မော်လူးမြို့ကို တော်လှန်ရေးတပ်များ တိုက်ခိုက်သိမ်းပိုက်
စစ်ကိုင်းတိုင်း၊ အင်းတော်မြို့နယ်၊ မော်လူးမြို့ကို ABSDF(NB) အမှတ်(၁) စစ်ကြောင်း၊ KIA နှင့် PDF ပူးပေါင်းတပ်များ ယနေ့ နံနက်ပိုင်းတွင် တိုက်ခိုက်သိမ်းပိုက်လိုက်ကြောင်း ABSDF အဖွဲ့က CJ Platform သတင်းဌာနထံသို့ အတည်ပြုပြောဆိုသည်။
ယနေ့ စက်တင်ဘာလ ၁၃ ရက် သန်းခေါင်ယံ ၂ နာရီ ဝန်းကျင်မှစ၍ တိုက်ခိုက်ခဲ့ပြီး တိုက်ပွဲ ၄ နာရီ ဝန်းကျင် ကြာမြင့်ခဲ့ပြီးနောက် နံနက် ၆ နာရီဝန်းကျင်တွင် မော်လူးမြို့ကို ထိန်းချုပ်နိုင်ခဲ့ခြင်းဖြစ်ကြောင်း ၎င်းတို့က အတည်ပြုသည်။
” တိုက်ခိုက်သိမ်းပိုက်ခဲ့မှုက Confirm ဖြစ်ပါတယ်။ အသေးစိတ်ကို ဆက်လက်ထုတ်ပြန်ပေးပါမယ်” ဟု ABSDF တာ၀န်ရှိသူတစ်ဦးက CJ Platform သို့ ပြောသည်။
လတ်တလော သိမ်းဆည်းမှုများကို စိစစ်နေပြီး စစ်ကောင်စီက နံနက် ၇ နာရီခွဲခန့်တွင် ဂျက်ဖိုက်တာ ၂ စီးဖြင့် ရဲစခန်းတဝိုက်ကို လာရောက်ပစ်ခတ်တိုက်ခိုက်ခဲ့ကြောင်း သိရသည်။
စစ်ကိုင်းတိုင်းဒေသကြီးအတွင်း ယခုမော်လူးမြို့အပါအ၀င် ကောလင်း၊ ခမ်းပတ်နှင့် ရွှေပြည်အေးမြို့ စသည့် မြို့ ၄ မြို့ကို တော်လှန်ရေးတပ်များက သိမ်းပိုက်ထားနိုင်ပြီဖြစ်သည်။
ဓာတ်ပုံ – ABSDF