ဒေါ်အောင်ဆန်းစုကြည်က မြန်မာပြည်ရဲ့ ငလျင်ဘေးအတွက် ဘယ်လောက်ထိ ပြင်ဆင်ထားခဲ့လဲ
မြန်မာနိုင်ငံမှာ နှစ်ပေါင်း ၁၈၆နှစ်တာအတွင်း အဆိုးဝါးဆုံးဖြစ်တဲ့ ငလျင်ဘေးဒဏ်ကို ကြုံတွေ့ခံစားခဲ့ရပါတယ်။ အာဏာသိမ်း မြန်မာစစ်တပ်ဟာ သဘာဝဘေး ရန်ပုံငွေတွေကိုပါ ထုတ်ယူသုံးစွဲခဲ့တာကြောင့် ငလျင်ဘေးကို တကယ်ကြုံတွေ့ရချိန်မှာ အရေးပုံကယ်ဆယ်ရေး ရန်ပုံငွေတွေ ရှိမနေခဲ့တော့ပါဘူး။
၂၀၁၅ခုနှစ်ကနေ ၂၀၂၀ခုနှစ်အထိ အစိုးရအဖြစ် တာဝန်ယူခဲ့တဲ့ ဒေါ်အောင်ဆန်းစုကြည် အစိုးရလက်ထက်မှာ မြန်မာနိုင်ငံရဲ့ ဘေးအန္တရာယ်အမျိုးမျိုးကို တုံ့ပြန်ဆောင်ရွက်နိုင်ဖို့နဲ့ ထိခိုက်ဆုံးရှုံးနိုင်ခြေလျှော့ချရေးအတွက် စီမံချက်များစွာကို ရေးဆွဲခဲ့ပြီး အရေးပုံရန်ပုံငွေတွေလည်း ထားရှိခဲ့ပါတယ်။
သဘာဝဘေးအန္တရာယ်ကြုံတွေ့ရချိန်မှာ အရေးပေါ် ကူညီကယ်ဆယ်ရေးတွေ လုပ်ဆောင်ဖို့ ရဟတ်ယာဉ် ငှါးရမ်းခဲ့တဲ့ ဒေါ်အောင်ဆန်းစုကြည်ကို အာဏာသိမ်း မြန်မာစစ်တပ်က အဂတိပုဒ်မနဲ့ပါ အမှုဖွင့်လှစ်ခဲ့ပါသေးတယ်။
“ဘေးအန္တရာယ်ရင်ဆိုင်တုံ့ပြန်နိုင်စွမ်း တည်ဆောက်ခြင်းသည် ရွေးချယ်စရာတစ်ခုအနေဖြင့် လုပ်ဆောင်ရမည့် ကိစ္စရပ်မဟုတ်ဘဲ မဖြစ်မနေဆောင်ရွက်ရမည့်လုပ်ငန်းတစ်ခုဖြစ်ပါသည်။ အတိတ် ကာလတွင် ကြုံတွေ့ခဲ့ရသည့် ဘေးအန္တရာယ်များသည် ခက်ခက်ခဲခဲ ကြိုးပမ်းတည်ဆောက်ထားရသော ဖွံ့ဖြိုးတိုးတက်မှုများအပေါ်တွင် ကြီးမားများပြားသည့် ထိခိုက်နစ်နာဆုံးရှုံးမှုများဖြစ်ပွားစေနိုင်ကြောင်း ကိုအထင်းသားပြသလျက်ရှိပါသည်။အမျိုးသားသဘာဝဘေးအန္တရာယ်ဆိုင်ရာစီမံခန်ခွဲမှုကော်မတီအနေ ဖြင့် မြန်မာနိုင်ငံ ဘေးအန္တရာယ်ကြောင့် ထိခိုက်ဆုံးရှုံးနိုင်ခြေလျှော့ချရေး လုပ်ငန်းစီမံချက် (၂၀၁၇) ကို ရေး ဆွဲ၍ ကျွန်မတို့နိုင်ငံကို ဘေးအန္တရာယ်အမျိုးမျိုးမှ ရင်ဆိုင်တုံ့ပြန်နိုင်စွမ်းရှိအောင် ဆောင်ရွက်ရာတွင် လက်တွေ့ လျှောက်လှမ်းရမည့်လမ်းကြောင်းကို ဖော်ဆောင်ပေးနိုင်ခဲ့သည့် အတွက်လည်း များစွာဝမ်းမြောက် ဂုဏ်ယူမိပါသည်။ ကျွန်မတို့နိုင်ငံ၏ ပင်မကျောရိုးသည် ကျွန်မတို့ပြည်သူများဖြစ်သည့်အတွက် ဤ စီမံ ချက် အကောင်အထည်ဖော်ရာတွင်လည်း ပြည်သူများ၏ အရေးပါသည့် အခန်းကဏ္ဍကို အထူး တလည်ပင် ဖော်ညွန်းနေရန် လိုအပ်မည်မထင်ပါ။ ကျွန်မတို့မြန်မာနိုင်ငံကို ဘေးအန္တရာယ်များမှ အမှန် တကယ် ရင်ဆိုင်တုံ့ပြန်နိုင်စွမ်း ရှိလာစေရေးအတွက် အမျိုးသားသဘာဝဘေးအန္တရာယ်ဆိုင်ရာ စီမံခန့် ခွဲမှု ကော်မတီနှင့် အားလုံးအတူတကွ လက်တွဲပူးပေါင်း ဆောင်ရွက်ပေးကြရန် တိုက်တွန်းမှာကြားအပ် ပါသည်”လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ မြန်မာနိုင်ငံ ဘေးအန္တရာယ်ကြောင့် ထိခိုက်ဆုံးရှုံးနိုင်ခြေ လျှော့ချရေး လုပ်ငန်းစီမံချက် (၂၀၁၇) ရဲ့ ဥယျောဇဉ်မှာ ရေးသား ခဲ့ဖူးပါတယ်။
ဒေါ်အောင်ဆန်းစုကြည် အစိုးရလက်ထက်မှာ လုပ်ဆောင်ခဲ့တဲ့ အမျိုးသားအဆင့် ငလျင်ဘေးအန္တရာယ် ကြိုတင်ပြင်ဆင်ရေးနှင့် တုံ့ပြန်ရေးစီမံချက်၊ ရန်ကုန်တိုင်းဒေသကြီး ငလျင်ဘေးအန္တရာယ် ကြိုတင်ပြင်ဆင်ရေးနှင့် တုံ့ပြန်ရေးစီမံချက်၊ မြန်မာနိုင်ငံ ဘေးအန္တရာယ်ကြောင့် ထိခိုက်ဆုံးရှုံးနိုင်ခြေလျှော့ချရေး လုပ်ငန်းစီမံချက်(၂၀၁၇) တွေကို ဒီနေရာမှာ ရယူနိုင်ပါတယ်။