဗျူဟာ၊ စကခဌာနချုပ်၊ ဒကစဌာနချုပ်နဲ့ တိုင်းစစ်ဌာနချုပ်တွေကို သိမ်းပိုက်ရယူနိုင်ခဲ့တာဖြစ်တယ်လို့ AA က ပြောထားပါတယ်။
ဒါကြောင့် AA အပါအဝင် တော်လှန်ရေးအဖွဲ့အစည်းအသီးသီးတို့ရဲ့ စစ်ရေးရည်မှန်းချက်တွေဟာ အတိုင်းအတာတစ်ခုအထိ အထမြောက် အောင်မြင်ခဲ့တယ်လို့ ဆိုပါတယ်။
တစ်နှစ်ကာလအတွင်း အသက်ပေးစွန့်လွှတ်ခဲ့ကြတဲ့ စစ်သည်တော်တွေ၊ ကိုယ်အင်္ဂါစွန့်လွှတ်ခဲ့ရသူတွေအပြင် စစ်ဆင်ရေးကို ပုံစံအမျိုးမျိုးနဲ့ အထောက်အပံ့ပေးနေသူအားလုံးကို အာရက္ခတပ်တော် AA အနေနဲ့ အလေးအနက် မှတ်တမ်းတင်ဂုဏ်ပြုတယ်လို့ ထုတ်ပြောလိုက်ပါတယ်။
ရခိုင်စစ်ရေးစောင့်ကြည့်လေ့လာသူတွေကတော့ အနောက်ပိုင်းတိုင်းစစ်ဌာနချုပ်(နပခ)(အမ်း)ကို သိမ်းပိုက်လိုက်နိုင်ပါက ရခိုင်တစ်ပြည်လုံးနီးပါး ထိန်းချုပ်နိုင်ပြီလို့ သုံးသပ်ပြောဆိုနေကြပါတယ်။
ဒါကြောင့် လာမယ့် ၂၀၂၅ ခုနှစ်အတွင်း ရခိုင်ပြည်ဟာ အာရက္ခတပ်တော် AA လက်အောက်ကို ရောက်ရှိလာဖွယ်ရှိတယ်လို့ သုံးသပ်ပြောကြားနေကြပါတယ်။
“ထုတ်/တင်ပေမဲ့ မကြိုက်ရင် ထောင်ချမယ့် စစ်ကောင်စီ”
စစ်ကောင်စီလက်အောက်ခံ ပြန်ကြားရေးဝန်ကြီးဌာနအနေနဲ့ အရင် စာပေ၊ သတင်းမီဒီယာတွေကို ပေးထားတဲ့ ထုတ်ပြီးမှ တင်ပြရတဲ့ ထုတ်/တင်စနစ်နဲ့ ခွင့်ပြုထားပါသေးတယ်။
ဒါပေမဲ့ အာဏာသိမ်းစစ်ကောင်စီလက်ပါးစေတွေဟာ သူတို့မကြိုက်ရင် အရေးယူတဲ့စနစ်ကို အသုံးပြုနေပါတယ်။
ဒီတစ်ပတ်ထဲမှာလည်း လူငယ်အမျိုးသားအချင်းချင်း ချစ်ကြိုက်တဲ့(Boy Love)အကြောင်း ရေးသားထားတဲ့ “1500 Miles to you” စာအုပ်နဲ့ “အမုန်းနဲ့ပျိုးတဲ့ ချစ်ခြင်းအလင်္ကာ” စာအုပ်တွေ ပုံနှိပ်ထုတ်ဝေသူတွေကို အရေးယူမယ်လို့ စစ်ကောင်စီက နိုဝင်ဘာ ၁၃ ရက် ဗုဒ္ဓဟူးနေ့ရက်စွဲနဲ့ ထုတ်ပြန်ခဲ့ပါတယ်။
အဲဒီစာအုပ်တွေကို စစ်ကောင်စီက ညစ်ညမ်းစာပေအနေနဲ့ သတ်မှတ်ပြီး တရားမဝင်ထုတ်ဝေတာဖြစ်တဲ့အပြင် ပုံနှိပ်ခြင်းနဲ့ ထုတ်ဝေခြင်းလုပ်ငန်း ဥပဒေ ပုဒ်မ ၈ နဲ့ ငြိစွန်းနေတယ်လို့ စွပ်စွဲထားပါတယ်။
အဲဒီစာအုပ်နှစ်အုပ်လုံးကို “Mahuyar” (မဟူရာ) ကလောင်နာမည်နဲ့ ရေးသားထားပြီး “အမုန်းနဲ့ပျိုးတဲ့ ချစ်ခြင်းအလင်္ကာ” စာအုပ်ဟာ စျေးကွက်ထဲမှာ တစ်အုပ်ကို ၁၆,၉၀၀ ကျပ်နဲ့ရောင်းချနေတာ ဖြစ်ပါတယ်။
စာအုပ်ရိုက်နိုပ်ခဲ့တဲ့ Right ပုံနှိပ်တိုက်နဲ့ ထုတ်ဝေခဲ့တဲ့ The Destiny Book House တို့ရဲ့ ပုံနိုပ်ထုတ်ဝေခွင့်လိုင်စင်တွေကို ပြန်သိမ်းမယ်လို့လည်း စစ်ကောင်စီရဲ့ ထုတ်ပြန်ချက်အတွင်း ဖော်ပြထားပါတယ်။
ပြီးခဲ့တဲ့ နိုဝင်ဘာ ၁၀ ရက် တနင်္ဂနွေနေ့က အများပြည်သူရုံးပိတ်ရက်တွေကို မှားယွင်းရိုက်နှိပ်ခဲ့တယ်ဆိုပြီး ပြက္ခဒိန် ပုံနှိပ်ထုတ်ဝေသူတွေကို နောက်ထပ်မဖြစ်ဖို့ ခံဝန်ကတိထိုးခိုင်းခဲ့တယ်လို့ စစ်ကောင်စီက ထုတ်ပြန်ထားပါတယ်။
“ကြက်ပျံမကျအောင် စည်ကားနေတဲ့ တောင်ကြီးတန်ဆောင်တိုင်”
ရှမ်းပြည်တောင်ပိုင်းရဲ့ အထင်ရှားဆုံးပွဲတော်လည်းဖြစ်၊ ပြည်တွင်း/ပြည်ပခရီးသွားတွေ စိတ်ဝင်စားတဲ့ မြို့တော်တောင်ကြီးက တန်ဆောင်တိုင်မီးပုံးပျံပွဲတော်ကို ဒီတစ်ပတ် နိုဝင်ဘာလ ၁၁ ရက်ကနေ ၁၇ ရက်နေ့အထိ အဝေရာမီးပုံးပျံကွင်းထဲမှာ ကျင်းပနေပါတယ်။
ဒါဟာ စစ်အာဏာသိမ်းအပြီး ဒုတိယအကြိမ်မြောက် ပြုလုပ်တာဖြစ်ပြီး ပြီးခဲ့တဲ့ ၂၀၂၃ ခုနှစ်မှာလည်း ပြုလုပ်ခဲ့ပါသေးတယ်။
အရင်နှစ်တုန်းက မစည်ကားခဲ့ပေမဲ့ ဒီနှစ်မှာတော့ ဒေသခံတွေအပြင် အနယ်နယ်အရပ်ရပ်က ဧည့်သည်တွေနဲ့ အလွန်စည်ကားတယ်လို့ မြို့ခံတွေဆီကနေ သိရပါတယ်။
အဲဒီက တောင်ကြီးမြို့ခံ အမျိုးသားတစ်ဦးပြောတာက “ပွဲဈေးဆိုင်ခန်းတွေတော့ နည်းတယ်။ လည်ပတ်တဲ့သူတွေများတယ်” လို့ ပြောပါတယ်။
အခုနှစ်မှာ စစ်ကောင်စီက လုံခြုံရေးတင်းကျပ်ထားပြီး မီးပုံးပျံကွင်းထဲ ဝင်ပေါက် သုံးပေါက်မှာ ကွင်းအတွင်းဝင်ခွင့်အတွက် တစ်ဦးချင်း မျက်နှာ Scan ဖတ်စိစစ်သလို X-Ray စက်နဲ့ အမျိုးသမီး၊ အမျိုးသားအလိုက် သီးခြားစီ ဖြတ်ပြီးမှ ဝင်ရောက်ခွင့်ပြုတယ်လို့ သွားရောက်ခဲ့တဲ့ မြို့ခံတွေက ပြောပါတယ်။
အခုနှစ်မှာ မီးပုံးပျံညမီးကြီး ၂၆ လုံး၊ စိန်နားပန်မီးပုံးပျံ ၂၄ လုံး၊ နေ့လွှတ်ခြေနှစ်ချောင်း ၁၄၇ လုံး၊ အရုပ်အုပ်စု ၂၃ လုံးနဲ့ ခြေလေးချောင်း ၃၈ လုံးအပါအဝင် မီးပုံး ၁၀၀ ကျော် လွှတ်တင်ပြီး ပါဝင်ယှဉ်ပြိုင်ကြမယ်လို့ သိရပါတယ်။
“ကျွဲနှစ်ကောင်ခတ်ရာ ကြားက နာရပြန်တဲ့ မြေစာပင် ပြည်သူတွေ”
ဗမာအမျိုးသားတော်လှန်ရေးတပ်မတော်(BNRA)နဲ့ ပူးပေါင်းတပ်တို့ စစ်ကိုင်းတိုင်း၊ ပုလဲမြို့နယ်ထဲက စစ်ကောင်စီတပ်စခန်းတွေကို နိုဝင်ဘာလ ၁၁ ရက် တနင်္လာနေ့က စတင်ပြီး စီးနင်းတိုက်ခိုက်ခဲ့ပါတယ်။ အဲဒီမှာ တိုက်ပွဲတွေ နိုဝင်ဘာ ၁၄ ရက် ကြာသပတေးနေ့အထိ လေးရက်ဆက်ဖြစ်ပွားခဲ့ပါတယ်။
နိုဝင်ဘာ ၁၁ ကနေ ၁၃ ရက်အထိ BNRA ဘက်က ထိုးစစ်ဆင်တိုက်ခိုက်ခဲ့ပြီး ၁၄ ရက်နေ့မှာတော့ စစ်ကောင်စီတပ်ဘက်က ပြန်လည်ထိုးစစ်ဆင်လာပြီးနောက် တော်လှန်ရေးတပ်ဖွဲ့တွေ ဆုတ်ခွာခဲ့ကြရပါတယ်။
အဲဒီမှာ စစ်ကောင်စီဘက်က လေကြောင်းတိုက်ခိုက်မှု အကြိမ်ရေ ၅၀ ထက်မနည်းပြုလုပ်ခဲ့တဲ့အပြင် လက်နက်ကြီးပစ်ခတ်မှုတွေလည်းပြုလုပ်တဲ့အတွက် ပုလဲမြို့ပေါ်က ပြည်သူလေးဦး သေဆုံးခဲ့ပြီး အရပ်သား ၁၀ ဦးထိခိုက်ခဲ့တယ်လို့ စစ်ကိုင်းပြည်သူဖေးမကူကွန်ရက်ရဲ့ ထုတ်ပြန်ချက်တွေအရ သိရပါတယ်။
ဒါ့အပြင် နေအိမ်မီးရှို့မှုတွေလည်းပြုလုပ်ခဲ့တဲ့အပြင် အဲဒီမှာ ထပ်မံစစ်ကြောင်းထိုးမယ်ဆိုတဲ့ သတင်းတွေလည်းပျံ့နှံ့နေပါတယ်။
ဒါကြောင့် ပုလဲမြို့နယ်က ဒေသခံတွေအပြင် အနီးပတ်ဝန်းကျင်က ဒေသခံတွေလည်း ထွက်ပြေးတိမ်းရှောင်နေကြရတယ်လို့ သိရပါတယ်။
ဒါကြောင့် ကနဦး စစ်ဘေးရှောင် တစ်သောင်းလောက်ပဲ ရှိခဲ့ပေမဲ့ နိုဝင်ဘာ ၁၆ ရက်နေ့အထိ စာရင်းတွေအရ စစ်ဘေးရှောင် နှစ်သောင်းလောက်အထိ တိုးလာတယ်လို့ အဲဒီမှာ ကူညီပေးနေသူတွေဆီကနေ သိရပါတယ်။
ဒါကြောင့် ရိက္ခာ၊ ဆေး၀ါးလိုအပ်ချက်နဲ့ ဆောင်းတွင်းအအေးဒဏ် ကာကွယ်ဖို့ အနွေးထည်နဲ့ စောင်တွေ အရေးပေါ်လိုအပ်နေတယ်လို့ ကူညီပေးနေသူတွေက ပြောပါတယ်။
အဲဒီ စစ်ဘေးရှောင်တွေဟာ ပုလဲမြို့နယ်အတွင်းရှိ ဘေးလွတ်ရာကျေးရွာတွေအပြင် နီးစပ်ရာဒေသတွေဖြစ်တဲ့ ဆားလင်းကြီးမြို့နယ်၊ ယင်းမာပင်မြို့နယ်တွေနဲ့ မကွေးတိုင်း၊ မြိုင်မြို့နယ်အတွင်းထိ သွားရောက်ခိုလှုံနေကြရတယ်လို့ သိရပါတယ်။
စစ်ရှောင်တွေကို သက်ဆိုင်ရာကျေးရွာက သံဃာတွေ၊ ရပ်ကျေး ပအဖ၊ ပကဖတွေက ဦးဆောင်ပြီး ကူညီစောင့်ရှောက်ပေးနေတယ်လို့လည်း ပုလဲမြို့နယ်ပအဖဆီကနေ သိရပါတယ်။
“စစ်ကောင်စီဗုံးဒဏ်ခံ နောင်ချိုနဲ့ မိုးကုတ် ဒေသခံတွေအထိနာ”
စစ်ခေါင်းဆောင် မင်းအောင်လှိုင် တရုတ်ခရီးစဉ်က ပြန်လာအပြီး ရက်ပိုင်းအတွင်းမှာပဲ ရှမ်းပြည်မြောက်ပိုင်းက စစ်ကောင်စီတပ်လက်လွှတ်ထားရတဲ့ တအာင်းတပ် TNLA ထိန်းချုပ်ဒေသတွေကို လေကြောင်းဗုံးကြဲမှုတွေ ပြင်းပြင်းထန်ထန်ပြုလုပ်ခဲ့ပါတယ်။
နိုဝင်ဘာလ ၁၀ ရက် တနင်္ဂနွေနေ့ ညနေပိုင်းမှာ နောင်ချိုမြို့ ရဲစခန်း၊ စျေးရပ်ကွက်နဲ့ တောင်ရပ်ကွက်တွေထဲ ဂျက်ဖိုက်တာနဲ့ ပေါင် ၃၀၀ ဗုံးကြဲချတိုက်ခိုက်တဲ့အတွက် နေအိမ် ခုနစ်လုံးပျက်စီးဆုံးရှုံးခဲ့တယ်လို့ PSLF/TNLA က ဆိုထားပါတယ်။
အဲဒီနောက် နိုဝင်ဘာ ၁၂ ရက် အင်္ဂါနေ့မှာလည်း နောင်ချို မြို့မဈေးနဲ့ တဝိုက်၊ မိုးကုတ်မြို့တွေကို ဗုံးထပ်ကြဲခဲ့ပါတယ်။
မန္တလေးတိုင်း၊ မိုးကုတ်မြို့ကို အဲဒီနေ့ ညသန်းခေါင်ယံအချိန်မှာ ဂျက်ဖိုက်တာနဲ့ ဗုံးငါးလုံး လာရောက်ကြဲချတိုက်ခိုက်မှုကြောင့် ဒေသခံ ကိုးဦး သေဆုံးပြီး ၁၃ ဦး ထိခိုက်ဒဏ်ရာရရှိခဲ့တယ်လို့ PSLF/TNLA က ပြောထားပါတယ်။
အဲဒီနောက် နေ့လယ်ပိုင်းမှာ နောင်ချို မြို့မဈေးကို ပေါင် ၅၀၀ ဗုံး လာရောက်ကြဲချမှုမှာ လန်းဆန်းအမည်ရှိ လက်ဘက်ရည်ဆိုင်ထဲ ကျရောက်ပေါက်ကွဲခဲ့တဲ့အတွက် ဒေသခံ ၁၁ ဦးသေဆုံးပြီး ၁၁ ဦး ဒဏ်ရာရရှိခဲ့ပါတယ်။
ဒါကြောင့် အဲဒီနေ့ တစ်ရက်တည်း နောင်ချိုနဲ့ မိုးကုတ်မြို့က ဒေသခံအယောက် ၂၀ သေဆုံးပြီး ၂၄ ဦး ထိခိုက်ဒဏ်ရာတွေရရှိခဲ့တယ်လို့ PSLF/TNLA ရဲ့ ထုတ်ပြန်ချက်တွေအရ သိရပါတယ်။
နိုဝင်ဘာ ၁၃ ရက်၊ ဗုဒ္ဓဟူးနေ့ မနက်ပိုင်းမှာတော့ မန္တလေး၊ ရှမ်းတောင်နဲ့ ရှမ်းမြောက် ဝင်/ထွက်ပေါက် နောင်ချိုမြို့နယ်၊ တောင်းခမ်းရွာက ဘုန်းကြီးကျောင်းနဲ့ အမတ-၃၅၄တပ်စခန်းနေရာတွေမှာ တိုက်ပွဲတွေဖြစ်ပွားခဲ့ပါတယ်။
ဒါ့အပြင် အဲဒီနေ့မှာပဲ စစ်ကောင်စီတပ်က ဂျက်ဖိုက်တာနဲ့ မကျီးရေရွာထဲကို ဗုံးတစ်ကြိမ်လာရောက်ကြဲချတိုက်ခိုက်ခဲ့တယ်လို့ PSLF/TNLA က ဆိုပါတယ်။
ဗုဒ္ဓဟူးနေ့ ညနေပိုင်းမှာပဲ စစ်ကောင်စီတပ်က ဂျက်ဖိုက်တာနဲ့ နောင်ချိုမြို့ပေါ်က တရားရုံးနဲ့ ရဲစခန်းအနောက်နေရာတွေကို ပေါင် ၃၀၀ ဗုံးနှစ်လုံး လာရောက်ကြဲချတိုက်ခိုက်ခဲ့တဲ့အတွက် အမျိုးသား လေးဦး ထိခိုက်ဒဏ်ရာရရှိခဲ့ပြီး တရားရုံးအပြင် နေအိမ်သုံးလုံးနဲ့ အိမ်စီးကားတွေ ထိမှန်ပျက်စီးခဲ့တယ်လို့ သိရပါတယ်။
ဒီတစ်ပတ်အတွင်း စစ်ကောင်စီက တအာင်းတပ်ထိန်းချုပ်ထားတဲ့ ရှမ်းမြောက်၊ နောင်ချိုမြို့နယ်နဲ့ မန္တလေးတိုင်း၊ မိုးကုတ်မြို့နယ်ထဲကို ဖျက်အားပြင်း ပေါင် ၃၀၀ နဲ့ ပေါင် ၅၀၀ ဗုံးတွေနဲ့ ငါးကြိမ်ထက်မနည်း လာရောက်ကြဲချခဲ့ပါတယ်။