စစ်ကောင်စီတပ်က ဒုတပ်ကြပ်တစ်ဦး KPLA ထံ လက်နက်တွေနဲ့ အလင်းဝင်လာ ဆုငွေ သိန်း၂၀ ချီးမြှင့်ခံရ
မန္တလေးတိုင်း မိတ္ထီလာမြို့ ရထပ (၁) အမှတ်(၁) ရှေ့တန်းအခြေချ ထောက်ပံ့နှင့် ပို့ဆောင်ရေးတပ်ရင်းက ဒုတပ်ကြပ် မင်းခန့်ကျော်ဟာ ကရင်နီပြည် ပြည်သူ့လွတ်မြောက်ရေးတပ်မတော် (KPLA-၉၄၂၅ )တပ်ရင်းဆီကို လက်နက်တွေနဲ့တကွ အလင်းဝင်ရောက်လာခဲ့တယ်လို့ KPLA က ဒီကနေ့ ဖေဖေါ်ဝါရီ ၁၂ရက်နေ့မှာ ထုတ်ပြန်လာခဲ့ပါတယ်။
အလင်းဝင်ရောက်ချိန်မှာ ဒုတပ်ကြပ် မင်းခန့်ကျော်ဟာ G-3 (BA-72) ၁လက် ၊ ကျည်အိမ် (၃) ဘောက် နှင့် ကျည်ဆံ ၁၂၀ တောင့်ကိုပါ ယူဆောင်လာခဲ့တာ ဖြစ်တယ်လို့ သိရပါတယ်။
ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေး တပ်ဦး (KNPLF)က ဆုငွေ သိန်း(၂၀) ချီးမြှင့်ခဲ့ပြီး KPLA-၉၄၂၅ တပ်ရင်းက ဒုတပ်ကြပ် မင်းခန့်ကျော်ကို လိုအပ်သည့် အကူညီတွေ ပံ့ပိုးပေးပြီး လုံခြုံစိတ်ချရတဲ့နေရာကို ပို့ဆောင်ပေးထားတယ်လို့ ထုတ်ပြန်ချက်မှာ ဖော်ပြထားပါတယ်။