မြောင်မြို့တွင် စစ်ကောင်စီတပ်သားများမိုင်းဆွဲခံရ သုံးဦးထိခိုက်
စစ်ကိုင်းတိုင်း ၊ မြောင်မြို့ရှိ မြို့မရဲစခန်းမှ စစ်ကောင်စီလက်အောက်ခံ တပ်သားများ မြို့ထဲသို့ထွက်လာချိန် အသင့်ပြင်ဆင်ထားသော မိုင်းများဖြင့်တိုက်ခိုက်ခဲ့ကြောင်း ပြည်သူ့တပ်မတော်(မြောင်) မှ တာဝန်ရှိသူတစ်ဦးက CJ Platform သို့ပြောသည်။
နိုဝင်ဘာလ ၂၉ ရက် နေ့လယ် ၂နာရီ ၃၀ မိနစ်ခန့်တွင် စစ်ကောင်စီလက်အောက်ခံ မြောင်မြို့မ စခန်းထဲရှိ တပ်သား ငါးဦးသည် ဆိုင်ကယ်သုံးစီးဖြင့် မြို့ထဲထွက်လာချိန် ၄င်းတို့ခေတ္တရပ်နားရာ နေရာသည် ပြည်သူ့တပ်မတော်မှ မိုင်းများ ပြင်ဆင်ထားသည့် နေရာသို့ ရောက်ရှိနေသဖြင့် မိုင်းပွိုင့် နှစ်လုံးဖြင့် ဖောက်ခွဲ တိုက်ခိုက်ခဲ့ခြင်းဖြစ်သည်။
” သူတို့က သူတို့မသင်္ကာတဲ့သူတွေ ဖမ်းဆီးစစ်ဆေးတာတွေလုပ်ဖို့ ကင်းပတ်တဲ့သဘောပါ။ တိုက်ခိုက်ခဲ့မှုကြောင့် သုံးကောင် ဒဏ်ရာရပြီး နှစ်ကောင် လွတ်သွားခဲ့တယ်” ဟု ပြည်သူ့တပ်မတော်(မြောင်) မှ တာဝန်ရှိသူတစ်ဦးက ပြောသည်။
ဒဏ်ရာရ စစ်ကောင်စီတပ်သားများကို စခန်းအတွင်းရှိ တပ်သားများက လာရောက်တင်ခေါ်သွားကြောင်း ၊ ၎င်းမိုင်းထောင် ဖောက်ခွဲရေးတွင် ပြည်သူ့တပ်မတော်(မြောင်) ၊ စစ်ကိုင်းခရိုင်တပ်ရင်း(၂ )၊တပ်ခွဲ(၃) တပ်စိတ် ၊ BLACK BROTHERS အဖွဲ့ ၊ HERO အဖွဲ့ တို့ ပူးပေါင်းလုပ်ဆောင်ခဲ့ကြောင်း သိရသည်။