“ပြည်သူထံပြောချင်တာကတော့ မကြာခင် ဒီတော်လှန်ရေးကြီးက နိုင်ကိုနိုင်တော့မှာပါ”

---

Shwebo Federal Army(SBFA)မှ တာ၀န်ခံ ကိုဘောနှင့်ဆက်သွယ်မေးမြန်းချက်

မေးမြန်းသူ – မင်းထက်

ဒီတစ်ကြိမ်မှာတော့ ၂၀၂၂ ခုနှစ်ဦးပိုင်းကာလတွေကစပြီး လက်နက်ကိုင်ခုခံစစ်ထဲဝင်ခဲ့တဲ့ စစ်ကိုင်းတိုင်းထဲက Shwebo Federal Army(SBFA)တပ်ဖွဲ့နဲ့ ဆက်သွယ်မေးမြန်းဖြစ်ခဲ့ပါတယ်။

SBFA ဟာ ၆၀ မမ လက်နက်ကြီးများထုတ်လုပ်နိုင်ခဲ့တဲ့အထိ တော်လှန်ရေးကို အားသွန်ခွန်စိုက်လုပ်နေတဲ့အဖွဲ့တစ်ခုဖြစ်ပါတယ်။ ဒါကြောင့် ဒီအဖွဲ့ရဲ့လိုအပ်ချက်တွေဘာရှိနေတာလဲ။ ရှေ့ဆက်ဘာတွေဆောင်ရွက်သွားမလဲ။ သူတို့အဖွဲ့အပေါ် NUG ထောက်ပံ့မှုတွေရှိမရှိဆိုတာနဲ့ပတ်သက်ပြီး CJ Platform က ဆက်သွယ်မေးမြန်းထားချက်များကို ကောက်နုတ်ဖော်ပြပေးပါရစေ။

CJ Platform

CJ – ဆရာတို့အဖွဲ့မှာ ဘာတွေလိုအပ်နေပါသလဲ။လိုအပ်ချက်ရှိနေတာတွေ ပြောပေးပါဦးခင်ဗျာ။

ကိုဘော – အဖွဲ့ရဲ့လိုအပ်ချက်က လက်နက်ခဲယမ်းပဲပေါ့။ကျွန်တော်တို့ ဒီမှာရှိနေတဲ့လက်နက်က နည်းတယ်။ဒါပေမဲ့ ရှိတာလေးစုပြီး ၀ယ်ထားတယ်။ ကျည်ကတော့ လိုအပ်တယ်ပေါ့ဗျာ။ အရေးကြီးတဲ့လိုအပ်ချက်ကတော့ ကျည်လိုအပ်ပါတယ်။ ရှေ့တန်းမှာ ကျည်ပြတ်တာတွေရှိတယ်။ တိုက်ပွဲတိုက်ရင်း ကျည်ပြတ်တာမျိုးတွေရှိခဲ့တယ်။ စားနပ်ရိက္ခာနဲ့ တခြားလိုအပ်တာတွေထက် အရေးကြီးဆုံးကတော့ လက်နက်ခဲယမ်းကို မပြတ်အောင် ဖြည့်တင်းနေရတာပါပဲ။

CJ – ဆရာတို့အနေနဲ့ ထိတွေ့တိုက်ပွဲတွေရော ကြုံရပါသလား။

ကိုဘော – ထိတွေ့တိုက်ပွဲကတော့ ရှိပါတယ်။ ပထမဆုံးထိတွေ့တိုက်ပွဲဆို ကျွန်တော်တို့ ၂၀၂၂ အစောပိုင်းကာလမှာ ပျူရွာတစ်ရွာကိုဝင်ရောက်တိုက်ခိုက်ခဲ့တာပါ။ စခန်းသိမ်းတိုက်ခိုက်ဖို့ သွားရာမှာတော့ အခြေအနေအကြောင်းအမျိုးမျိုးကြောင့် မသိမ်းနိုင်ခဲ့ဘူး။ ကျနော်တို့ ရဲဘော် ၂ ယောက်ကျခဲ့တယ်။ အဲဒီတိုက်ပွဲကတော့ အကြီးဆုံးပေါ့ဗျာ။ ခုနောက်ပိုင်းမှာ ခပ်စိပ်စိပ်ဆိုသလို မြို့ပြ မစ်ရှင်တွေဖော်ဆောင်နေပါတယ်ခင်ဗျ။

CJ – အဲဒီလို တိုက်ပွဲတွေအတွင်းမှာ လက်နက်မမျှတမှု ကြုံရတာမျိုးရှိခဲ့ဖူးလား။ ကြုံခဲ့ဖူးရင် ဘယ်လို မမျှတာမှုမျိုးတွေရှိခဲ့လဲဆိုတာလေး ပြောပြပေးပါဦး။

ကိုဘော – တစ်ချို့တိုက်ပွဲတွေကို စကစရဲ့ ပြည်သူ့စစ်အခြေပြုပျူရွာတွေကို ၀င်ရောက်တိုက်ခိုက်ရာမှာ သူတို့ဘန်ကာတွေကိုတော့မဖြိုနိုင်ခဲ့ဘူး။ အဲဒါကလည်း ကျွန်တော်တို့ လက်နက်ခဲယမ်းလိုအပ်ချက်ကြောင့်ပေါ့။RPG တို့လို လက်နက်ကြီးတွေသာ အလုံအလောက်ရှိမယ်ဆိုရင် ဒီထက်မက စွမ်းဆောင်နိုင်မှာပါ။

CJ – ဆရာတို့အဖွဲ့အနေနဲ့ NUG ဘက်က ထောက်ပံ့မှုကို လက်ခံရရှိခဲ့ဖူးလား။ မထောက်ပံ့ဘူးလား။ ထောက်ပံ့ပေမယ့် နည်းနေတာလား။

ကိုဘော – Local PDF အဖြစ်ရပ်တည်နေတဲ့အနေအထားတစ်ခုမှာ NUG ဘက်ကတော့ထောက်ပံ့မှုမရှိပါဘူး။ သူတို့က တပ်ရင်းတပ်ဖွဲ့တွေကိုတော့ ထောက်ပံ့မှုမျိုးရှိပါတယ်။ အများကြီးမဟုတ်ပေ‌မယ့် သူတို့တတ်နိုင်သလောက် ဆောင်ရွက်ပေးနေတာမျိုး ရှိနေတယ်။ ကျွန်တော်တို့ကတော့ အဲဒီလိုမျိုးမရှိပါဘူး။ ကိုယ့်ဘာသာကိုယ် ရပ်တည်ရတာပေါ့။ စာနပ်ရိက္ခာ၊ ခဲယမ်း အကုန်ပေါ့။

CJ – ပြည်သူတွေရဲ့ ထောက်ပံ့မှုအနေအထားကရော ဘယ်လိုအခြေအနေရှိပါသလဲ။

ကိုဘော – ကျွန်တော်တို့ အခြေပြုအထိုင်ချနေတဲ့ အနီးဝန်းကျင်က ပြည်သူတွေကလည်း ပါဝင်လှူဒါန်းကြပါတယ်။ ဆန်ဆိုဆန်၊ ရိက္ခာပိုင်းတွေ လှူဒါန်းကြတယ်။ စားနပ်ရိက္ခာပိုင်းက သိပ်မပူရပါဘူး။ စစ်ရှောင်တွေ ရှိတယ်ဆိုရင်တောင် ကျွန်တော်တို့အဖွဲ့က ဆန်တို့ဘာတို့ လိုအပ်တာတွေ ပြန်လည်ထောက်ပံ့တာမျိုး လုပ်ပေးနေတာရှိပါတယ်။

CJ – SBFA အနေနဲ့ တိုက်ပွဲတွေမှာ ဆုံးရှုံးမှုတွေရှိခဲ့ဖူးလား။

ကိုဘော – ဆုံးရှုံးမှုကတော့ ကျွန်တော်အစောကပြောခဲ့တဲ့ စခန်းသိမ်းတိုက်ခိုက်မှုမှာ ကျသွားရတဲ့ရဲဘော်မှာ မောင်းပြန်ပါသွားတယ်။ အဲဒီနောက် လွန်ခဲ့တဲ့ ၂ လလောက်က ကင်းထောက် ဒရုန်းတစ်စီး ကျဆုံးပျက်စီးတယ်။ တစ်ချို့ပျက်စီးဆုံးရှုံးမှုတွေကတော့ ရှိတာပေါ့။ အခုဆို ကျွန်တော်တို့ ဆုံးရှုံးခဲ့ရတဲ့ ကင်းထောက်ဒရုန်း အစားထိုးဖို့အတွက် ဒရုန်း ပရောဂျက် လုပ်ဆောင်နေတာ ရှိပါတယ်။

CJ – လက်နက်ခဲယမ်းဝယ်ယူရေးအပိုင်းမှာ အဆင်ပြေမှုရှိရဲ့လား။

ကိုဘော – လက်နက်လိုအပ်ချက်တွေကတော့ ရှိနေတာပေါ့။၀ယ်ယူမှုကတော့ သေနတ်တစ်လက်ရဖို့ဆိုတာက တော်တော်လေး ရုန်းကန်နေရတာပေါ့။ သေနတ်တစ်လက်ရဖို့ လက်ရှိပေါက်ဈေးက သိန်း ၂၅၀ ပေါက်ဈေးရှိနေတော့ လေ။ နောက်တစ်ခုက လစဉ် ၀ယ်နိုင်ဖို့ဆိုတာ အဆင်မပြေနိုင်ဘူး။ ကြိုးစားရုန်းကန်ရတာ ခဲရင်းတာပေါ့ဗျာ။ ရှိပြန်ရင်လည်း လက်နက်လမ်းကြောင်းက စရိတ်များတာပေါ့ဗျာ။

CJ – အဖွဲ့စည်းနဲ့ပတ်သက်ပြီး လတ်တလော ဘာတွေလုပ်ဆောင်ဖို့ရှိနေသေးလဲ။

ကိုဘော – လက်ရှိကတော့ လက်နက်ကြီးတွေ၊ ၆၀ မမ၊ တာဝေးပစ်ဗျူဟာတွေတော့ စစ်ကြောင်းငြိမ်နေတဲ့အချိန် ခပ်စိပ်စိပ်သွားပြီးတိုက်နေတာမျိုးရှိပါတယ်။

CJ – ဆရာတို့အနေနဲ့ ပြည်သူထံ ပေးချင်တဲ့ သတင်းစကားများ ပြောပေးပါအုံးဗျ။

ကိုဘော – ဟုတ်။ ပြည်သူထံပြောချင်တာကတော့ မကြာခင် ဒီတော်လှန်ရေးကြီးက နိုင်ကိုနိုင်တော့မှာပါလို့။

မင်းထက်