လုံခြုံရေးတင်းကြပ်ထားသည့် ရန်ကုန်တွင် သပိတ်အင်အားစုများ စုပေါင်းကာ လူထုသပိတ်ပြုလုပ်
စစ်ကောင်စီမှ လုံခြုံရေး အထူးတင်းကြပ်ထားသည့် ရန်ကုန်မြို့တွင် ယနေ့ နံနက်ပိုင်းက သပိတ်အင်အားစုများ စုပေါင်းကာ စစ်အာရှင်ဆန့်ကျင်ရေး လူထုသပိတ်တိုက်ပွဲတစ်ခု ပြုလုပ်ခဲ့ကြကြောင်း တကသကျောင်းသားဟောင်းများ အင်အားစုမှ ထုတ်ပြန်ထားသည်။
အဆိုပါ သပိတ်တိုက်ပွဲကို ရန်ကုန်မြို့ရှိ စျေးတစ်ခုအတွင်း ယနေ့ နိုဝင်ဘာလ ၂၅ ရက်နေ့ မနက်ပိုင်းတွင် လုပ်ဆောင်ခဲ့ခြင်းဖြစ်ပြီး သပိတ်တွင်ပါဝင်သူ ကိုနန်းလင်းမှ “လူထုကြီးရဲ့ ရွပ်ရွပ်ချွံချွံတော်လှန်မှုကြောင့် ဒီကနေ့မှာတော့ အာဏာလောဘ တက်ပြီး လူထုကို ဖိနှိပ်နေတဲ့ မင်းအောင်လှိုင် စစ်အုပ်စုဟာ မရှုမလှ အရေးနိမ့်နေပါပြီ၊ပြိုကျနေပါပြီ။ ပျက်စီးနေပါပြီ”ဟု ဟောပြောခဲ့ကြောင်း သိရသည်။
အဆိုပါ သပိတ်တိုက်ပွဲကို ပြည်သူများမှလည်း လက်ခုပ်တီးခြင်း၊ လက်သုံးချောင်းထောင်ခြင်း၊ ကြွေးကြော်သံများ သံပြိုင် ကြွေးကြော်ရမှုများဖြင့် ပါဝင်ခဲ့ပြီး သပိတ်ပြုလုပ်အပြီး အချိန် အနည်းငယ်အကြာ အဆိုပါ ဈေးအတွင်း စစ်ကောင်စီတပ်သားများမှ ပြည်သူများအား စစ်ဆေးဖမ်းဆီးနေမှုများလည်းရှိကြောင်း သိရသည်။