ပျူစောထီးများက တစ်ရွာတည်းနေ NLD ထောက်ခံသူများ၏ ကျွဲနွားများနှင့် ပစ္စည်းဥစ္စာများကို လုယက်ပြီး ရောင်းစားနေ
ကန့်ဘလူမြို့နယ်တောင်ပိုင်းရှိ မင်းကုန်း(ခ) ကျေးရွာ၌ ပျူစောထီးများက တစ်ရွာတည်းနေဒေသခံ NLD ထောက်ခံသူများ ပိုင်ဆိုင်သည့် ကျွဲ၊ နွားများနှင့် တန်ဖိုးကြီး ပစ္စည်းများကို လုယက်ယူငင်ပြီး ရောင်းစားခြင်းများ ပြုလုပ်နေကြောင်း သိရသည်။
ပျူစောထီးအင်အား ၅၀ ခန့်ထိရှိသည့် မင်းကုန်း(ခ)ကျေးရွာ၌ စက်တင်ဘာ ၉ ရက်တွင် ဒေသခံရွာသားများ ဖြစ်သည့် ဦးမြင့်စိုးနှင့် ဒေါ်ချစ်စုမ၏ နေအိမ်မှ ကျွဲ ၂ ကောင် ၊ ဦးမြင့်ကျော်သူ၏ နေအိမ်မှ ကျွဲ ၂ ကောင် ၊ ဦးညွန့်ဝင်းနိုင် နေအိမ်မှ နွားမသားအမိ ၊ ဦးဝင်းမောင်နေအိမ်မှ နွားမသားအမိ နှင့် ဦးကြွက်သိုးနေအိမ်မှ နွားမသားအမိ စုစုပေါင်း ကျွဲ ၄ ကောင် နှင့် နွား ၆ ကောင် တို့ကို ပျူစောထီးများက ရောင်းစားခဲ့ကြောင်း သိရသည်။
ထို့ပြင် စက်တင်ဘာ လဆန်းပိုင်းကလည်း ဦးပေါတာ ပိုင်ဆိုင်သည့် လယ်ယာသုံး ထွန်စက်အသေး ၁ စီး ၊ Honda ရေစုပ်စက် ၂ လုံး ၊ မြင်းကောင်ရေ ၂၂ ကောင်အား ရေစုပ်စက် ၁ လုံး တို့ကိုလည်း ယူဆောင်ကာ ပျူစောထီးများက ရောင်းစားခဲ့ကြောင်း သိရသည်။
၄င်း ပျူစောထီးများသည် မင်းကုန်စ(ခ)ကျေးရွာ၌ ပင်နေထိုင်သူများဖြစ်ပြီး NLD ပါတီကို မဲထည့်ခဲ့သည်ဟုဆိုသော တစ်ရွာတည်းနေ ဒေသခံများအား နေအိမ်မှ ထွက်ပြေးစေရန် သေနတ်ပြချိန်းခြောက်မှုများ ပြုလုပ်ပြီး ယင်းသို့ ရောင်းစားမှုများ ပြုလုပ်နေခြင်း ဖြစ်သည်။
ထိုသို့ ဦးဆောင်၍ ရောင်းစားသူများမှာ မင်းကုန်း(ခ)ရွာသားများဖြစ်သည့် ပျူစောထီး ခေါင်းဆောင်ကိုဘိုနိုင် ၊ ကိုခင်မောင်ဝင်း ၊ ကိုဖိုးပြား ၊ စစ်ကောင်စီအုပ်ချုပ်ရေးမှူး ကိုနေထက်လင်းနှင့် ၄င်း၏ ညီအစ်ကိုရင်း ဖြစ်သူ ကိုဇော်ငြိမ်းဝင်း၊ ပျူစောထီများ ဖြစ်သည့် ကိုညီညီရွှေသဲ နှင့် ထန်းတောရွာသား ကိုခင်မောင်ငြိမ်း တို့ဖြစ်ကြောင်း ဒေသတွင်း သတင်းကွန်ယက် Ifinity Group က ထုတ်ပြန်ထားသည်။
ယခု ကျွဲ နွား များ သိမ်းခံရသော ပိုင်ရှင်များသည် ပျူစောထီးများက အသက်အန္တရာယ် မကြာခဏ ခြိမ်းခြောက်ခြင်းနေကြောင့် ကျေးရွာမှ ထွက်ပြေးတိမ်းရှောင်နေကြရသည်။
ပျူစောထီးများသည် မင်းကုန်း(ခ)ရွာ၌ ဒုတိယအကြိမ်မြောက်အဖြစ် ယခုကဲ့သို့ ပြုလုပ်ခြင်း ဖြစ်ပြီး ပထမအကြိမ်တွင်လည်း NLD ထောက်ခံသူများ၏ ကျွဲ ၂ ကောင် နှင့် နွား ၁၄ ကောင်တို့အား ပျူစောထီးများက အဓမ္မသိမ်းယူကာ ရောင်းစားခဲ့သဖြင့် ဒေသခံများ၏ ကျွဲ နွား စုစုပေါင်း၂၆ ကောင်အထိ ရောင်းစားခံခဲ့ရပြီး ဖြစ်ကြောင်း သိရသည်။