ဟိုပုံးတွင် ပအိုးဝ်အမျိုးသားဝတ်စုံအသုံးပြုပြီး စစ်ကောင်စီ တပ်သားအင်အားဖြည့်တင်းမှုများပြုလုပ်နေ
ပအိုးဝ်အမျိုးသားဝတ်စုံများဝတ်ဆင်အသုံးပြု၍ ခိုးကြောင်ခိုးဝှက်ဖြင့် အင်အားဖြည့်တင်းမှုများပြုလုပ်နေကြောင်း ပအိုးဝ်အမျိုးသားလွတ်မြောက်ရေးတပ်မတော်(PNLA)၏ ထုတ်ပြန်ချက်အရ သိရသည်။
ထိုသို့အင်အားဖြည့်ရာတွင် အရပ်သားပြည်သူများ၏ မော်တော်ယာဉ်များကို အဓမ္မချောဆွဲကာ စစ်ကောင်စီတပ်ဖွဲ့ဝင်များ သွားလိုသည့်နေရာသို့ ပို့ဆောင်စေခိုင်းမှုများပြုလုပ်နေကြောင်း ထိုထုတ်ပြန်ချက်အတွင်း ထည့်သွင်းဖော်ပြထားသည်။
စစ်ကောင်စီအနေဖြင့် ပအိုဝ်းအမျိုးသားဝတ်စုံကို စစ်ယူနီဖောင်းအဖြစ် အသုံးပြုခြင်း၊ ပအိုဝ်းဒေသကို အကြမ်းဖက်တိုက်ခိုက်ခြင်းသည် ပအိုဝ်းတို့၏ အမျိုးသားဂုဏ်အင်္ဂါလက္ခဏာကို ဖျက်ဆီးခြင်းနှင့် စစ်ရာဇဝတ်မှုကျူးလွန်နေခြင်းပင်ဖြစ်သည်ဟု PNLA က ဆိုသည်။
ထို့ပြင် မတ်လ ၆ ရက်နေ့က စစ်ကောင်စီသည် ပအိုဝ်းဒေသ ဆီဆိုင်မြို့ကို ဒရုန်းဖြင့် ဓာတုအဆိပ်ငွေ့ဗုံးအသုံးပြု တိုက်ခိုက်မှုပြုလုပ်ခဲ့သည်ဟု PNLA က ဆိုသည်။
ထို့ကြောင့် PNLA ရဲဘော်များ အရေပြားယားယံခြင်း၊ မူးဝေခြင်း၊ အသက်ရှူမြန်ဆန်ခြင်း၊ မအီမသာခံစားရခြင်း၊ စိတ်လှုပ်ရှားမှု မြန်ဆန်ခြင်း၊ မောပန်းခြင်းနှင့် အောက်စီဂျင်ကျခြင်းများကို ပုံစံတူခံစားခဲ့ကြရပြီး ၎င်းတို့ကို ကုသပေးနေရဆဲဖြစ်ကြောင်း PNLA ၏ ယနေ့ မတ်လ ၈ ရက်ထုတ်ပြန်ချက်တွင် ဖော်ပြထားသည်။
ထိုပြင် ယမန်နေ့က စစ်ကောင်စီသည် ဆီဆိုင်မြိုနယ်အတွင်းသို့ လက်နက်ကြီးနှင့် ဒရုန်းများအသုံးပြုပြီး တိုက်ခိုက်ခဲ့ခြင်းကြောင့် နေအိမ်ခြောက်လုံးထက်မနည်း ထိခိုက်ပျက်စီးခဲ့ရသည်ဟု ယင်းထုတ်ပြန်ချက်အတွင်း ပါရှိသည်။
တစ်နိုင်ငံလုံးအပစ်အခတ်ရပ်စဲရေး(NCA)စာချုပ်တွင် လက်မှတ်ရေးထိုးထားသော PNLA နှင့် စစ်ကောင်စီ လက်အောက်ခံ ပအိုးဝ်ပြည်သူ့စစ်များနှင့် ပြီးခဲ့သည့် ဇန်နဝါရီ ၂၁ ရက်မှစတင်၍ တိုက်ပွဲများဖြစ်ပွားခဲ့ပြီးနောက် PNLA က ဆီဆိုင်မြို့ကို သိမ်းဆည်းထားသည့်အတွက် ပအိုးဝ်အုပ်ချုပ်ခွင့်ဒေသများဖြစ်သည့် ဆီဆိုင်၊ ဟိုပုံးမြို့နယ်များအပါအဝင် ရှမ်းပြည်(တောင်ပိုင်း)ဒေသအချို့၌ စစ်ကောင်စီ၊ ပအိုးဝ်ပြည်သူ့စစ်တို့နှင့် PNLA တို့ကြား တိုက်ပွဲများပြင်းထန်လျက်ရှိသည်။