စစ်တပ်က ၁၂ ရက်ကြာ စစ်ကြောင်းထိုးနေသောကြောင့် ယင်းမာပင်မြို့နယ်နှင့် ဆားလင်းကြီးမြို့နယ် အတွင်းရှိ ပြည်သူ တစ်ထောင်ကျော်အတွက် စားနပ်ရိက္ခာများ လိုအပ်နေ
စစ်ကိုင်းတိုင်း၊ ယင်းမာပင်မြို့နယ်နှင့် ဆားလင်းကြီးမြို့နယ် အတွင်း စစ်တပ်က ၁၂ ရက်ကြာ စစ်ကြောင်းထိုးနေသောကြောင့် ကျေးရွာ ၁၀ ရွာခန့်မှ စစ်ရှောင် ပြည်သူ ၁၀၀၀၀ ကျော်အတွက် စားနပ်ရိက္ခာများ လိုအပ်နေကြောင်း ယင်းမာပင်-ဆားလင်းကြီးရွာပေါင်းစုံလူထုသပိတ်ကော်မတီ၀င် ကိုလွမ်းသူက CJ Platform သို့ပြောသည် ။
မတ်လ ၂၂ ရက်နေ့မှ စ၍ အင်အား အများအပြားဖြင့် ယင်းမာပင်မြို့နယ်နှင့် ဆားလင်းကြီးမြို့နယ် အတွင်း စစ်ကြောင်းထိုး ဝင်ရောက်လာသော စစ်ကောင်စီစစ်ကြောင်းသည် ယနေ့ ဧပြီလ ၂ ရက်နေ့အထိ ပြန်လည် ဆုတ်ခွာခြင်း မရှိသောကြောင့် ပြည်သူ အများအပြား နေရပ်စွန့်ခွာ စစ်ဘေး တိမ်းရှောင်နေရခြင်းဖြစ်ကြောင်း သိရသည် ။
“လောလောဆယ် အခြေနေမှာတော့ ယာယီစစ်ရှောင်တွေလို့ ပြောရမယ်၊ ဘယ်လောက်ထိရှိနေမယ်လို့တော့ မပြောနိုင်ဘူး ၊ လောလောဆယ် မရှောင်တိမ်းရတဲ့ကျေးရွာတွေကနေ ပြန်ကူတာ ၊ ဒေသတွင်းမှာ လှုပ်ရှားနေတဲ့ ကျွန်တော်တို့လို ယင်းမာပင်-ဆားလင်းကြီး သပိတ်ကော်မတီတွေကနေ ဦးဆောင်လုပ်နေတဲ့ ပြည်သူမှပြည်သူသို့ အဖွဲ့စည်းတွေ အခြားသောအဖွဲ့စည်းတွေက နိုင်သလောက်ကူညီနေကြတယ် ဒါပေမဲ့လုံလောက်တဲ့ အထောက်ပံ့မှုမျိုးတော့ ဖြစ်မနေဘူး ” ဟု သပိတ်ကော်မတီ၀င် ကိုလွမ်းသူက ပြောသည်။
လက်ရှိအချိန်တွင် စစ်ကောင်စီ စစ်ကြောင်းသည် မုံရွာ-ပုသိမ် လမ်းဘေး လမ်းတစ်လျှောက် အင်အား အများအပြားဖြင့် ဂုဏ်တောရွာ ၊ ကျေးစာကျရွာ တို့၌ တပ်စွဲထားလျက်ရှိသောကြောင့် ကျေးရွာ ၁၀ ရွာခန့်မှ ဒေသခံ ပြည်သူ တစ်သောင်းကျော်သည် နေရပ်စွန့်ခွာ စစ်ဘေးရှောင်နေရ၍ စားနပ်ရိက္ခာများလည်း လိုအပ်နေခြင်း ဖြစ်ကြောင်း သိရသည်။
စစ်ရှောင်ပြည်သူများအနေဖြင့်လည်း ကာလရှည်ကြာစွာထပ်မံ တိမ်းရှောင်ရပါက စားနပ်ရိက္ခာအခက်အခဲများ ၊ ကျန်းမာရေး စောက်ရှောက်မှုဆိုင်ရာ လိုအပ်ချက်များ ပိုမိုလိုအပ်လာနိုင်ကြောင်းယင်းမာပင်-ဆားလင်းကြီး ရွာပေါင်းစုံလူထုသပိတ်ကော်မတီ၀င် ကိုလွမ်းသူက ပြောသည်။
ဓာတ်ပုံ – စစ်ကိုင်းပြည်သူဖေးမမှုကွန်ရက် (မတ်လ ၂၂ ရင်နေ့က ယင်းမာပင်မြို့နယ်မှ ထွက်ပြေးတိမ်းရှောင်ပြည်သူများ)