ပျူစောထီးများနှင့် အတူယှဉ်တွဲ နေထိုင်လိုခြင်း မရှိသောကြောင့် နေအိမ်စွန့်ခွာ တိမ်းရှောင်နေသည့် ပြည်သူတစ်ထောင်ကျော်အတွက် အကူညီများလိုအပ်နေ
စစ်ကိုင်းတိုင်း ၊ ရွှေဘိုမြို့နယ်အတွင်းရှိ စစ်ကောင်စီကို မထောက်ခံသော ပျူရွာအမည်ပေါက်ဒေသများမှ တိမ်းရှောင်ပြည်သူအများနှင့် ဒေသတွင်း စစ်ရှောင် ၁၀၀၀ ခန့်သည် အကူညီများ လိုအပ်လျက်ရှိနေကြောင်း ယင်းမြို့နယ် ပြည်သူ့လုံခြုံရေးအဖွဲ့ (ပလဖ) အဖွဲ့၀င်တစ်ဦးက ပြောသည်။
ရွှေဘိုမြို့နယ်ရှိ စစ်ရှောင်ပြည်သူအများစုသည် မြို့နယ်အတွင်းရှိ ပျူရွာများမှ စစ်ကောင်စီ ဆန့်ကျင်သော အရပ်သားပြည်သူများဖြစ်ကြောင်း ၊ ရွာခံ ပျူစောထီးများနှင့် အတူယှဥ်တွဲ မနေလိုသောကြောင့် လက်လှမ်းမီရာ ဒေသများရှိ ကျေးရွာ တာ၀န်ရှိသူများထံ အကူညီတောင်းခံ၍ တော်လှန်ရေး အဖွဲ့စည်းများ၏ နေရာပေးချထားမှုဖြင့် နေထိုင်လျက်ရှိကြောင်း သိရသည်။
” ခန့်မှန်းခြေကတော့ တစ်ထောင်လောက်ရှိမယ်။ စစ်ရှောင်တွေက အဓိကကတော့ နေရေးနဲ့စားရေးပါပဲ၊ နေရာအခက်ခဲတွေပေါ့။ မိုးတွင်းရောက်လာရင်လည်း မိုးကာတွေလိုလာမယ်။ စားနပ်ရိက္ခာဆိုလဲ အမြဲတမ်းလိုအပ်လာမယ်လေ သူတို့ကမှီခိုတွေဆိုတော့ ရွာနေချည်တိုင်လိုတော့ အဆင်မပြေနိုင်ဘူးပေါ့ ” ဟု Shwebo Crocodile အဖွဲ့ တာ၀န်ရှိသူတစ်ဦးက ပြောသည်။
စစ်ရှောင်ပြည်သူများသည် တော်လှန်ရေး အဖွဲ့များ၏ အကူအညီဖြင့် စား၀တ်နေရေး ဖြေရှင်းနေကြရသလို အနီးအနားကျေးရွာရှိ ဒေသခံပြည်သူများ၏ ကူညီမှုများဖြင့်လည်း ရပ်တည်နေထိုင်နေရကြောင်း သိရသည်။
“စျေးရောင်းတတ်သူက စျေးရောင်းစားတာပေါ့၊ အခုချိန်က စပါးရာသီဆိုတော့ ကောက်စိုက်လိုက်ကြတယ်ဗျ။ အလုပ်ကိုင်တွက်ကတော့ အနား၀န်းကျင်ကျေးရွာတွေက တောင်သူတွေက ဌားရမ်းတဲ့အခါလိုက်ပြီး ၀မ်းစာအတွက် ဆောင်ရွက်ကြရတာပေါ့၊ သူတို့အတွက်ကတော့ အမြဲ လိုအပ်ချက်ကတော့ ရှိနေပါတယ်” ဟု ဒေသခံကာကွယ်ရေးရဲဘော်တစ်ဦးက ပြောသည်။
ပြီးခဲ့သည့် မတ်လ ၂၈ ရက်နေ့တွင် ရွှေဘိုမြို့နယ် ရေရှည် စစ်ဘေးတိမ်းရှောင် ပြည်သူ ၁၀၀ ကျော်အတွက် ဒေသခံကာကွယ်ရေးတပ်များက စားနပ်ရိက္ခာများ သွားရောက်လှူဒါန်းခြင်း ၊ အားပေး စကားပြောကြားခြင်းများ ပြုလုပ်ခဲ့ကြောင်း သိရသည်။
“ကျွန်တော်တို့ ဘေးပတ်၀န်းကျင်မှာ ရေရှည် စစ်ဘေးရှောင်လေးတွေ ရှိပါတယ်ဗျ။ ကျွန်တော်တို့ အလှူငွေများရင် ရံပုံငွေတောင့်ရင် မကြာခဏသွားလှူဖြစ်ပါတယ် ။တစ်ချိုတော့ အခက်ခဲလေးတွေ ရှိပါတယ်ဗျ။ ကျွန်တော်တို့ ရန်ပုံငွေတောင့်ရင်တော့ သွားရောက်လှူဒါန်းပါတယ်ဗျ ၊ ကျွန်တော်တို့ အဲ့လောက် ရန်ပုံငွေ မတောင့်သည် အတွက် တစ်လက နှစ်ပိုင်းခွဲပြီး သွားရောက် လှူဒါန်းရပါတယ်ဗျ” ဟု ဗိုလ်လင်းရောင် ပြည်သူ့ကာကွယ်ရေးအဖွဲ့ တာ၀န်ရှိသူတစ်ဦးက ပြောသည်။
ယင်းလှူဒါန်းမှုကို Shwebo Crocodile ၊ ဇေယျာသွေး၊ ဗိုလ်လင်းရောင်ပြည်သူ့ကာကွယ်ရေးအဖွဲ့ ၊ ရွှေဘိုမြို့နယ် ပြည်သူ့လုံခြုံရေး တပ်ဖွဲ့ နှင့် ရွှေဘိုမြို့နယ်ပြည်သူ့အုပ်ချုပ်ရေး ခေါင်းဆောင် ညီအကိုများ စုပေါင်း ထောက်ပံ့ပေးခဲ့ကြောင်း သိရသည်။
ဓာတ်ပုံ – Shwebo Crocodile