သီပေါနောက်ဆုံးစော်ဘွား စဝ်ကြာဆိုင်၏ မဟာဒေဝီဖြစ်သူ ကွယ်လွန်
သျှမ်းပြည် သီပေါမြို့၏ နောက်ဆုံး စော်ဘွားတစ်ဦးဖြစ်သည့် စော်ဘွားစဝ်ကြာဆိုင်၏ မဟာဒေဝီဖြစ်သူ စဝ်စုစန္ဒီသည် ယမန်နေ့တွင် ကွယ်လွန်သွားပြီဖြစ်ကြောင်း ရှမ်းနိုင်ငံရေး အသိုင်းအဝန်းထံမှ သိသည်။
သီပေါစော်ဘွား စဝ်ကြာဆိုင်၏ မဟာဒေဝီ စဝ်စုစန္ဒီ ခေါ် Inge Sargent သည် သြစတြီးယားသူတစ်ဦးဖြစ်ပြီး အမေရိကန်နိုင်ငံရှိ ၎င်း၏စံအိမ်တွင် ယမန်နေ့ ဖေဖော်ဝါရီလ ၆ရက်နေ့ မနက်ပိုင်းမှာ နတ်ရွာစံ ကံတော်ကုန်ခဲ့တာပဲ ဖြစ်သည်။
၎င်းကွယ်လွန်ချိန်မှာ သက်တော် ၉၁ နှစ်ရှိပြီဖြစ်ပြီး သမီးတော် နှစ်ပါးဖြစ်သည့် မာယာရီနှင့် ကိန္နရီတို့ ကျန်ရှိခဲ့သည်။
မဟာဒေဝီ စဝ်စုစန္ဒီ နှင့် သီပေါစော်ဘွားစဝ်ကြာဆိုင်တို့သည် ၁၉၅၃ ခုနှစ် အမေရိကန်နိုင်ငံတွင် ကျောင်းတက်ရင်းတွေ့ ဆုံခဲ့ကြခြင်းဖြစ်ပြီး သျှမ်းပြည်အတွင်း ဒေသဖွံ့ဖြိုးရေးများ လုပ်ဆောင်ပေးမှုကြောင့် ထိုခေတ်အခါက သျှမ်းဒေသခံများ၏ ချစ်ခင်မှုကို ရရှိခဲ့ကြသူများ ဖြစ်သည်။
သို့သော် သီပေါစော်ဘွား စဝ်ကြာဆိုင်သည် ဗိုလ်ချုပ်ကြီးနေဝင်း ဦးဆောင်သည့် မြန်မာစစ်တပ်က တိုင်းပြည် အာဏာသိမ်းယူခဲ့သည့် ၁၉၆၂ ခုနှစ် မတ်လ ၂ ရက်နေ့ မတိုင်ခင် ရန်ကုန်မြို့တွင် ပြုလုပ်သည့် အမျိုးသားညီလာခံ တက်ရောက်ပြီး နောက်တစ်ရက် မတ်လ ၂ ရက်နေ့တွင် မြန်မာစစ်တပ်၏ ဖမ်းဆီးခြင်း ခံခဲ့ရပြီး ယနေ့ထက်တိုင် ပျောက်ဆုံး နေခဲ့တာပဲဖြစ်သည်။
ထိုသို့ ဖမ်းဆီးခံရခြင်းသည် သီပေါစော်ဘွား စဝ်ကြာဆိုင်တစ်ဦးတည်းပင် မဟုတ်ပဲ ညီလာခံ တက်ရောက်ခဲ့သူအာလုံးကို ဗိုလ်ချုပ်ကြီးနေဝင်း ဦးဆောင်သည့် အာဏာသိမ်းစစ်တပ်မှ ဖမ်းဆီးခဲ့ပြီး ညောင်ရွှေစော်ဘွား စဝ်ရွှေသိုက်၏ သားတော် အသက် ၁၇နှစ်အရွယ် စဝ်ဆေဟုန်ကိုလည်း ပြန်လည်ခုခံသည်ဟုဆိုကာ မြန်မာစစ်သားများက သတ်ဖြတ်သွားသည်။
သီပေါစော်ဘွား စဝ်ကြာဆိုင် ပျောက်ဆုံးမှုသည် နှစ်ပေါင်း ၆၀ ကြာသည်အထိ ယနေ့ထက်တိုင် ပဟေဠိတစ်ခုကဲ့သို့ဖြစ်နေခဲ့ပြီး ၎င်းအား မြန်မာစစ်တပ်မှ ဗထူးတပ်မြို့တွင် သတ်ဖြတ်ခဲ့သည်ဟုလည်း ရဲဘော်သုံးကျိတ်ဝင် ဗိုလ်စကြာမှ ပြောဆိုခဲ့ဖူးပေမယ့် ထိုခေတ်အခါက သေချာအတည်ပြုနိုင်ခြင်းမရှိခဲ့ပဲ ဖမ်းဆီးခဲ့မှုနှင့် ပတ်သက်ပြီး ထိုစဥ်က မြန်မာစစ်ဗိုလ်ချုပ်များ၏ ပြောကြားချက်များသည်လည်း သေချာမှုမရှိခဲ့တာကြောင့် မိသားစုအနေဖြင့် လက်ရှိအချိန်ထိ ၎င်းအသက်ရှင်မှု ရှိမရှိကို မသိရှိရသေးပါဘူး။
ယင်းသို့ အခြေအနေများကြောင့် မဟာဒေဝီသည် သူ၏သမီးတော် ၂ ပါးနှင့်အတူ ၁၉၆၄ တွင် မြန်မာပြည်ကို စွန့်ခွာသွားခဲ့ပြီး သြစတြီးယားတွင် ၂ နှစ်ခန့်နေထိုင်ပြီး နောက် ၁၉၆၆ တွင် အမေရိကန်သို့ ပြောင်းရွှေ့ကာ နိုင်ငံသားအဖြစ်ခံယူခဲ့ပြီး ၎င်းတို့ကြုံတွေ့ခဲ့ရသည့် အဖြစ်အပျက်များကို အခြေခံပြီး Twilight over Burma စာအုပ်ကို ရေးသားခဲ့ကာ ထိုစာအုပ်ကို ရုပ်ရှင်အဖြစ် ပြောင်းလည်းရိုက်ကူးခဲ့သည့် Twilight over Burma: My life as a Shan Princessကိုလည်း ၂၀၁၆ ခုနှစ် လူ့အခွင့်အရေးနှင့် လူ့ဂုဏ်သိက္ခာ ရုပ်ရှင်ပွဲတော်တွင် ပြသရန် ကြိုးပမ်းခဲ့သော်လည်း တပ်မတော်၏ ပုံရိပ်ကို ဆိုးဝါးစေသည် ဟူသည့် အကြောင်းပြချက်ဖြင့် အာဏာပိုင်များမှ ပြသခွင့်မပြုခဲ့ပေ။
မဟာဒေဝီသည် မြန်မာပြည်တွင်းမှ ထွက်ခွာခဲ့ရသော်လည်း မြန်မာ -ထိုင်းနယ်စပ်ရှိ ကလေးငယ်များ၏ ပညာရေးနှင့် မိဘမဲ့ကလေး စောင့်ရှောက်မှုများကို ၎င်းသေဆုံးချိန်အထိ လုပ်ဆောင်သွားခဲ့သည်။
Website Link: https://cjplatform.com/
Telegram Link: https://t.me/cjplatform
YouTube Link: https://www.youtube.com/@cjplatform
Twitter Link: https://twitter.com/CjPlatform
#CjPlatform #မဟာဒေဝီ