လူသောမြို့နယ်ရှိ စစ်ကောင်စီ ခြေကုပ်စခန်း တစ်ခုကို KNLA ၀င်ရောက်တိုက်ခိုက်
KNLA တပ်မဟာထိန်းချုပ်နယ်မြေ၊ လူသောမြို့နယ်ရှိ စစ်ကောင်စီ ခြေကုပ်စခန်း တစ်ခုကို ၀င်ရောက် တိုက်ခိုက်ခဲ့ကြောင်း မူတြော်သတင်းစဉ်က ဒီဇင်ဘာ ၁၃ ရက်တွင် ထုတ်ပြန်ထားသည်။
KNU လက်အောက်ခံ KNLA တပ်မဟာ ၅ တပ်ဖွဲ့၀င်များသည် လူသောမြို့နယ်၊ လယ်မူပလောကျေးရွာ အုပ်စုအတွင်း အခြေချနေသည့် စစ်ကောင်စီ ထော်မူပလယ်မဲ အခြေကုပ်စခန်းကို ဒီဇင်ဘာ ၁၂ ရက် နံနက် ၉ နာရီမှ ၁၁ နာရီအတွင်း ၀င်ရောက်တိုက်ခိုက်ခဲ့ကာ တဲ နှစ်လုံးကို မီးရှို့ဖျက်ဆီးနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။
ထို့ပြင် ဒီဇင်ဘာ ၁၂ ရက် နံနက် ၈ နာရီ ၂၅ မိနစ်တွင်လည်း ဒွယ်လိုးမြို့နယ်၊ ဘော့လူတောင်ခြေ၊ ဘီးလင်းချောင်းကမ်းနံဘေးတွင် စစ်ကောင်စီနှင့် KNLA တို့ထိတွေ့တိုက်ပွဲတစ်ကြိမ်ဖြစ်ပွားခဲ့ပြီး စစ်ကောင်စီဘက်မှ တစ်ဦးသေဆုံးကာ တစ်ဦးဒဏ်ရာရရှိခဲ့သည်။
ယင်းအပြင် ဒီဇင်ဘာ ၁၁ ရက် နံနက် ၉နာရီ ၂၂ မိနစ်တွင်လည်း ဖာပွန်-ကမမောင်းကားလမ်းလုံခြုံရေး တာ၀န်ယူထားသည့် စစ်ကောင်စီများကို KNLA က ၀င်ရောက်တိုက်ခိုက်ခဲ့ပြီး ထိခိုက်ဒဏ်ရာရရှိမှု အခြေအနေကို မသိရှိရကြောင်း ထုတ်ပြန်ထားသည်။
ဆက်လက်ပြီး ဒီဇင်ဘာ ၁၀ ရက် ည ၆နာရီ မိနစ် ၅၀ အချိန်တွင် စစ်ကောင်စီ၏ တောင်သုံးလုံးအခြေစိုက် စခန်းမှ လက်နက်ကြီးကျည် ၄ လုံးပစ်ခတ်မှုကြောင့် ကပီခီးကျေရွာနှင့် ဖွေးထော်ရူရွာများသို့ ကျရောက်ပေါက်ကွဲခဲ့ပြီး ဒေသခံများအထိအခိုက်မရှိခဲ့ကြောင်း မူတြော်သတင်းစဉ် ထုတ်ပြန်ချက်တွင် ဖော်ပြထားသည်။
ဒီဇင်ဘာ ၁၀ ရက် ည ၈နာရီ ၄၅ မိနစ်တွင် တွင်လည်း ဆယ်စွအခြေစိုက် စစ်ကောင်စီစခန်းမှ ဆင်ဆွယ်ကျေးရွာအတွင်းသို့ လက်နက်ကြီးကျည် နှစ်လုံး၊ ကပီခီးကျေးရွာအတွင်းသို့ လက်နက်ကြီးကျည် နှစ်လုံးပစ်ခတ်ခဲ့သည့်အပြင် မထောအခြေစိုက် စစ်ကောင်စီစခန်းမှလည်း ဘလယ်ပယ်ရွာသားများ၏ လုပ်ငန်းခွင်အတွင်းသို့ လက်နက်ကြီးကျည် နှစ်လုံးပစ်ခတ်ခဲ့သည်ဟု ထုတ်ပြန်ထားသည်။
KNLA တပ်မဟာ ၅ နယ်မြေတွင် စစ်ကောင်စီတပ်များသည် လူ့အခွင့်အရေးချိုးဖောက်မှုများကို အဆတ်မပြတ်ကျူးလွန်နေသည့်အတွက် KNLA တပ်ဖွဲ့၀င်များနှင့် စစ်ကောင်စီတပ်များ နေ့စဉ်နီးပါး တိုက်ပွဲဖြစ်ပွားလျက်ရှိသည်။
ဓာတ်ပုံ-မူတြော်သတင်းစဉ်
Website Link: https://cjplatform.com/
Telegram Link: https://t.me/cjplatform
YouTube Link: https://www.youtube.com/@cjplatform
Twitter Link: https://twitter.com/CjPlatform
#CjPlatform #KNLA #လူသော